Juan 6 - Inkeanon

Ginpakaon ni Jesus ro Sobrang Limang Libo Paagi sa Anang Gahom

¹ Ku ulihi, nagtabok sanday Jesus sa *Dagat it Galilea nga ginatawag man nga Dagat it Tiberias.

² Kaabo-abo nga tawo ro nagsinunod kana ay hakita abi nanda ro mga milagrosong pamatuod nga anang ginaobra sa pagpamayad it mga masakiton.

³ Pagkapanaog ni Jesus sa baroto hay nagsaka imaw sa bukid nga maeapit idto, kaibahan ro anang mga sumueunod, ag nagpungko sanda idto.

⁴ Madali lang kato ro pagtililipon it mga Judio nga kon tawgon hay Pagdumdum ku *Pagtaliwan.

⁵ Pagtan-aw ni Jesus, nakita nana ratong kaabo-abo nga tawo nga nagsinunod kanda nga nagapaadto eon kanda. Naghambae imaw kay Felipe, “Siin baea kita mabakae it pagkaon para sa mga tawo ngara ay?”

⁶ Sayod eon ni Jesus kon ano ro anang obrahon, pero naghambae imaw kato agod testingan si Felipe.

⁷ Nagsabat si Felipe, “Bisan waeong buean nga sweldo it sangka trabahador hay indi mag-igo nga ibakae it tinapay agod maghilisamit sanda, bisan tig sangkiri.”

⁸ Tapos, isaea sa mga sumueunod ni Jesus nga si Andres nga igmanghod ni Simon Pedro hay naghambae,

⁹ “May iya nga sangka unga nga eaki nga may baeon nga limang ka sebada nga tinapay ag daywang ka isda. Pero paalin ra makaigo sa kaabuon ku mga tawo ngara?”

¹⁰ Naghambae dayon si Jesus, “Papungkua ninyo ro mga tawo.” Madamoe ro hilamunon sa lugar ngato, ngani nagpungko ro tanan ngato nga mga tawo, ag ro kaabuon ku mga eaki nga idto hay mga limang libo.

¹¹ Ginbuoe dayon ni Jesus ratong tinapay ag nagpasaeamat sa Dyos. Ana dayon rato nga ginpapanueupod sa mga nagapueungko ngato. Makarato man ro anang gin-obra sa isda ag nagkaon sanda hasta nagkaeabusog.

¹² Tag busog eon sanda tanan, ginhambae ni Jesus ro anang mga sumueunod, “Tipuna ninyo ro mga habilin ngaron agod owa it amulit.”

¹³ Ngani gintipon nanda ro habilin ku limang ka tinapay ngato ag nakapuno sanda it dose nga ka kaing.

¹⁴ Pagkakita ku mga tawo ku milagrosong pamatuod nga ginhimo ni Jesus, naghambae sanda, “Imaw eon gid-a ra ro propeta nga ginpromisa it Dyos nga paadtunon iya sa kalibutan.”

¹⁵ Hasayran ni Jesus nga gusto ku mga tawo nga hawiran imaw ag piliton nga mangin hari nanda, ngani pumanaw imaw nga isaea ag sumaka it uman sa bukid.

Nagtikang si Jesus sa Ibabaw it Tubi

¹⁶ Tag nagasalikaeom eon, nag-adto sa baybay ro mga sumueunod ni Jesus

^17-18 ag nagsakay sa baroto ag nagpanaw patabok sa Capernaum. Tag gabii eon, nagbaskog gid ro hangin ag nageagko ro humbak, ag owa't-a gihapon si Jesus nakaapas kanda.

¹⁹ Tag mga lima o an-om nga kilometro eon ro andang pagbinugsay, hakita nanda si Jesus nga nagatikang sa ibabaw it tubi, ag nagapaeangop sa andang baroto ag hinadlukan sanda it duro.

²⁰ Pero naghambae si Jesus kanda, “Ako ra, ayaw kamo it kahadlok.”

²¹ Pagkabati nanda kato hay owa eon sanda nag-isaea-daywa nga pasakyon imaw sa baroto. Ag gulpi ea't-a nga nakaabot eagi sanda sa andang ginaadtunan.

Si Jesus ro Minatuod nga Pagkaon nga Nagatao it Kabuhi

²² Pagkaaga kato, ro kaabo nga tawo nga ginpakaon ni Jesus sa tabok it dagat hay nag-usoy kana. Sayod abi nanda nga sambilog man lang ro baroto kabii idto sa baybay, ag owa rikato si Jesus nagsakay kaibahan ku anang mga sumueunod kundi nagpanaw sanda nga sanda eang.

²³ May iba dayon nga mga baroto nga halin sa Tiberias nga nag-abot ag nagdungka maeapit sa lugar ngato kon siin man sanda ginpakaon ni Jesus it pagkaon nga anang ginpasaeamatan.

²⁴ Ngani pagkasayod ku mga tawo nga owa idto si Jesus, pati ro anang mga sumueunod hay nagsakay sanda sa mga baroto ngato ag nagpaCapernaum agod usuyon si Jesus.

²⁵ Pagkakita ku mga tawo ngato kay Jesus idto sa tabok hay ginpangutana nanda imaw, “*Rabbi, kan-o ka pa iya nag-abot ay?”

²⁶ Nagsabat si Jesus, “Matuod gid rang ginahambae kinyo nga ginausoy ninyo ako bukon it dahil haeubtan ninyo ro kahueugan it mga milagrosong pamatuod nga hakita ninyo, kundi dahil nagkaeabusog kamo ku tinapay nga ginpakaon ko kinyo.

²⁷ Ayaw kamo magkinabudlay para sa pagkaon nga nagakaban-os eang kundi para sa minatuod nga pagkaon nga nagadurar ag nagatao it kabuhi nga owa it katapusan. Raya ro pagkaon nga itao ko kinyo tungod ako nga Unga it Tawo ro ginbutang ku Dyos Ama nga anang tigeawas nga magtao karon.”

²⁸ Ngani ginpangutana nanda imaw, “Hay maalin kami agod maobra namon ro mga oeobrahon nga ginapangayo it Dyos?”

²⁹ Ginsabat sanda ni Jesus, “Ro ginapangayo it Dyos nga obrahon ninyo hay tuuhan ninyo ako nga anang ginpadaea iya.”

³⁰ Pinangutana nanda dayon imaw, “Hay ano nga milagrosong pamatuod ro imong ipakita kamon agod magtuo kami kimo? Maalin ka man

³¹ ay kato't-a hay ginpakaon ni Moises it manna ro atong mga kalolo-lolohan idto sa *disyerto. Ginsueat ngani sa Sagrado nga Kasueatan nga, ‘Gintaw-an nana sanda it pagkaon nga halin sa eangit.’ ”

³² Nagsabat si Jesus, “Matuod gid rang ginahambae kinyo nga bukon 't-a it si Moises ro nagtao it pagkaon ngato nga halin sa eangit kundi ro akon nga Ama. Ag ro anang ginatao makaron kinyo hay bukon it manna kundi ro minatuod nga pagkaon halin sa eangit.

³³ Ag ro minatuod nga pagkaon ngara nga ginatao it Dyos hay ro naghalin sa eangit ag nagatao it matuod nga kabuhi sa mga tawo iya sa kalibutan.”

³⁴ Tapos, naghambae sanda, “Sir, taw-i abi kami permi ku ruyon nga pagkaon.”

³⁵ Nagsabat si Jesus, “Ako't-a ro pagkaon nga nagatao it minatuod nga kabuhi. Ro bisan sin-o nga gadangop kakon hay indi eon paggutumon bisan hasta hin-uno ag ro bisan sin-o nga gatuo kakon hay indi eon pag-uhawon it uman.

³⁶ Pero bisan hakita eon ninyo ako hay owa man gihapon kamo gatuo kakon ag ginhambaean ko eon kamo karon.

³⁷ Tanan nga tawo nga gintugyan kakon it Ama hay magadangop kakon. Ag ro bisan sin-o nga magdangop kakon hay indi ko gid pagbalibaran,

³⁸ tungod nanaog ako iya halin sa eangit agod tumanon ro pagbuot ku nagpadaea iya kakon, bukon it ro akong pagbuot.

³⁹ Ag ro pagbuot ku nagpadaea iya kakon hay raya, nga indi ko gid hiduea ro bisan sambilog sa anang gintugyan kakon kundi banhawon ko sanda sa katapusan nga adlaw.

⁴⁰ Raya ro pagbuot ku akon nga Ama, nga ro tanan nga nagakilaea ag nagatuo kakon nga anang Unga hay may kabuhi nga owa it katapusan. Ag banhawon ko sanda sa katapusan nga adlaw.”

⁴¹ Nagkilinumod ro mga Judio kuntra kay Jesus ay naghambae imaw nga imaw ro minatuod nga pagkaon nga naghalin sa eangit.

⁴² Hambae nanda, “Bukon abi it si Jesus ra nga unga ni Jose? Kilaea gid naton ro anang mga ginikanan kara a, tapos mahambae 't-a imaw nga naghalin imaw sa eangit!”

⁴³ Ginsabat sanda ni Jesus, “Ayaw kamo it kinumod.

⁴⁴ Owa it makatuo kakon kon indi imaw pagtaw-an it kabubut-on nga himuon ron ku akon nga Ama nga nagpadaea iya kakon. Tapos, banhawon ko imaw sa katapusan nga adlaw.

⁴⁵ Nasueat sa kasueatan it mga propeta kato anay nga, ‘Ro tanan nga tawo hay tud-an it Dyos.’ Ngani ro tanan nga nagpamati sa akon nga Ama ag nakaeubot sa anang ginhambae hay nagatuo kakon.

⁴⁶ Pero owa ako gahambae nga may nakakita sa Dyos Ama mismo dahil owa gid it nakakita kana mageuwas eang kakon nga naghalin idto kana. Ako eang gid ro nakakita sa Ama.

⁴⁷ Matuod gid rang ginahambae kinyo nga ro bisan sin-o nga nagatuo kakon hay may ana eon nga kabuhi nga owa it katapusan.

⁴⁸ Ako ro pagkaon nga nagatao it minatuod nga kabuhi.

⁴⁹ Bisan nagkaon ro inyong mga kalolo-lolohan ku ratong pagkaon nga manna idto sa *disyerto hay nagkaeamatay man gihapon sanda.

⁵⁰ Pero iya kinyo ro pagkaon nga halin sa eangit agod makaon it bisan sin-o ag ro makakaon kara hay indi makaagi it kamatayon.

⁵¹ Ako nga naghalin sa eangit rondayang pagkaon nga nagatao it minatuod nga kabuhi. Ag ro magakaon ku pagkaon ngara hay magakabuhi hasta sa owa it katapusan. Ag ro pagkaon ngani ngara nga itao nakon sa mga tawo sa kalibutan agod magakabuhi sanda hay ro akon nga eawas.”

⁵² Pagkabati kara ku mga Judio hay nagbinais sanda ag nagpaeangutan-an, “Paalin ikatao ku tawo ngara ro anang eawas agod atong kan-on?”

⁵³ Ngani naghambae si Jesus kanda, “Matuod gid rang ginahambae kinyo nga kon indi ninyo pagkan-on ro eawas nakon nga Unga it Tawo, ag kon indi ninyo pag-imnon ro akon nga dugo hay owa kamo it kabuhi nga owa it katapusan.

⁵⁴ Ro gakaon ku akon nga eawas ag ro gainom ku akon nga dugo hay may kabuhi nga owa it katapusan ag banhawon ko imaw sa katapusan nga adlaw,

⁵⁵ tungod ro akong eawas ro minatuod nga pagkaon ag ro akong dugo ro minatuod nga ilimnon.

⁵⁶ Ngani ro magakaon ku akon nga eawas ag magainom ku akon nga dugo hay magapadayon sa anang maeueot nga kaangtanan kakon ag makaruyon man ro akong kaangtanan kana.

⁵⁷ Ginpadaea ako iya ku akong Ama nga ginahalinan it kabuhi, ag kon mauno nagakabuhi ako dahil kana, makaruyon man ro nagakaon kakon hay magakabuhi man dahil kakon.

⁵⁸ “Ako ro minatuod nga pagkaon nga naghalin sa eangit nga bukon it pareho ku pagkaon nga ginkaon kato ku atong mga kalolo-lolohan. Bisan ginkaon nanda rato hay nagkaeamatay man gihapon sanda. Pero ro nagakaon ku raya nga minatuod nga pagkaon hay magakabuhi hasta sa owa it katapusan.”

⁵⁹ Ro mga raya ngara hay ginhambae ni Jesus tag nagaturo imaw sa *sinagoga idto sa Capernaum.

Abo nga mga Sumueunod ro Nag-ayaw kay Jesus Pero ro Iba ma't-a hay Nagpadayon sa Pagsunod Kana

⁶⁰ Pagkabati ku mga nagasinunod kay Jesus ku ana ngatong ginturo hay abo kanda ro naghambae, “Grabi gid-a ro anang ginahambae ngaron. Sin-o man abi karon ro makabaton?”

⁶¹ Bisan owa it nagsugid kay Jesus hay sayod gihapon nana nga nagakilinumod sanda parti kara, ngani ginhambae nana sanda, “Hay matalikod eon baea kamo sa inyong pagtuo kakon dahil sa akon ngarang ginhambae?

⁶² Paalin abi kon hikita ninyo ako nga Unga it Tawo nga magakayab sa eangit nga akong ginhalinan?

⁶³ Ro Espirito Santo ro gatao it kabuhi. Indi gid ra mahimo paagi sa ikasarang o pagtinguha it tawo. Ro akong ginhambae kinyo hay halin sa Espirito Santo, ag raya ro makatao kinyo it kabuhi nga owa it katapusan.

⁶⁴ Pero may una gihapon kinyo nga owa nagatuo kakon.” Ginhambae ron ni Jesus ay halin pa kato hay sayod eagi imaw kon sin-o ro mga owa nagatuo kana, ag kon sin-o ro magatraidor kana.

⁶⁵ Naghambae pa gid si Jesus, “Mawron ngani nga ginhambae ko kinyo nga owa it makatuo kakon kon indi imaw pagtaw-an ku Dyos Ama it kabubut-on nga himuon ron.”

⁶⁶ Halin kato, abo sa mga nagasinunod ngato kana ro nagtalikod ag owa eon magsunod-sunod.

⁶⁷ Ngani ginhambae nana ro anang dose nga ka sumueunod, “Hay kamo? Indi ma't-a kamo magtalikod kakon no?”

⁶⁸ Nagsabat si Simon Pedro, “Ginuo, kanyo pa abi kami maadto? Ikaw eang ro nagaturo it mensahi nga nagatao it kabuhi nga owa it katapusan.

⁶⁹ Ag kami't-a hay nagtuo kimo ag sigurado gid kami nga ikaw ro Balaan nga ginpadaea iya it Dyos.”

⁷⁰ Naghambae dayon si Jesus, “Bukon abi nga ako't-a ro nagpili kinyo nga dose? Pero ro sambilog kinyo hay ulipon ni Satanas.”

⁷¹ Ro ginapatungdan kato ni Jesus hay si Judas nga unga ni Simon Iscariote, dahil imaw ra ro magatraidor kay Jesus sa ulihi, bisan isaea ra imaw sa dose nana nga ka sumueunod.