Juan 14 - Inkeanon

Si Jesus Eang ro Aeagyan it mga Tawo Paadto sa Dyos

¹ Naghambae si Jesus, “Ayaw kamo it palitik kundi lig-una pa gid ro inyong pagsalig sa Dyos ag pati man kakon.

² Sa eangit nga ginaistaran ku akon nga Ama hay kaabo nga maistaran, ag mauna ako idto agod pahauman ko kamo it lugar. Kon bukon it matuod nga kaabo nga maistaran idto hay hambaeon ko baea kamo nga pahauman ko kamo it lugar idto?

³ Kon haom eon ro lugar para kinyo hay magabalik ako iya ag sueangon ko kamo ag daehon dayon sa akong ginhalinan agod mag-ililiba kita idto.

⁴ Sayod eon kamo ku daean sa akong ginaadtunan.”

⁵ Ginsabat imaw ni Tomas, “Ginuo, owa ngani kami kasayod kon siin ka gaadto. Hay paalin namon masayran ro daean paadto idto?”

⁶ Nagsabat si Jesus, “Ako mismo ro daean paadto sa Dyos Ama. Ako man ro gapahayag kon ano ro matuod parti sa Dyos ag ako ro gatao it kabuhi nga owa it katapusan. Owa it makapaeapit sa akon nga Ama kon indi mag-agi kakon.

⁷ Tungod kilaea eon ninyo ako hay makilaea man ninyo pati ro akon nga Ama, ag umpisa makaron hay hikilaea eon ninyo imaw, ay nakita eon ninyo imaw.”

⁸ Naghambae si Felipe, “Ginuo, pakitaan kamon ro imong Ama, ag tama eo't-a ron dayon kamon.”

⁹ Nagsabat si Jesus, “Felipe, mabuhay eon ro akong pag-iniba kinyo ag owa ka't-ing gihapon kakilaea kakon? Ro nakakita kakon hay nakakita man sa akong Ama. Ham-an it gahambae ka pa nga ipakita ko kinyo ro akong Ama?

¹⁰ Owa ka pa baea gapati nga ako ag ro akong Ama hay may maeueot gid nga kaangtanan nga matsa sambilog eang kami? Ro mga ginasugid ko kinyo hay bukon it akon-akon eang. Kon nagahambae ako, ag nagahimo it mga makangawa-ngawa nga mga butang, ro akon 't-a nga Ama ro nagahimo karon paagi kakon.

¹¹ Patihi ninyo nga ako ag ro akong Ama hay sambilog eang. Pero kon indi kamo magpati karon dahil hambae ko manlang, patihi ron ninyo dahil sa mga makangawa-ngawa mismong mga butang nga akong ginaobra.

¹² “Matuod gid rang ginahambae kinyo nga ro nagatuo kakon hay magahimo it mga makangawa-ngawa pareho sa akong mga ginapanghimo, ag mas pa karon ro anang pagahimuon tungod gabalik eon ako sa akong Ama.

¹³ Ag bisan ano ro inyong pangayuon bilang mga sumueunod nakon hay himuon ko, agod dayawon ro Ama paagi kakon nga anang Unga.

¹⁴ Umanon ko rang hambae nga bisan ano ro inyong pangayuon kakon bilang mga sumueunod nakon hay himuon ko gid.”

Ginpromisa ni Jesus nga Paadtunon Nana ro Espirito Santo

¹⁵ Naghambae pa gid si Jesus, “Kon ginahigugma ninyo ako, pagatumanon gid ninyo ro akong mga sugo.

¹⁶ Ag pangabayon ko ro akong Ama nga padaehan kamo it magabueos kakon nga Manogbulig agod ibhan nana kamo hasta sa owa it katapusan, ag obrahon ron it akong Ama.

¹⁷ Imaw hay ro Espirito Santo nga manogpahayag it kamatuuran halin sa Dyos. Ro mga owa nagatuo kakon hay indi makabaton ku Espirito Santo ay owa ma't-a nanda imaw hakita ag hakilaea. Pero kamo't-a hay nakakilaea kana ay gin-inibhan eon nana kamo ag sa indi magbuhay hay magapabilin imaw sa inyong tagipusuon.

¹⁸ “Maskin magpanaw ako hay indi ko kamo pag-aywanan nga matsa mga ilo nga owa it madangpan, kundi mabalik ako kinyo.

¹⁹ Sa indi magbuhay hay indi eon ako hikita ku mga tawo iya sa kalibutan nga owa nagatuo kakon pero makita ninyo ako. Ag bangod mabanhaw ako, kamo hay taw-an it minatuod nga kabuhi.

²⁰ Kon mag-abot eon ro adlaw ngaron hay hisayran ninyo nga ako ag ro akong Ama hay may maeueot gid nga kaangtanan nga matsa sambilog eang kami, ag ako ag kamo man hay may maeueot gid nga kaangtanan.

²¹ Ro nagatanom ku akong mga sugo sa anang paino-ino, ag nagatuman karon hay ruyon ro nagahigugma kakon. Ag ro nagahigugma kakon hay higugmaon ku akon nga Ama. Higugmaon ko man imaw ag akon nga ipahayag kana kon sin-o gid ako.”

²² Tapos hay nagpangutana si Judas (bukon ra it tag si Judas Iscariote), “Ginuo, ano ro natabo nga kamon eang nimo ipahayag kon sin-o ka gid? Dapat 't-a kunta hay sa tanan nga mga tawo!”

²³ Nagsabat si Jesus, “Umanon ko rang ginhambae. Kon ginahigugma ako it sangka tawo hay tumanon nana ro akong hambae. Higugmaon imaw ku akon nga Ama ag kami ku Ama hay magaadto kana ag magaistar sa anang tagipusuon.

²⁴ Pero ro owa nagahigugma kakon hay owa gatuman sa akon nga hambae. Ro akong ginahambae kinyo hay bukon it akon-akon eang kundi tag ginapahambae kakon ku Ama nga nagpadaea kakon iya.

²⁵ “Ginasugid ko ro mga butang ngara kinyo samtang iya pa ako kaibahan ninyo.

²⁶ Pero kon owa eon ako, padaehan kamo ku akong Ama it Manogbulig, ag ruyon hay ro Espirito Santo ag imaw ro magabueos kakon. Imaw ro magaturo kinyo it tanan nga butang ag magapadumdum ku tanan nga ginhambae ko kinyo.

²⁷ Aywanan ko kamo it katawhayan sa inyong tagipusuon. Rayang katawhayan mismo hay iya man kakon ag ginatao ko ra kinyo. Ro katawhayan nga itao ko kinyo hay eain gid sa katawhayan nga ginatanyag it kalibutan. Ngani ayaw kamo it palitik ag ayaw kamo magpaeuya it inyong buot.

²⁸ “Ginhambae ko eon kinyo nga mapanaw ako pero mabalik man ako kinyo. Kon ginahigugma gid ninyo ako hay malipay kunta kamo ay gabalik ako sa akong Ama tungod eabaw pa imaw kakon.

²⁹ Ginsugid ko eon ra kinyo bago pa ra matabo agod kon matabo eon hay mas galig-on pa gid ro inyong pagtuo kakon.

³⁰ Indi eon ako makaistorya pa kinyo it maeawig tungod si Satanas nga manogdumaea it mga owa nagatuo sa Dyos hay gaabot eon. Owa ako it nahimo nga saea nga magamit nana agod magamhan ako.

³¹ Pero ginabaton ko ro madali lang matabo kakon agod ipakita sa mga tawo nga ginahigugma ko ro akong Ama, ag ginatinuman ko permi kon ano ro anang ginsugo kakon. Musyon kamo, mapanaw eon kita.”