Juan 20 - Inkeanon

Ro Pagkabanhaw ni Jesus

¹ Temprano pa ku adlaw nga Dominggo, madueom-dueom pa hay nag-adto si Maria Magdalena sa eueubngan. Pag-abot idto, hakita nana nga hapaligid eo't-a ro bato nga ginsara sa pwertahan it eueubngan.

² Dumaeagan imaw ag inadtunan si Simon Pedro ag tag sumueunod nga palangga ni Jesus. Ginhambae dayon sanda ni Maria, “Ginbuoe nanda ro Ginuo sa eueubngan ag tao kon siin nanda imaw pagdaeha.”

³ Pagkabati nanda karon hay gumuwa eagi si Pedro ag ro sambato ngato nga sumueunod, ag umadto sa eueubngan.

⁴ Nagdaeagan sandang daywa, pero mas madasig kay Pedro ro anang kaibahan, ngani hauna ra idto nga nakaabot.

⁵ Pag-abot idto hay nagyukbo imaw ag naglingling sa sueod, ag hakita nana ro mga makitid nga maeahaeon nga tela nga ginbalibod kay Jesus, pero owa imaw magsueod.

⁶ Nag-abot man dayon si Simon Pedro ag dumiritso imaw it sueod sa eueubngan. Hakita nana ro mga tela nga ginbalibod kay Jesus nga idto nakahapead.

⁷ Nakita man nana ro tualya nga ginputos sa ueo ni Jesus. Nakabaeueon eon rato, ag hamueag sa mga tela nga ginbalibod sa anang eawas.

⁸ Nagsueod man dayon rondatong sumueunod nga hauna it abot sa eueubngan. Hakita nana ro tanan ngato ag nagpati dayon imaw nga nabanhaw gid si Jesus,

⁹ ugaling owa pa gid gihapon nanda haeubti it mayad ro ginsueat sa Sagradong Kasueatan nga dapat imaw nga mabanhaw.

Nagpakita si Jesus kay Maria Magdalena

¹⁰ Pagkatapos, nag-uli sanday Pedro sa andang ginadayunan.

¹¹ Si Maria Magdalena ma't-a hay idto sa liwan it gineubngan kay Jesus nga nagatinindog ag nagatinangis. Nagatangis gihapon imaw kat nagyukbo imaw ag naglingling sa eueubngan,

¹² ag may hakita imaw idto nga daywang ka anghel nga nakaputi it eambong. Nagapungko sanda sa ginbutangan anay ku eawas ni Jesus, ro isaea hay sa uehan ag ro isaea hay sa sikwayan.

¹³ Ginpangutana nanda si Maria Magdalena, sinanda “Ne, ham-an it nagatinangis ka?” Nagsabat imaw, “Ginbuoe abi nanda ro akong Ginuo ag owa ako kasayod kon siin nanda imaw pagbutangan.”

¹⁴ Pagkahambae nana karon hay tumalikod imaw ag hakita dayon nana si Jesus nga idto nagatindog, pero owa nana hakilaea nga si Jesus gali rato.

¹⁵ Ginpangutana imaw ni Jesus, “Ne, ham-an it gatinangis ka? Sin-o ro imong ginausoy?” Eaom ni Maria hay tag manogtatap ku taeamnan ngato si Jesus, ngani sinana, “Nong, kon ikaw gid man ro nagbuoe kana, sugiri man abi ako kon siin mo imaw pagdaeha ay adtunan ko imaw ag bue-on.”

¹⁶ “Maria,” hambae ni Jesus. Pagkabati kara ni Maria hay nagbalikid imaw kay Jesus ag naghambae sa andang linggwahe, “Rabboni!” (Ro kahueugan kara hay “Maestro.”)

¹⁷ Pero naghambae si Jesus, “Ayaw anay it binuyot kakon ay owa pa ako kabalik sa akong Ama. Adtuni anay ro akong mga kaigmanghuran ag sugiran sanda nga sa indi magbuhay hay gabalik eon ako sa akong Ama ag Dyos, nga inyo man nga Ama ag Dyos.”

¹⁸ Ngani gin-adtunan ni Maria Magdalena ro mga sumueunod ag ginsugiran nga hakita nana ro Ginuo, ag kon ano ro anang hambae.

Nagpakita si Jesus sa Anang mga Sumueunod

¹⁹ Pagkagabii ku ruyon nga Dominggo, ro mga sumueunod ni Jesus hay nagpanarangka sa baeay nga andang ginatipunan, ay nahadlok sanda sa mga manogdumaea it mga Judio. Gulpi eang nga nag-abot si Jesus ag nagtindog sa andang atubang. Ginhambae nana sanda, “Patawhaya ro inyong paino-ino.”

²⁰ Pagkatapos, ginpakita nana kanda ro anang alima ag kilid. Pagkakita nanda kato hay nalipay sanda ay sigurado sanda nga ro andang hakita hay ro Ginuo gid.

²¹ Naghambae it uman si Jesus kanda, “Patawhaya ro inyong paino-ino. Ipadaea ko kamo agod ituro ro mensahi it Dyos pareho ku pagpadaea kakon iya ku Ama.”

²² Tapos hay ginhuypan nana sanda ag ginhambae, “Hara, batuna ninyo ro Espirito Santo.

²³ Paagi sa anang paggiya hay mapasiguro ninyo bisan kanyo kon ginpatawad eon it Dyos, o owa pa, ro andang mga saea.”

Nagpakita si Jesus kay Tomas

²⁴ Si Tomas nga Kapid ro hayo, ag isaea sa doseng ka sumueunod ni Jesus hay owa idto tag nagpakita si Jesus sa anang mga sumueunod.

²⁵ Ngani ginsugiran imaw ku ibang mga sumueunod, hambae nanda, “Hakita namon ro Ginuo.” Pero nagsabat imaw, “Indi gid-a ako karon magpati kon indi ko hikita ro inagyan it eansang sa anang alima, ag indi ko ikasutsut dikato ro akong tudlo, ag kon indi ko ikasueod ro akong alima sa nina sa anang kilid.”

²⁶ Pagkataliwan it sang dominggo, nagtililipon eon man ro mga sumueunod ni Jesus sa ratong baeay, ag kaibahan eon nanda kato si Tomas. Nagpanarangka sanda, pero gulpi eang nga una eo't-a si Jesus nga nagatindog sa andang atubang. “Patawhaya ro inyong paino-ino,” hambae nana.

²⁷ Ginhambae dayon nana si Tomas, “Hara Tomas, tan-awa ro akong mga alima. Sutsutan ro imong tudlo sa inagyan it eansang. Sudlan man ro imong alima sa nina sa akong kilid. Indi ka sinimo magpati pero makaron hay magpati ka eon nga nabanhaw gid ako.”

²⁸ Naghambae dayon si Tomas, “Ikaw ro akong Ginuo ag ro akong Dyos!”

²⁹ Ginhambae dayon imaw ni Jesus, “Gapati ka baea dahil hakita mo ako? Bulahan ro mga nagapati bisan owa sanda kakita kakon.”

Ro Katuyuan ku Ginsueat Ngara ni Juan

³⁰ Kaabo pa't-a ro mga milagrosong pamatuod nga ginhimo ni Jesus nga hasaksihan ku anang mga sumueunod nga owa nakasueat dikara.

³¹ Pero ro mga gintapoe ma't-a ngara dikara hay ginsueat agod magpati kamo nga si Jesus hay imaw ro Maneueuwas nga ginpromisa it Dyos, ag imaw ro Unga it Dyos. Ag tungod sa inyong pagtuo kana hay magakabuhi kamo hasta sa owa it katapusan, paagi sa inyong maeueot nga kaangtanan kana.