Lucas 13 - Inkeanon

Dapat Magtalikod sa Saea ro Tanan

¹ Ku ruyon man nga oras, may idto nga mga tawo sa mga nagapaeamati kay Jesus nga nagsugid kana ku natabo parti sa pilang ka mga tagaGalilea nga ginpapatay ni Goberbador Pilato. Natabo ra samtang nagahaead sanda ku andang mga sapat bilang sakripisyo sa Dyos.

² Pagkabati kara ni Jesus, naghambae imaw, “Kon kinyo, nagakahueugan baea ra nga ro mga tagaGalilea ngato hay pinakamakasasaea sa tanan nga tagaGalilea dahil sa natabo ngato kanda?

³ Bukon 't-a it makaruyon. Ginahambae ko eagi kinyo nga kon indi kamo magtalikod sa inyong mga saea hay pinahan kamo tanan sa impyerno.

⁴ Hay tag 18 ngato nga ka tagaJerusalem nga natumbahan it tore idto sa Siloam ag nagkaeamatay? Kon kinyo, nagakahueugan man baea ra nga sanda ro pinakamakasasaea sa tanan nga nagaistar sa Jerusalem dahil sa natabo ngato kanda?

⁵ Bukon 't-a it makaruyon. Ginahambae ko eagi kinyo nga kon indi kamo magtalikod sa inyong mga saea hay pinahan man kamo tanan sa impyerno.”

Ro Tawo nga Owa it Mayad nga Bunga nga Ginausoy it Dyos hay Anang Pagapinahan

⁶ Gintud-an man sanda ni Jesus paagi sa rayang paanggid nga istorya. Hambae nana, “May sangka tawo nga nagtanom it kahoy nga higera kon tawgon idto sa anang ubasan. Kat tigbueunga eon, inadtunan nana ro kahoy ngato ag tinan-aw kon may bunga eon, pero owa gid imaw it hakita.

⁷ Ngani, ginhambae nana ro manogtatap ku anang ubasan, ‘Tatlong dag-on eon ro akong pagtueutan-aw kon may bunga eon ro kahoy ngara pero owa't-a gihapon ako it hakita. Pukana lang ngani ra. Ginakinaon na eang kara ro sustansya it eugta.’

⁸ Nagsabat ro manogtatap, ‘Sir, pabay-i eang anay ron dikaron it sang dag-on pa. Kutkutan ko ron palibot sa anang puno ag abunuhan.

⁹ Kon magbunga gid man ron sa masunod nga dag-on hay kundi mayad, pero kon indi hay ipapukan mo lang dayon ron.’ ”

Ginpamayad ni Jesus ro Bayi nga Buktot sa Sangka Adlaw it Inogpahuway

¹⁰ Isaeang ka Adlaw it Inogpahuway, tag nagaturo si Jesus sa sinagoga

¹¹ hay may hakita imaw idto nga bayi nga ginpabuktot it maeain nga espirito sa sueod it 18 anyos ag indi gid nana matadlong ro anang eawas.

¹² Pagkakita ni Jesus sa bayi ngato hay ana ra nga gintawag ag ginhambae, “Nang, hilway ka eon sa imo ngarong masakit.”

¹³ Gintungtung ni Jesus ro anang alima sa bayi ag nagtadlong eagi ro anang eawas kara ag nagdinayaw rayon imaw sa Dyos.

¹⁴ Ugaling hay naugot ro manogdumaea it ratong sinagoga ay nagpamayad si Jesus it masakiton sa Adlaw it Inogpahuway. Naghambae imaw sa mga tawo, “May an-om nga adlaw nga inogtrabaho, ngani dikato kunta kamo mag-adto iya agod magpabueong, bukon it sa Adlaw it Inogpahuway.”

¹⁵ Nagsabat kana ro Ginuo, “Mga ipokrito gid-a kamo! Bukon abi it inyo nga ginahubad ro inyong asno o baka sa pasindungan ag ginadaea sa pasabsaban bisan Adlaw it Inogpahuway?

¹⁶ Hay rayang bayi ngara nga apo pa ni Abraham hay gin-gapos ni Satanas sa sueod it 18 anyos. Bukon abi it dapat gid nga hilwayon eon imaw sa anang masakit bisan Adlaw pa ra it Inogpahuway?”

¹⁷ Nahuy-an gid ro tanan nga nagakuntra kay Jesus sa ana ngatong ginhambae. Pero ro kaabo ma't-a nga tawo, tanan sanda hay nalipay gid sa tanan nga makangawa-ngawang mga butang nga anang ginpanghimo.

Ro Pag-inabo ku Masakpan ku *Paghari it Dyos

¹⁸ Ngani, naghambae pa gid si Jesus, “Ano ro kaparehas ku paghari it Dyos sa anang mga sinakpan? Sa ano nakon ra ikakompara?

¹⁹ Pareho ra it busoe it mustasa nga gintanom it sangka tawo sa anang taeamnan. Pagkatapos hay nagtubo ra hasta nangin pareho it bahoe it kahoy ag puydi eon nga mapugaran it mga pispis ro anang mga sanga.”

Sangkiri sa Primero Pero Mangin Abo sa Ulihi ro Masakpan ku *Paghari it Dyos

²⁰ Naghambae pa gid si Jesus, “Sa ano nakon ikakompara ro paghari it Dyos sa anang mga sinakpan?

²¹ Pareho ra sa matabo sa harina nga ginhaluan ku sangka bayi it sangkiriti nga pangpaalsa. Bisan sangkiriti eang rato hay nahapaalsa na kara ro bilog nga minasa.”

Pilia ro Pwertahan nga Makitid nga Paadto sa Eangit

²² Pagkatapos, nagpadayon si Jesus sa anang pagpamanawon paadto sa Jerusalem. Nagturo imaw sa mga tawo sa mga kabanwahan ag kabaryuhan nga andang ginaagyan.

²³ Sa sangka lugar nga andang gin-agyan hay may nagpangutana kana, “Sir, sangkiri eang baea ro maeuwas?” Naghambae si Jesus kanda tanan,

²⁴ “Magtinguha gid kamo nga makasueod sa makitid nga pwertahan pasueod sa eangit. Ginahambae ko eagi kinyo nga sa ulihi hay abo ro magatinguha nga magsueod pero indi eon sanda makasueod

²⁵ kon makapanirado eo't-a ro tagbaeay. Hibinlan lang kamo sa liwan it pwertahan nga gapinanuktok ag gahinambae, ‘Ginuo, buksi kami.’ Pero sabton na kamo, ‘Owa ko gid kamo pagkilan-a nga akong mga katawhan ag bisan ro inyong ginhalinan!’

²⁶ Masabat man dayon kamo, ‘Nagsaeo pa ngani kita kato sa pagkaon. Nagturo ka pa ngani kato sa among banwa.’

²⁷ Pero masabat ro tagbaeay, ‘Owa ko gid kamo pagkilan-a nga akong mga katawhan ag bisan ro inyong ginhalinan. Halin kamo iya, kamo tanan nga puro bukon it matarong ro buhat!’

²⁸ “Kon hikita ninyo sanday Abraham, Isaac ag Jacob ag ro tanan nga mga propeta nga gintapoe sa mga sinakpan it Dyos nga anang ginaharian pero kamo hay hibilin sa guwa ag pagatabugon, dikaron eon dayon kamo mag-inueahab ag magpinagot.

²⁹ Sa rato man nga tyempo hay magaaeabutan ro mga tawo halin sa tanan nga parti it kalibutan ag magasaeo sa pagkaon kaibahan ku tanan nga mga sinakpan it Dyos.

³⁰ Pamati kamo. May mga haulihi nga mauna ag may mga hauna nga maulihi.”

Owa Haluko si Jesus ku ay Herodes nga Pagkatuso

³¹ Pagkahambae karon ni Jesus, may nag-abot dayon nga mga Pariseo ag naghambae kana, “Halin eon iya ay gusto ka nga ipapatay ni Herodes.”

³² Nagsabat si Jesus, “Balik kamo sa tuso ngaron ag sugiri ninyo imaw nga gasuboe ako it mga maeain nga espirito sa eawas it mga tawo ag gapamayad it mga masakiton makaron ag hin-aga. Sa ika-3 adlaw hay matapos eon ro akong oeobrahon.

³³ Ugaling dapat gid man ako nga magpadayon sa akong pagpamanawon makaron ag hin-aga ag sa masunod nga adlaw hasta makaabot ako sa Jerusalem, tutal ruyon ro syudad kon siin ginapamatay ro mga propeta.”

Naeuoy gid si Jesus sa mga Judio ay Andang Ginbinalibaran ro Paghigugma it Dyos Kanda

³⁴ Naghambae dayon si Jesus, “Ay, aki, kaeuoy kamo nga mga tagaJerusalem! Ginapinamatay ninyo ro mga propeta ag inyong ginapinangeapog it bato hasta mamatay ro mga ginapaadto it Dyos kinyo. Permi nakong ginahandom nga tilipunon kunta kamo pareho it mus-an nga nagatinipon ku anang mga isiw sa idaeom ku anang pakpak pero indi man kamo magsugot.

³⁵ Pamati kamo. Ginpabay-an eon kamo it Dyos pati ro inyong syudad ngara. Ag ginahambae ko kinyo nga umpisa makaron hay indi ninyo makilaea kon sin-o gid ako hasta sa adlaw nga maghambae kamo nga, ‘Daeayawon raya nga ginpadaea iya it Dyos.’ ”