Juan 2 - Inkeanon

Ro Pinakahauna nga Milagro nga Ginhimo ni Jesus

¹ Pagkataliwan it daywang adlaw, may kasae sa banwa it Cana nga idto sa probinsya it Galilea. Nag-adto ro ina ni Jesus.

² Si Jesus ag ro anang mga sumueunod hay idto man tungod kangay man sanda.

³ Natabuan 't-a nga kinueang ro bino. Naghambae dayon kay Jesus ro anang ina, “Ubos eo't-a baea kuno ro andang bino.”

⁴ Nagsabat si Jesus, “Nang, ayaw 't-ang abi pagtud-i kon ano rang obrahon ay owa pa't-a nag-abot ro oras nga tumanon ko ro plano it Dyos.”

⁵ Naghambae dayon ro anang ina sa mga sueuguon idto, “Tumana eang ninyo kon ano ro anang isugo kinyo.”

⁶ May idto nga an-om nga bilog nga ka bueutangan it tubi nga human sa bato nga makasueod it mga 75 hasta 115 litros ro kada sambilog. Ro tubi hay para sa ritwal sa pagpalibanaw nandang mga Judio.

⁷ Ginsugo ni Jesus ratong mga sueuguon, “Pun-a ninyo it tubi ro mga bueutangan ngara.” Ginpuno gid nanda rato it tubi.

⁸ Pagkatapos, naghambae imaw, “Saeok eon kamo dikaron ag daehon sa nagadumaea ku ponsyon ngara.” Gintuman nanda si Jesus.

⁹ Ginsamitan ku nagadumaea ro tubi ngato nga nangin bino, pero owa imaw kasayod kon siin rato naghalin. Pero ro mga sueuguon nga nagsaeok kato hay nakasayod 't-a. Gintawag dayon ku nagadumaea ro nobyo

¹⁰ ag ginhambae, “Ugali eon it mga tawo iya nga ginaserbi anay it una ro manamit nga bino, ag kon hilong eon ro mga bisita hay tag mahinang klasi eon dayon ro ginaserbi. Pero ikaw 't-a hay gintigana't-a nimo ro pinakamanamit sa ulihi!”

¹¹ Ratong primero nga milagroso nga pamatuod kon sin-o gid imaw hay ginhimo ni Jesus sa banwa it Cana idto sa Galilea. Paagi dikato hay ana nga ginpahayag ro anang eangitnon nga pagkadaeayawon, ngani nagtuo gid kana ro anang mga sumueunod.

¹² Pagkatapos it kasae sa Cana hay nag-adto sa banwa it Capernaum si Jesus, kaibahan ro anang ina, ro anang mga igmanghod ag ro anang mga sumueunod, ag idto sanda nagtenir it mga pilang adlaw eang.

Ginpangsuboe ni Jesus ro mga Negosyante sa Guwa it Templo

¹³ Maeapit lang kato ro Pagtililipon sa Pagdumdum ku *Pagtaliwan nga ginaselebrar ku mga Judio. Ngani nag-adto sa Jerusalem si Jesus.

¹⁴ Pag-abot idto hay nag-adto imaw sa *lagwirta it Templo ag nakita nana idto ro mga nagabaligya it baka, karnero ag mga salampati nga pangsakripisyo. May idto man nga mga nagapueungko nga manogbaylo it kwarta.

¹⁵ Bumuoe si Jesus it pilang utod nga kaeat ag ana rato nga gin-obra nga hanot, ag ginpangsuboe nana sanda tanan ag gintabog man nana paguwa ro andang mga karnero ag mga baka. Ana man nga ginpatumba ro mga lamisa it mga manogbaylo it kwarta ag ginpangwas-ag ro andang kwarta.

¹⁶ Ginhambaean man nana ro mga nagabaligya it salampati, “Pangbue-a ra ninyo iya! Ayaw ninyo pag-obraha nga baealigyaan ro baeay ku akon nga Ama!”

¹⁷ Hadumduman dayon ku anang mga sumueunod ro ginsueat sa Sagradong Kasueatan nga makaraya: “Ro akong grabing pagpahaega sa imong baeay hay magadaea kakon sa kamatayon.”

¹⁸ Tungod sa ginhimo ngato ni Jesus idto sa Templo hay gintaksar imaw it mga manogdumaea it mga Judio. Hambae nanda, “Ano nga milagro ro imong ipakita kamon agod magapamatuod nga may otoridad ka nga himuon ro ing ginhimo ngara?”

¹⁹ Nagsabat si Jesus, “Gub-a ninyo ro Templo ngara ag patindugon ko ra it uman sa sueod it tatlong adlaw.”

²⁰ Ginsabat man imaw ku mga manogdumaea, “Abaw a! 46 anyos nga gin-inobra ro Templo ngara bago nahuman! Tapos, patindugon mo eang ra sinimo it uman sa sueod it tatlong adlaw?”

²¹ Pero ro ay Jesus 't-a nga buot hambaeon ku “templo” hay ro ana't-a nga eawas.

²² Imaw ron nga pagkabanhaw nana hay hadumduman ku anang mga sumueunod ro ana ngatong ginhambae. Nagpati man sanda sa ginsueat sa Sagrado nga Kasueatan parti sa anang pagkabanhaw, ag sa ay Jesus man mismo nga ginhambae.

Sayod ni Jesus Kon Ano ro Una sa Kabubut-on it Tawo

²³ Tag idto si Jesus sa Jerusalem ku ratong Pagtililipon sa Pagdumdum ku *Pagtaliwan, abo ro nagpati kana dahil sa andang mga nakita nga mga milagrosong pamatuod nga anang ginahimo.

²⁴ Pero bukon gid it kumbinsido si Jesus nga nagapati matuod sanda ay sayod nana ro kinaiya ku tanan nga tawo.

²⁵ Bisan indi eon imaw pagsugiran parti karon ay sayod man eagi nana kon ano ro sueod ku andang tagipusuon.