Juan 21 - Inkeanon

Nagpakita si Jesus sa Anang mga Sumueunod sa Galilea

¹ Pagkataliwan it pilang adlaw, nagpakita it uman si Jesus sa anang mga sumueunod sa Dagat it Tiberias. Makara ro natabo:

² Nagtililipon sanday Simon Pedro, Tomas nga Kapid ro hayo, Nataniel nga tagaCana sa Galilea, ro daywang ka unga ni Zebedeo ag ro daywa pa gid ku ay Jesus nga mga sumueunod.

³ Naghambae si Simon Pedro kanda, “Mangisda ako.” “Mamunot kami kimo,” sabat nanda. Ngani nagsakay sanda sa baroto ag nagpangisda, pero owa sanda it dakop sa bilog nga sang gabii.

⁴ Tag mahayag eon, idto si Jesus nagatindog sa baybay, pero owa kana kakilaea ro anang mga sumueunod.

⁵ Nagsinggit imaw kanda, “Migs, owa't-a kamo it hadakpan ay?” “Owa gid ngani,” sabat nanda.

⁶ Naghambae kanda si Jesus, “Taktakan ro inyong lambat sa tuo it baroto ag makadakop gid kamo.” Ngani gintaktak nanda ro andang lambat, ag kaabo-abo nga isda ro andang hadakpan nga indi eon nanda masarangan batakon ro lambat pasueod sa baroto.

⁷ Ngani ro sumueunod nga palangga ni Jesus hay naghambae kay Pedro, “Ro Ginuo't-a ron!” Pagkabati ni Simon Pedro nga ro Ginuo rato hay sinuksuk nana ro eambong nga anang inuba, ag eumumpat dayon imaw sa tubi, ag nageangoy pabinit.

⁸ Ginpabinit ku ibang mga sumueunod ro baroto ag anda lang nga ginpaguyod kara ro lambat nga puno it isda. Mga 100 metros lang ro andang kaeayo sa binit.

⁹ Kat nakatakas eon sanda, hakita nanda nga may idto nga baga ag may ginaihaw nga isda ag may idto man nga tinapay.

¹⁰ Ginhambae sanda ni Jesus, “Daea kamo iya it pilang bilog ku inyong dakop.”

¹¹ Ngani sumaka si Pedro sa baroto ag ginhubad ro lambat nga puno it daeagko nga isda, ag ginbira patakas. 153 bilog tanan ro isda nga sueod ku lambat, pero bisan makarato it abo ro isda hay owa nagisi ro lambat.

¹² Tapos, ginhambae sanda ni Jesus, “Maliya eon, pamahaw eon kamo.” Owa gid it nagpasamang-samang nga magpangutana kana kon sin-o imaw ay sayod eon nanda nga ro Ginuo rato.

¹³ Ginbuoe dayon ni Jesus ro tinapay ag isda ag gintao kanda.

¹⁴ Rato ro ikatatlong beses nga nagpakita si Jesus sa anang mga sumueunod halin nga nabanhaw imaw.

Ginbalik ni Jesus si Pedro Bilang Manogtatap ku Anang Katawhan Bisan Ginpanghiwaea Imaw Kara it Tatlong Beses

¹⁵ Pagkakaon nanda, ginpangutana ni Jesus si Simon Pedro, “Simon, unga ni Juan, ginahigugma mo baea ako mas pa ku paghigugma kakon ku mga kaibahan mo ngara?” Nagsabat si Pedro, “Huo, Ginuo, ikaw mismo ro nakasayod nga ginahigugma ko ikaw.” Naghambae si Jesus kana, “Kon mawron hay tatapa gid ro akong mga katawhan nga matsa mga tiyo it karnero.”

¹⁶ Pinangutana eon man imaw ni Jesus, “Simon, unga ni Juan, ginahigugma mo baea ako?” “Huo, Ginuo, ikaw mismo ro nakasayod nga ginahigugma ko ikaw,” sabat ni Pedro. “Kon mawron, tatapa gid ro akong mga katawhan nga matsa panong it karnero,” hambae ni Jesus.

¹⁷ Pinangutana ni Jesus it ikatatlong beses si Pedro, “Simon, unga ni Juan, ginahigugma mo baea ako?” Pagkabati kara ni Pedro hay nagsakit ro anang buot ay tatlong beses eon nga ginpangutana imaw ni Jesus kon ginahigugma nana ra. Tapos, nagsabat si Pedro, “Ginuo, sayod mo ro tanan ag ikaw mismo ro nakasayod nga ginahigugma ko ikaw.” “Kon mawron, tatapa gid ro akong mga katawhan nga matsa panong it karnero,” hambae ni Jesus.

¹⁸ Hambae pa gid ni Jesus kana, “Pedro, kat bata ka pa hay ikaw 't-a ro gapahaom kon gapanaw ka ag pagusto ka man kon siin maadto. Pero matuod gid rang ginahambae kimo nga kon maggueang ka eon hay alsahon mo ro imong mga alima, ag may gahigot it kaeat sa imong eawas ag daehon ka sa kon siin owa ka naila mag-adto.”

¹⁹ Ro ginhambae ngara ni Jesus hay gapakilaea kon paano si Pedro mamatay, ag paagi karon hay mapadunggan na ro Dyos. Tapos ginhambae imaw ni Jesus, “Padayuna ro imong pagsunod kakon bilang masaligan nga sumueunod.”

²⁰ Nag-adwing si Pedro ag hakita nana ro sumueunod nga palangga ni Jesus nga nagasunod kanda. Imaw ro sumueunod nga nagsandiay sa dughan ni Jesus ku gabii ngato nga gakaon sanda ag nagpangutana kon sin-o kanda ro magatraidor kana.

²¹ Pagkakita ni Pedro sa ratong sumueunod hay nagpangutana imaw kay Jesus, “Ginuo, hay imaw, ano man ro matabo kana?”

²² Nagsabat si Jesus, “Kon gusto ko nga buhi ron imaw gihapon hasta sa akong pagbalik hay owa ka eo't-ing it eabot karon. Ro imong dapat isipon hay ro imong pagsunod kakon.”

²³ Dahil sa ginhambae ngaron ni Jesus hay may naglibot dayon nga istorya sa mga sumueunod nga indi mamatay ratong sumueunod. Pero owa si Jesus maghambae nga indi imaw mamatay, kundi ro anang hambae ea't-a hay “Kon gusto ko nga buhi ron imaw gihapon hasta sa akong pagbalik hay owa ka eo't-ing it eabot karon.”

Ro Katapusan nga mga Bisaea ni Juan sa Anang Sueat Ngara

²⁴ Ako ro sumueunod ngato nga ginaistoryahan nanda, ag ako man ro nagapamatuod ku akong mga nasaksihan, ag ako man ro nagsueat ku tanan ngara iya sa rayang sueat. Ag sayod kami nga ro akong ginsueat hay matuod.

²⁵ Kaabo-abo pa't-a ro ginhimo ni Jesus ag kon isueat rato tanan-tanan, siguro hay indi mag-igo iya sa kalibutan ro mga ginsueatan kato, dahil sa kaabuon.