Juan 4 - Inkeanon

Ro Bayi nga TagaSamaria nga Nakahambae ni Jesus sa Bubon

¹ Ro mga Pariseo hay nakabalita nga ro ay Jesus nga ginakumbinsi nga mangin anang mga sumueunod hay mas nagainabo pati ro anang ginabawtismuhan kaysa sa ay Juan.

² (Pero ro minatuod hay bukon it si Jesus ro nagapangbawtismo kundi ro anang 12 nga haunang mga sumueunod.)

³ Ngani pagkasayod ni Jesus nga nakabalita karon ro mga Pariseo hay naghalin imaw sa Judea ag nagbalik sa Galilea, kaibahan ro anang mga sumueunod.

⁴ Sa andang pagpamanawon pabalik hay sayod ni Jesus nga importanti't-a nga mag-agi sanda sa probinsya it Samaria.

⁵ Tag idto eon sanda sa Samaria, nakaabot sanda sa banwa it Sicar nga maeapit sa eugta nga ginpapanubli anay ni Jacob sa anang unga nga si Jose.

⁶ Ag idto man rikato ro bubon nga ginpaobra anay ni Jacob. Mga ika-6 nga oras eon rato ag gin-gaoy gid si Jesus sa andang pagpinanaw, ngani nagpungko imaw sa may bubon.

⁷ Tapos, may bayi nga Samaritanhon nga nag-abot agod magsag-ob. Naghambae kana si Jesus, “Taw-i abi ako, Nang, it tubi.”

⁸ Owa eon kato idto ro mga sumueunod ni Jesus, ay nagpanaw sa banwa agod magbakae it andang makaon.

⁹ Hakibot ro bayi sa ginhambae ni Jesus ngani sinana ku bayi, “Ha? Judio ka't-ing, tapos mangayo ka it tubi kakon nga Samaritanhon, ag bayi pa!” (Ruyon sinana ku bayi ay indi maggamit ro mga Judio ku ilimnan o kaean-an nga hagamit eon ku mga Samaritanhon.)

¹⁰ Nagsabat si Jesus, “Kon hasayran mo eang kunta kon mauno ro regalo nga gustong itao kimo it Dyos, ag kon sayod ka kunta kon sin-o ako nga nagapangayo kimo it tubi hay ikaw 't-a ro mangayo kakon ag ro akong itao kimo hay tubi nga nagatao it kabuhi nga owa't katapusan.”

¹¹ Nagpangutana ro bayi, “Sir, owa ka't-ing it timba ag kadaeom 't-a ro bubon ngara. Hay siin ka mabuoe it tubi ngaron nga nagatao it kabuhi?

¹² Ginpapanubli kamon ku aton anay nga lolo nga si Jacob ro bubon ngara. Siin ka man mabuoe it tubi nga mas manami pa kaysa sa tubi nga anang gin-inom nga halin sa rayang bubon, ag gin-inom man ku anang mga unga ag pati ku anang mga kasapatan? Hay mas ka pa't-ing kaysa kana ay?”

¹³ Pero nagsabat si Jesus, “Ro nagainom it tubi sa bubon ngara hay uhawon it uman.

¹⁴ Pero ro nagainom it tubi nga akon nga ginatao hay indi eon gid pag-uhawon it uman bisan hasta hin-uno tungod ruyon hay mangin pareho it tuburan nga nagabusawak gid sa ana nga kabuhi ag magatao kana it kabuhi nga owa it katapusan.”

¹⁵ Naghambae ro bayi, “Sir, taw-i abi ako ku tubi ngaron nga ginahambae nimo, agod indi eon ako pag-uhawon it uman ag agod indi eon ako magbinalik-balik it pagsinag-ob iya.”

¹⁶ Ginhambae dayon ni Jesus ro bayi, “Sueanga anay rito ro imong asawa ag daehon iya.”

¹⁷ Nagsabat imaw, “Pero owa ako it asawa.” Sumabat si Jesus, “Matuod ro imong hambae ngaron nga owa ka it asawa.

¹⁸ Limang beses ka eon abi nga nag-asawa ag ro eaki nga imong ginakabuhi makaron hay bukon mo man it asawa. Matuod gid ma't-a ro imong ginhambae.”

¹⁹ Naghambae dayon ro bayi, “Sir, propeta ka't-ing gali.

²⁰ Iya sa bukid ngara kato nagsimba sa Dyos ro atong mga kalolo-lolohan, pero kon kinyo nga mga Judio hay sa Jerusalem eang ro lugar kon siin dapat magsimba.”

²¹ Nagsabat si Jesus, “Patihi ro akong ginahambae ngara kimo, Nang. Maabot ro oras nga bukon eon it importanti kon iya sa bukid ngara o sa Jerusalem magsimba sa Dyos Ama ro mga tawo.

²² Kamong mga Samaritanhon hay nagasimba sa owa ninyo hakilaea, pero kaming mga Judio hay kilaea namon ro among ginasimba dahil ro Maneueuwas hay halin sa linahi it mga Judio.

²³ Pero maabot ro oras ag makaron eon ngani ron, nga ro pagsimba ku mga tawo sa Dyos Ama hay sa bug-os nandang tagipusuon ag kabubut-on ag nabase sa kamatuuran halin kana. Makaruyon abi nga klasi it pagsimba ro anang ginausoy sa mga tawo.

²⁴ Espirito't-a ro Dyos ag owa it eawas ngani ro mga nagasimba kana hay kinahangean nga magsimba kana sa bug-os nandang tagipusuon ag kabubut-on, ag nabase sa kamatuuran halin kana.”

²⁵ Naghambae dayon ro bayi, “Sayod ako nga ro Mesias hay magaabot (nga ginatawag man nga Kristo, ro Maneueuwas nga ginpromisa it Dyos) ag pag-abot nana hay ana katon nga ipaathag ro tanan-tanan nga butang.”

²⁶ Nagsabat kana si Jesus, “Ako nga nagapakighambae kimo ro imo ngarong ginapaabot.”

²⁷ Tag nagahambae pa si Jesus hay nag-abot ro anang mga sumueunod. Hangawa gid sanda ay nagaistorya imaw sa isaeang ka bayi. Pero owa gid kanda it nagpangutana kon gaalin ro bayi ngato, ag kon ham-an it nagaistorya kara kana si Jesus.

²⁸ Pagkatapos, inaywanan ku bayi ro anang banga ag nagbalik sa banwa. Pag-abot idto, hambae nana sa mga tawo,

²⁹ “Musyon kamo! Adtunan naton ro tawo nga naghambae kakon ku tanan nakong ginpang-obra. Bukon man siguro it imaw ro Maneueuwas nga ginpromisa it Dyos pero imaw lang kunta, no?”

³⁰ Ngani gumuwa sanda sa banwa ag umadto kon siin si Jesus.

³¹ Idto ma't-a sa may bubon, ginahinambae si Jesus ku anang mga sumueunod, “*Rabbi, kaon eon.”

³² Pero nagsabat imaw, “May akon 't-a nga pagkaon nga owa ninyo masayri.”

³³ Sinanda dayon ku anang mga sumueunod sa kada isaea, “Sin-o man abi kana iya ro madaea it pagkaon?”

³⁴ Naghambae si Jesus kanda, “Ro akong pagkaon hay ro pagtuman ku kabubut-on ku nagpadaea iya kakon ag ro pagtapos ku anang ginapaobra kakon.

³⁵ Bukon abi it may hambaeunon kamo nga ‘ap-at nga buean bago makaani’? Pero ginahambae ko kinyo nga tig-aeani eon kon tawo't-a ro aeanihon. Ngani umpisa makaron, kon makakita kamo it mga tawo, bilanga ninyo sanda nga pareho it aeanyon nga haom eon anihon.

³⁶ Ro nagaani kanda hay ginabaeusan it Dyos, ag sanda nga ginaani hay taw-an it kabuhi nga owa it katapusan. Ngani ro nagtanom ku mensahi it Dyos ag ro nagaani hay magkaibahan nga magakalipay.

³⁷ Kon mawron, matuod gid ro hambaeunon nga ‘eain ro gatanom ag eain man ro gaani.’

³⁸ Ginpapanaw ko kamo agod anihon ro owa ninyo pagkabudlayi. Iba karon ro nagkabudlay ag kamo ro magaani ku andang kinabudlayan.”

³⁹ Abo nga mga Samaritanhon nga tagaidto sa banwa ngato ro nagtuo kay Jesus dahil sa ginhambae ku rato nga bayi nga ginhambae mana nana kakon ro tanan nakong ginpang-obra.

⁴⁰ Ngani pag-abot nanda kay Jesus hay ginhinawiran nanda imaw nga magtenir anay sa andang lugar. Ngani nagtenir imaw idto it daywang adlaw

⁴¹ ag abo pa gid ro nagtuo kana dahil sa anang pagturo.

⁴² Hambae ku mga tawo sa bayi ngato, “Gatuo eon kami makaron bukon eang it dahil sa imong ginsugid, kundi dahil habatian namon mismo ro anang hambae. Ngani sigurado eon kami nga imaw matuod ro Maneueuwas it mga tawo sa bilog nga kalibutan.”

Ginpamayad ni Jesus ro Unga it Sangka Opisyal

⁴³ Pagkataliwan it daywang adlaw ngato, nagpadayon sanday Jesus sa andang pagpamanawon pabalik sa probinsya it Galilea.

⁴⁴ Nag-adto imaw idto bisan imaw mismo ro naghambae nga ro propeta hay owa ginapadunggi sa ana mismong nasyon.

⁴⁵ Pag-abot nanda sa Galilea hay gin-abi-abi gid imaw ku mga tagaidto, dahil hakita nanda ro tanan nanang gin-obra sa Jerusalem pag-adto nanda sa Pagtililipon sa Pagdumdum ku *Pagtaliwan.

⁴⁶ Samtang idto si Jesus sa Galilea hay nag-adto imaw it uman sa Cana kon siin ginhimo nana kato nga bino ro tubi. Idto sa banwa it Capernaum nga sakop man ku probinsya it Galilea hay may opisyal it gobyerno nga may unga nga eaki nga nagamasakit.

⁴⁷ Habatian ku opisyal ngato nga nag-abot si Jesus sa Galilea halin sa Judea ngani ana ra nga gin-adtunan. Pag-abot idto hay nagpakitluoy imaw kay Jesus nga mag-adto sa anda ag pamayron ro anang unga nga nagatagumatayon.

⁴⁸ Pero naghambae si Jesus kana, “Indi gid-a kamo magtuo kakon kon indi ninyo ako hikita nga mag-obra it makangawa-ngawa nga milagroso nga pamatuod.”

⁴⁹ Nagsabat ro opisyal, “Sir, musyon bago mamatay ro akong unga.”

⁵⁰ Naghambae kana si Jesus, “Uli eon ay mayad eon ro imong unga.” Nagpati ro opisyal sa ginhambae ni Jesus ag umuli dayon imaw.

⁵¹ Pagkamasunod nga adlaw, tag nagapaeusob pa eang imaw paadto sa Capernaum hay ginsueang-sueang imaw ku anang mga ulipon ag ginsugiran nga mayad eo't-a ro anang unga.

⁵² Nangutana dayon kanda ro opisyal kon kan-o imaw nagmayad. Hambae nanda, “Gulpi eang naduea ro anang eagnat kahapon ku ika-7 nga oras.”

⁵³ Dikato hasayri ku opisyal nga nagmayad ro anang unga ku oras ngato mismo nga naghambae si Jesus nga “Mayad eon ro imong unga.” Ngani nagtuo imaw kay Jesus, pati ro anang bilog nga panimaeay.

⁵⁴ Raya ro pangaywa nga milagroso nga pamatuod nga gin-obra ni Jesus sa Galilea. Gin-obra ra nana ku pangaywa nanang pagbalik sa Galilea halin sa Judea.