Juan 13 - Inkeanon

Ginhugasan ni Jesus ro Siki ku Anang mga Sumueunod

¹ Nag-abot eon ro oras it ihapon sa Pagtililipon sa Pagdumdum ku *Pagtaliwan. Sayod ni Jesus nga nag-abot eon ro oras nga magahalin imaw sa rayang kalibutan ag magabalik sa anang Ama. Halin pa ku primero hay ginhigugma gid ni Jesus ro anang mga katawhan iya sa kalibutan, ag makaron eon ro oras nga ipakita nana ro kabahoe ku anang paghigugma kanda.

² Tag nagakaon eon si Jesus ag ro anang mga sumueunod it ihapon hay sinuhot eon karon ni Satanas ro paino-ino ni Judas, nga unga ni Simon Iscariote, nga traiduron nana si Jesus.

³ Sayod ni Jesus nga gintugyan eon ku anang Ama sa anang alima ro tanan nga gahom, ag sayod man nana nga idto imaw maghalin sa Dyos, ag sa Dyos man imaw magabalik.

⁴ Nagtindog dayon si Jesus ag gin-uba ro anang pangsanib, ag nagtapis imaw it tualya.

⁵ Pagkatapos, nagbuoe imaw it palanggana ag ginbutangan rato it tubi, ag gin-umpisahan it hugas ro siki ku anang mga sumueunod. Ana man dayon nga ginpahiran ku ana ngato nga tualya ro andang mga siki.

⁶ Tag nakaabot eon imaw kay Simon Pedro hay naghambae 't-a si Pedro, “Ginuo, ham-an it ikaw gid-a ro gahugas ku akong siki?”

⁷ Nagsabat si Jesus, “Indi mo maeubtan makaron ro akon ngarang ginaobra pero maeubtan mo gid ra sa ulihi.”

⁸ Nagbalibad si Pedro, “Indi't-ang magpahugas ku akong siki kimo bisan hin-uno!” Pero nagsabat si Jesus, “Kon indi ka kakon magpahugas ku imong siki hay indi ka eon igtapoe sa akong mga katawhan.”

⁹ Nagsabat si Simon Pedro, “Kon mawron, Ginuo, hay bukon eang it ro akong siki ro hugasi kundi pati ro akong alima, ag paligsi pati ro akong ueo.”

¹⁰ Naghambae si Jesus, “Ro nakapaligos eon hay owa eon it kinahangean nga maligos it uman tungod malimpyo eon ro anang bilog nga eawas. Ro ana eang nga siki ro dapat hugasan. Ag kamo hay malimpyo eon mageuwas sa sambilog kinyo.”

¹¹ Ginhambae ron ni Jesus ay sayod imaw kon sin-o ro magatraidor kana, ngani naghambae imaw nga bukon it malimpyo sanda tanan.

¹² Pagkahugas ni Jesus ku mga siki ku tanan nanang sumueunod hay ginsuksuk nana it uman ro anang pangsanib, tapos hay bumalik imaw sa anang lugar sa dat-on. Ginpangutana dayon nana sanda, “Haeubtan baea ninyo kon ano ro akong gin-obra ngato kinyo?

¹³ Ginatawag ninyo ako nga Maestro ag Ginuo, ag tama gid ma't-a nga tawgon ninyo ako it makaruyon, ay duyon gid ma't-ang.

¹⁴ Tungod ako nga inyong Ginuo ag Maestro hay nagpaubos agod hugasan ro inyong siki, mawron nga dapat man nga mapainubuson kamo ag haom maghugas ku siki ku kada isaea.

¹⁵ Ro akong ginpakita kinyo hay sangka halimbawa kon ano ro inyong dapat himuon sa kada isaea.

¹⁶ Matuod gid rang ginahambae kinyo nga ro ulipon hay bukon it eabaw pa sa anang amo ag ro ginpadaea nga tawo hay bukon it eabaw pa sa nagpadaea kana.

¹⁷ Tungod hasayran eon ninyo makaron ro mga butang ngara hay bulahan gid-a kamo kon himuon ron ninyo.

¹⁸ “Pero bukon it kamo tanan ro akong ginahambaean kara. Kilaea ko ro pagkatawo ku akong mga ginpili ag ro sambilog kinyo hay indi pagpakamaayuhon. Pero ginpili ko gihapon imaw agod matuman ro ginhambae sa Sagrado nga Kasueatan nga: ‘Ro nagasaeo sa akon nga pagkaon hay nagtraidor kakon.’

¹⁹ Ginasugiran ko eagi kamo kara bago pa ra matabo, agod kon matabo eon ngani hay magapati kamo nga ako ro Maneueuwas nga ginpromisa it Dyos.

²⁰ Matuod gid rang ginahambae kinyo nga ro nagabaton sa bisan sin-o nga akong ipadaea hay sa minatuod, ako't-a ro andang ginabaton. Ag ro nagabaton kakon hay sa minatuod, ro nagpadaea't-a iya kakon ro andang ginabaton.”

Ginpasayod ni Jesus nga si Judas ro Magatraidor Kana

²¹ Pagkahambae karon ni Jesus hay mat kinuso ro anang tagipusuon ag naghambae dayon imaw, “Matuod gid rang ginahambae kinyo nga may sambilog kinyo nga magatraidor kakon.”

²² Nagtueueukan ro anang mga sumueunod ag naglitik ro andang ueo kon sin-o kanda ro ginapatungdan ni Jesus sa ana ngatong ginhambae.

²³ Ro sumueunod nga palangga gid ni Jesus hay una sa anang tuo nga lugar it kadungganan.

²⁴ Ginsinyasan ni Simon Pedro ratong sumueunod nga pangutan-on si Jesus kon sin-o ro anang ginapatungdan.

²⁵ Ngani sumandiay imaw kay Jesus ag nagpangutana, “Ginuo, sin-o kamon ro imong ginapatungdan karon ay?”

²⁶ Nagsabat kana si Jesus, “Kon sin-o ro taw-an ko it tinapay nga akong isawsaw hay imaw ro tawo ngaron.” Ginsawsaw dayon nana ro tinapay ag gintao kay Judas nga unga ni Simon Iscariote.

²⁷ Pagkabaton ni Judas ku tinapay ngato hay nagsueod dayon kana si Satanas. Ginhambae dayon imaw ni Jesus, “Obraha eagi ro imong gindesidihan nga obrahon.”

²⁸ Owa maeubti ku ibang mga kaibahan ni Jesus sa pagkaon kon ham-an it makarato ro anang ginhambae kay Judas.

²⁹ Eaom ku iba hay ginapabakae ni Jesus si Judas it iba pa nandang kinahangeanon sa Pagtililipon, o basi may ginapatao imaw sa mga pobre, bangod si Judas ro gabuyot ku andang kwarta.

³⁰ Pagkabaton ni Judas ku tinapay ngato hay pumanaw eagi imaw. Gabii eon kato pagpanaw nana.

Dapat Maghigugmaanan ro mga Sumueunod ni Jesus

³¹ Pagkaguwa ni Judas, naghambae dayon si Jesus, “Makaron eon ro oras nga hipadunggan Ako nga Unga it Tawo ag tungod sa matabo kakon hay hipadunggan man ro akon nga Ama.

³² Ag kon hipadunggan ro Dyos dahil sa matabo kakon hay ana man eagi ako nga padunggan.

³³ Mga palangga nakon nga mga unga, indi eon magbuhay ro akon nga pag-iba kinyo, ag kon owa eon ako riya hay usuyon ninyo ako. Pero ihambae ko man kinyo makaron ro akon kato nga ginhambae sa mga manogdumaea it mga Judio nga indi kamo makaadto sa akong ginaadtunan.

³⁴ “Makaron hay may bag-o nga sugo nga akong ginabilin kinyo: maghigugmaanan kamo. Kon mauno ro akong paghigugma kinyo hay dapat makaruyon man ro inyong paghigugma sa kada isaea.

³⁵ Tungod kon makaruyon ro inyong paghigugma sa kada isaea hay dikaron masayran it tanan nga mga tawo nga sumueunod nakon kamo.”

Ginhambae Eagi ni Jesus nga Ipanghiwaea Imaw ni Pedro

³⁶ Nagpangutana dayon si Simon Pedro kana, “Ginuo, siin ka't-imo gaadto ay?” Nagsabat si Jesus, “Indi ka pa kamunot kakon makaron sa akong ginapaadtunan pero sa ulihi hay makaapas ka gid idto.”

³⁷ Nagpangutana eon man si Pedro, “Ginuo, ham-an it indi ako makamunot kimo makaron? Harang haom pa man ako nga isakripisyo ro akong kabuhi para kimo.”

³⁸ Nagsabat si Jesus, “Ano sinimo? Haom ka nga isakripisyo ro imong kabuhi para kakon? Matuod gid rang ginahambae kimo nga bago magpamaeo ro manok hay ipanghiwaea mo it tatlong beses nga sumueunod nakon ikaw.”