Lucas 10 - Inkeanon

Ginpapanaw ni Jesus ro 72 Pa Gid ku Anang mga Sumueunod Agod Magwali ag Magpamayad

¹ Pagkataliwan it pilang adlaw, si Jesus hay nagpili it 72 pa gid nga ka tawo halin sa tanan nanang mga sumueunod. Ginpapanaw nana sanda it tig daywa-daywa ag ginpaadto sa tanan nga mga banwa ag lugar nga ana nga aeadtunan sa ulihi.

² Bago nana sanda ginpapanaw hay ginbilinan nana sanda, “Kaabo-abo kunta ro tawo nga gustong magtuo kakon pareho it gianyon nga bugana pero kueang ro manog-ani. Ngani pangamuyo kamo sa Ginuong Dyos, nga tag-ana it gianyon, nga padaehan nana it mga manog-ani ro anang aeanyon.

³ Sige, panaw eon kamo. Pero mag-andam kamo ay ginapaadto ko kamo sa mga mapintas nga tawo ag ro inyong kapareho hay mga tiyo it karnero nga ginpadaea sa lugar nga abo ro mga mabangis nga sapat.

⁴ Ayaw kamo magdaea it kahita o bag o sandalyas, mageuwas eang sa inyong ginasuksuk. Ayaw man kamo it pundo ag makig-istorya bisan kanyo sa daean.

⁵ Kon ginabaton kamo sa sangka baeay, hambaea anay ninyo ro tagbaeay it makaraya, ‘Kabay pa nga rondayang panimaeay hay taw-an it Dyos it katawhayan.’

⁶ Kon nalipay sanda sa pagbaton ku katawhayan ngato hay taw-an gid sanda it Dyos karon. Pero kon owa sanda naila magbaton hay indi man sanda pagtaw-an it Dyos.

⁷ Ayaw kamo it saylo-saylo it daeayunan. Idto eang kamo magtenir sa ratong panimaeay nga nagbaton kinyo. Ayaw kamo maghuya-huya nga magbaton kon ano ro andang ginapakaon ag ginapainom kinyo tungod nga nagakabagay eang nga suhuean ro nagakabudlay.

⁸ Ag kon mag-adto kamo sa bisan siin nga banwa ag ginaabi-abi kamo ku mga tawo, kan-a ro andang ginadat-on kinyo.

⁹ Pamayara ninyo ro mga nagamasakit sa ruyong banwa ag sugiri ro mga pumueuyo, ‘Iya eon kinyo ro oportunidad nga matapoe sa mga sinakpan it Dyos.’

¹⁰ Pero kon mag-adto kamo sa bisan siin nga banwa ag indi nanda kamo pagbatunon, adto kamo sa kon siin may abong tawo ag ihambae ninyo ra:

¹¹ ‘Tungod owa ninyo kami pagbatuna, maskin ro tapu-tapu sa inyong banwa nga nagadukot sa among mga siki hay among ginapagpag bilang tanda nga, sa mata it Dyos hay pareho kamo it mga tawo nga owa nagakilaea kana. Pero tandai ninyo nga gintaw-an kamo it oportunidad nga matapoe sa mga sinakpan it Dyos.’

¹² Ginahambae ko eagi kinyo nga kon mag-abot ro adlaw it paghukom, ro pina nga batunon ku mga indi ngato magbaton kinyo hay mas grabi pa sa pina it mga tagaSodoma.”

Ginpaandaman ni Jesus ro mga Pumueuyo it mga Banwa nga Owa Magtalikod sa Saea

¹³ Pagkatapos kato, naghambae si Jesus, “Makaeueuoy kamo nga mga tagaCorazin ag mga tagaBetsaida, ay makangingidlis gid ro matabo kinyo sa ulihi tungod owa't-a kamo magtalikod sa inyong mga saea. Kon ginhimo ko't-a kunta sa Tiro ag Sidon ro mga milagro nga ginhimo ko iya kinyo hay kabuhay eo't-a sanda nga nagsuksuk it magaeas nga eambong, ag naglingkod sa abo bilang tanda ku andang pagtalikod sa saea.

¹⁴ Ngani kon mag-abot ro adlaw it paghukom, ro pina nga inyong dangaton hay mas grabi pa kaysa sa pina nga dangaton ku mga tagaTiro ag Sidon.

¹⁵ Ag kamo man nga mga tagaCapernaum, ayaw eon kamo magpaabot nga itue-og kamo sa eangit agod padunggan it Dyos, dahil idto gid kamo sa impyerno itagbong agod pinahan.”

¹⁶ Naghambae pa gid si Jesus sa anang mga sumueunod, “Ro nagapamati kinyo hay sa minatuod, ako't-a ro andang ginapamatian. Ro owa nagabaton kinyo hay sa minatuod, ako't-a ro andang owa ginabatuna, ag ro owa nagabaton kakon hay sa minatuod, ro Dyos 't-a nga nagpaadto iya kakon ro owa nanda ginabatuna.”

Nagbalik ro 72 ka Sumueunod nga Ginpapanaw ni Jesus

¹⁷ Pagkatapos ku andang misyon, nagbalik ro 72 nga ginpapanaw ni Jesus ag nalipay sanda it duro. Hambae nanda, “Ginuo, pati gali ro mga demonyo hay nagatuman kamon kon among suguon sa imong ngaean.”

¹⁸ Nagsabat si Jesus, “Hakita ko ngani si Satanas nga matsa kilat it dasig nga nahueog halin sa eangit.

¹⁹ Tandai ninyo ra. Gintaw-an ko eon kamo it gahom agod perdihon ro mga maeain nga espirito pareho it gatapak sa mga sawa ag tibaba. Perdihon ninyo ro tanan nga gahom ku aton nga kaaway nga si Satanas, ag owa gid it bisan ano nga sarang makahalit kinyo.

²⁰ Pero ayaw kamo it kalipay dahil nagatuman kinyo ro mga maeain nga espirito kundi magkalipay kamo dahil ro inyong ngaean hay ginlista eon it Dyos idto sa eangit.”

²¹ Ku rato man mismo nga oras, si Jesus hay ginpalipay it duro ku Espirito Santo ngani nagpangamuyo imaw, “Ama, ikaw nga Ginuo ku tanan sa eangit ag sa kalibutan, ginapasaeamatan ko ikaw tungod nga ginlipod nimo rondayang mga kamatuuran sa may mga tinun-an nga nagaeaom nga mga maaeam sanda, pero ginpahayag mo ra sa mga tawo nga mapainubuson ag naila magpaturo pareho it mga unga. Tama ring ginhimo ngaron, Ama. Ginhimo mo nga makaruyon ron dahil nakapalipay ron kimo.”

²² Pagkatapos ni Jesus it pangamuyo hay naghambae pa gid imaw, “Ro tanan-tanan hay gintugyan kakon ku akon nga Ama. Owa it nakakilaea it mayad kakon mageuwas sa akong Ama. Owa man it nakakilaea it mayad sa akong Ama kundi ako eang nga anang Unga ag ro bisan sin-o nga gusto nakon nga pakilaeahan kana kon mauno gid imaw.”

²³ Nagbalikid dayon imaw sa anang mga sumueunod ag naghambae it mahinay nga sanda eang ro makabati, “Bulahan kamo ay kita't-a ninyo makaron ro akong mga ginahimo.

²⁴ Ginahambae ko kinyo nga abo nga mga propeta it Dyos ag mga hari kato anay ro naghandom nga hikita ag hibatian ro inyong mga hakita ag habatian, pero owa gid ron nanda hakit-i ag habatii.”

Ro Istorya Parti sa Sangka Mabuot nga TagaSamaria

²⁵ Isaeang adlaw, may sangka maestro it Kasuguan nga gusto kunta nga testingan si Jesus. Nagtindog imaw ag nagpangutana kay Jesus. Hambae nana, “Maestro, ano ro akong obrahon agod makabaton it kabuhi nga owa it katapusan?”

²⁶ Nagsabat si Jesus, “Ano ro nasueat sa Kasuguan ay? Ano ro kahueugan karon kon kimo?”

²⁷ Nagsabat ro maestro, “Nasueat nga, ‘Higugmaa ro Ginuo nga imong Dyos sa bug-os nimong tagipusuon, sa bug-os nimong kabubut-on, sa bug-os nimong kusog ag sa bug-os nimong paino-ino.’ Nasueat man nga, ‘Higugmaa ro imong isigkatawo pareho ku paghigugma mo sa imong kaugalingon.’ ”

²⁸ Naghambae si Jesus kana, “Tama gid ro imong sabat ngaron. Tumana ron ag mabaton mo ro kabuhi nga owa it katapusan.”

²⁹ Pero gusto ku maestro it Kasuguan nga paguwaon nga tama nga pilion eang nana ro anang higugmaon ngani nagpangutana imaw kay Jesus, “Hay sin-o man abi ro akon nga isigkatawo nga dapat kong higugmaon?”

³⁰ Ginsabat imaw ni Jesus, “May isaeang ka tawo nga naghalin sa Jerusalem papanaog paadto sa Jerico. Gin-eambangan imaw it mga buyong, ginbuoe tanan ra daea pati ro anang ginasuksuk ag pagkatapos hay ginbakoe. Inaywanan dayon nanda imaw nga haeos owa it ginhawa.

³¹ Kon ano ma't-a nga nakaagi dikato ro sangka saserdote ag pagkakita nana sa tawo ngato hay naglikaw 't-a imaw.

³² May nahaagi man rikato nga isaeang ka Levita. Pagkakita nana sa tawo ngato hay naglikaw man imaw.

³³ Ku ulihi hay may sangka *Samaritano nga haagi man dikato, ag pagkakita nana sa ratong tawo hay naeuoy gid imaw it duro.

³⁴ Ana ra nga ginpaeapitan ag ginbueong it eana ag bino ro nina kara ag ginbugkusan. Pagkatapos hay ana ra nga ginpasakay sa ana mismong asno ag gindaea sa sangka baeay nga daeayunan, ag ana idto nga gindipara.

³⁵ Pagkaaga, gintaw-an nana ro tag-ana ku daeayunan it daywang ka pilak nga denaryo kon tawgon. Ana ra nga ginbilinan, ‘Diparaha gid ro tawo ngaron. Kon kueang pa ro akong gintao ngaron kimo hay bayran ta ugaling pagbalik ko iya.’ ”

³⁶ Ginpangutana dayon ni Jesus ro maestro it Kasuguan, “Kon kimo, sin-o sa tatlo ngato ro nagpakita it matuod nga paghigugma sa ratong tawo nga gin-eambangan it mga buyong?”

³⁷ Nagsabat ro maestro, “Tag ratong nagkaeuoy 't-a kana ron.” Naghambae si Jesus kana, “Kon mawron hay makaruyon man permi ro imong himuon.”

Dapat natong Paeabyon ro Pagpamati sa mga Ginaturo ni Jesus

³⁸ Nagpanaw sanday Jesus ag ro anang mga sumueunod ag nakaabot sanda sa sangka baryo. May tagaidto nga bayi nga si Marta ro anang ngaean nga nagkangay kanday Jesus nga magdayon sa andang baeay.

³⁹ May manghod si Marta nga si Maria ro anang ngaean. Nagpungko si Maria sa may siki ku Ginuo ag nagpinamati sa ana kara nga ginaturo.

⁴⁰ Pero si Marta ma't-a hay nagapangungumang eon sa anang grabi nga pagpreparar it pagkaon para kanday Jesus. Ngani nagpaeapit imaw kay Jesus ag naghambae, “Ginuo, ham-an it baliwala ea't-a kimo nga ginapabay-an ako ku akong manghod sa mga oeobrahon iya? Hambaea man abi imaw nga buligan man ako.”

⁴¹ Pero nagsabat ro Ginuo, “Abi gid-a si Marta ngara. Kon ano-ano't-a ro imong ginakabangtan ag ginapalitikan it ueo.

⁴² Pero sangka butang gid lang ro importanti ag ruyon ro ginpili ni Maria ag indi ko ron igdimot kana.”