Juan 9 - Inkeanon

Nagpamayad ni Jesus it Sangka Eaki nga Natawo nga Bulag

¹ Tag nagapanaw si Jesus hay may hakita imaw nga eaki nga bulag eagi pagkatawo.

² Nagpangutana dayon kay Jesus ro anang mga sumueunod, “*Rabbi, sin-o ro nagkasaea mawron nga natawo nga bulag ro tawo ngara? Imaw baea o ro anang mga ginikanan?”

³ Nagsabat si Jesus, “Ro anang pagkabulag hay bukon it dahil nagkasaea imaw o ro anang mga ginikanan kundi agod ikapakita ro gahom it Dyos sa pagpamayad kana.

⁴ Dapat naton nga obrahon ro ginapaobra ku nagpadaea iya kakon samtang adlaw pa, ag may aton pa nga kahigayunan. Kon madueom eon abi hay owa eon it makaobra karon.

⁵ Ako ro Iwag nga gatao it kahayag sa paino-ino it mga tawo iya sa kalibutan ag padayon ko sanda nga taw-an it kahayag samtang iya ako sa kalibutan.”

⁶ Pagkahambae nana karon hay nagpila imaw sa eugta, ag ana rato nga gin-obra nga eunang ag ginpalhit sa mata ku ratong eaki nga bulag.

⁷ Tapos ginhambae nana ro eaki, “Adto sa bubon nga Siloam kon tawgon ag magpanghilam-os ka idto.” (Ro kahueugan it Siloam hay “ginpaadto.”) Ngani nagpanaw ro eaki ngato, nagpanghilam-os ag bumalik nga nakakita eo't-a.

⁸ Ro anang mga kaeapit ag ro mga nakakita kana tag nagapakalimos anay imaw hay nagpaeangutan-an, “Bukon abi it raya tag nagalingkod sa binit it daean ag nagapinakalimos?”

⁹ Hambae ku iba, “Ay huo, imaw ron.” Pero ro iba ma't-a hay naghambae, “Bukon it imaw ron, basi kahitsura man lang ron nana.” Ngani naghambae ro eaki, “Ako ngani tag ratong nagapakalimos anay.”

¹⁰ Nagpangutana sanda, “Ay, makakita ka eo't-ing? Paalin ka't-ing nagmayad?”

¹¹ Nagsabat imaw, “Tag rato nga tawo nga ginahingadlan kay Jesus hay nag-obra it eunang ag ana dayon rato nga ginpalhit sa akong mata. Tapos ginpaadto dayon nana ako sa Siloam ag ginpapanghilam-os. Nag-adto ako idto ag nagpanghilam-os ag nakakita eo't-ang dayon.”

¹² Nagpangutana sanda, “Hay siin eon imaw?” Nagsabat ro eaki, “Tao ngani.”

Gin-usisa ku mga Pariseo Ratong Bulag nga Ginpamayad

¹³ Gindaea dayon ku mga tawo sa mga Pariseo rondato nga dating bulag nga nakakita eon.

¹⁴ Rato abi nga adlaw nga nag-obra si Jesus it eunang ag gin-gamit sa pagpamayad it mata ku ratong bulag hay Adlaw it Inogpahuway.

¹⁵ Tapos, ginpangutana man imaw ku mga Pariseo kon paalin imaw nagmayad. Nagsabat imaw, “Ana nga ginpalhitan it eunang ro akong mata. Nagpanghilam-os ako ag nakakita eon dayon ako.”

¹⁶ Ngani naghambae ro ibang Pariseo, “Ro nag-obra kara hay bukon it ginpadaea iya it Dyos, ay ginaeapas nana ro kasuguan parti sa Adlaw it Inogpahuway.” Pero ro iba ma't-a hay naghambae, “Huo ngani, pero makahimo baea ro makasasaea it mga milagrosong pamatuod nga makaraya?” Ngani owa sanda nagkaeasugot.

¹⁷ Pinangutana eon man ku mga Pariseo rondatong eaki, “Sinimo hay ginpamayad nana ro imong mata. Hay ano ro imong mahambae parti kana?” Nagsabat imaw, “Propeta't-a imaw.”

¹⁸ Pero ro mga manogdumaea ngato it mga Judio hay indi magpati nga bulag anay ro tawo ngato ag makakita eon. Ngani andang ginpasueang ro anang mga ginikanan.

¹⁹ Pag-abot ku mga ginikanan, ginpangutana dayon sanda, “Inyong unga ra? Matuod gid baea nga bulag eagi imaw pagkatawo nana? Ham-an it nakakita eon imaw?”

²⁰ Nagsabat ro mga ginikanan ku eaki, “Huo, unga ra namon ag matuod nga bulag ra imaw pagkatawo nana.

²¹ Pero kon parti sa anang pagmayad hay owa kami kasayod kon ano ro natabo kana ag kon sin-o ro nagpamayad kana. Imaw lang ro kutan-a ninyo ay may buot eon don ag kaantiguhan eon don magsabat.”

²² Duyon sinanda ay nahadlok sanda sa mga manogdumaea ngato tungod nagkaeasugot ro mga manogdumaea nga ro bisan sin-o nga magkilaea nga si Jesus ro Maneueuwas nga ginpromisa it Dyos hay indi eon pagpasudlon sa sinagoga.

²³ Mawron nga naghambae ro anang mga ginikanan nga imaw lang ro pangutan-on.

²⁴ Ginpasueang it uman ku mga Pariseo rondatong eaki. Pag-abot nana hay ginhambae nanda imaw, “Pagsumpa sa Dyos nga gasugid ka it matuod, ay sayod namon nga ro nagpamayad kimo hay makasasaea.”

²⁵ Nagsabat ro eaki, “Owa ako kasayod kon makasasaea imaw o bukon. Ro akon eang nga hasayran hay bulag anay ako pero makakita eon ako makaron.”

²⁶ Nagpangutana sanda kana, “Pero paalin nana ginpamayad ro imong mata? Gin-alin ka nana?”

²⁷ Nagsabat imaw, “Ginhambae ko eon ngani kinyo pero indi man kamo magpamati. Ham-an it gusto ninyo nga mabatian it uman? Matsa naila't-a kamo nga mangin sumueunod man nana ron!”

²⁸ Pagkabati kara nanda hay gintuya-tuya nanda imaw. Hambae nanda, “Makimo ay! Ikaw 't-a maton ro sumueunod ku tawo ngaron pero kami't-a hay ay Moises.

²⁹ Sayod kami nga halin sa Dyos ro mga ginhambae ni Moises, pero ro tawo ngaron hay owa namon masayri kon siin naghalin ro anang ginahambae.”

³⁰ Nagsabat ro eaki, “Aba, ibang klasi't-a! Owa kamo kasayod kon siin naghalin ro anang ginahambae pero ana't-a nga ginpamayad ro akong mata!

³¹ Sayod naton nga ro Dyos hay owa nagasabat sa pangamuyo it makasasaea pero ro anang ginapamatian hay ro nagasimba kana nga may pagtahod ag gatuman sa anang pagbuot.

³² Umpisa ku pagtuga it kalibutan hay owa pa gid it ginbalita nga may nakapamayad it natawo nga bulag.

³³ Kon bukon it halin sa Dyos ro tawo ngara hay indi't-a imaw makahimo it makaraya.”

³⁴ Naghambae dayon ro mga Pariseo, “Matsa sin-o ka gid a! Halin pa ku pagbugtaw mo sa kalibutan hay nagapinakasaea ka eon, tapos imo pa kami nga tud-an?” Indi eon nanda imaw pagpasudlon sa sinagoga.

Ro Owa Nagatuo kay Jesus hay Pareho it Bulag

³⁵ Pagkabati ni Jesus nga indi eon nanda pagpasudlon sa sinagoga ro eaki ngato hay ana ra nga gin-usoy. Pagkakita kana ni Jesus hay ginhambae ra nana, “Nagatuo ka baea sa Unga it Tawo?”

³⁶ Nagsabat ro eaki, “Sir, sugiri abi ako kon sin-o imaw agod magatuo ako kana.”

³⁷ “Hakita eon nimo imaw ag imaw rayang nagapakighambae kimo,” sabat ni Jesus.

³⁸ Naghambae dayon ro eaki, “Gatuo ako kimo, Ginuo.” Pagkatapos, nageuhod imaw sa atubang ni Jesus sa pagsimba kana.

³⁹ Naghambae si Jesus, “Nag-adto ako iya sa kalibutan agod ipaeain ro mga nagatuo kakon sa mga owa nagatuo. Ro mga nagaako nga kueang ro andang pagkaeubot sa plano it Dyos hay buligan ko nga makaeubot. Pero ro mga owa nagaako nga kueang ro andang pagkaeubot karon hay mas kapin pa nga padueumon ko ro andang paino-ino agod indi sanda tapat makaeubot.”

⁴⁰ May mga Pariseo idto ag habatian nanda ro ginhambae ngara ni Jesus ngani naghambae sanda, “Ano ring eaom, kueang ro among pagkaeubot sa plano it Dyos ay?”

⁴¹ Nagsabat si Jesus, “Kon gaako eang kunta kamo nga kueang ro inyong pagkaeubot karon hay mahimo pa nga patawaron ro inyong mga saea. Ugaling sininyo abi hay nakaeubot kamo it husto ag indi eon kamo magpaturo, ngani indi gid pagpatawaron ro inyong mga saea.”