Juan 12 - Inkeanon

Ginbu-buan ni Maria it Mahumot nga Banyos ro Siki ni Jesus

¹ Tag an-om nga adlaw lang bago ro Pagtililipon sa Pagdumdum ku *Pagtaliwan, nagbalik sanday Jesus sa Betania nga baryo ni Lazarus nga ana ngatong ginbanhaw.

² May nagpaihapon idto bilang pagpadungog kay Jesus. Nagserbi si Marta, ag si Lazarus hay isaea sa mga kaibahan nanday Jesus sa pagkaon.

³ Si Maria ma't-a hay may daea nga tunga sa litro nga pahumot nga maeahaeon ay puro gid rato ag halin sa tanom nga nardo. Binu-bu na rato tanan sa siki ni Jesus tag nagakaon pa sanda. Ana man dayon nga ginpahiran rato ku anang buhok. Naghumot ro bilog nga baeay dahil sa hugom ku pahumot ngato.

⁴ Pero ro isaea sa mga sumueunod ni Jesus nga si Judas Iscariote nga sa indi magbuhay hay magatraidor kana hay naghambae,

⁵ “Kaumangon 't-a! Linibo ro bili ku pahumot ngaron! Ham-an it owa lang ron abi pagbaligyaan ag itao sa mga pobre ro kabakeanan?”

⁶ Ginhambae nana ron, bukon it dahil nga naeuoy imaw sa mga pobre kundi dahil manakaw imaw. Imaw abi ro gabuyot ku andang kwarta ag ginakupitan nana ra.

⁷ Ngani naghambae si Jesus kay Judas, “Pabay-i't-a imaw. Ana nga gintigana raya nga pahumot agod ipahaom ro akong eawas sa akong eubong.

⁸ Ro mga pobre hay kaibahan 't-a ninyo permi, pero ako hay indi ninyo mangin kaibahan permi.”

⁹ Pagkasayod ku nga mga Judio nga idto sa Betania si Jesus hay kaabo-abo kanda ro nag-aeadto idto. Ag bukon eang it si Jesus ro andang gin-adto idto, kundi agod hikita man nanda si Lazarus nga ginbanhaw ni Jesus.

¹⁰ Ngani nagkaeasugot ro mga pinuno it mga saserdote nga patyon man pati si Lazarus,

¹¹ ay dahil sa anang pagkabanhaw hay abo nga mga Judio ro nagabueueag kanda ag nagatuo eon kay Jesus.

Gindayaw si Jesus ku mga Tawo Pag-abot Nana sa Jerusalem

¹² Pagkaaga, ro kaabo-abo nga mga nag-aeadto sa Jerusalem para sa Pagtililipon hay nakabati nga gaabot si Jesus idto.

¹³ Ngani nagbuoe sanda it mga dahon it palmera ag naggueuwa sa syudad agod sueang-sueangon imaw. Ag nagasilinggit sanda, “Dayawon ta ro Dyos! Daeayawon raya nga ginpadaea iya it Ginuong Dyos! Daeayawon imaw nga hari naton nga mga inapo ni Israel!”

¹⁴ Si Jesus ma't-a hay nagpabuoe it sangka tiyo it asno ag dikato imaw nagsakay paadto sa syudad pareho sa nasueat sa Sagradong Kasueatan nga:

¹⁵ “Ayaw it kahadlok, mga pumueuyo it Jerusalem. Haron, nagapaeangop eon ro inyong hari nga nagasakay sa tiyo it asno.”

¹⁶ Tag nagakaeanabo ra hay owa pa haeubti ku mga sumueunod ni Jesus nga katumanan gali rato ku ginsueat it sangka propeta. Pero pagkabanhaw nana, ag ginpadunggan eon imaw sa eangit hay hadumduman nanda rondatong natabo, ag naeubtan nanda nga imaw gali ro ginapatungdan ku ginsueat ngato.

¹⁷ Ro kaabong tawo ngato nga nakasaksi tag ginbanhaw ni Jesus si Lazarus, ag ginsugo nga magguwa sa eueubngan hay nagsilinugid parti sa natabo ngato.

¹⁸ Mawron ngani nga kaabo ro nagsueang-sueang kay Jesus ay habatian nanda rondaya nga milagrosong pamatuod nga anang gin-obra.

¹⁹ Tapos, naghambae ro ibang mga Pariseo sa andang mga kaibahan, “Hay kita eon ninyo? Owa gid kamo it nahuman sa inyong tinanga-tanga. Haron, tanan eon ro mga tawo sa kalibutan hay nagasunod 't-a kana!”

Ginhambae Eagi ni Jesus nga Dapat Imaw Mamatay Por Dahil sa Tawo

²⁰ Sa mga nag-adto sa Jerusalem agod magsimba sa Dyos sa Pagtililipon hay may mga Griyego.

²¹ Nag-adto sanda kay Felipe nga tagaBetsaida, nga sangka banwa it Galilea, ag naghambae, “Nong, gusto kunta namon nga makighambae kay Jesus.”

²² Ngani nag-adto si Felipe kay Andres ag ginsugiran imaw. Nag-adto dayon sanda kay Jesus ag ginsugiran man nanda imaw ku ginhambae it mga bukon it Judio ngato.

²³ Naghambae si Jesus, “Nag-abot eon ro oras nga Ako nga Unga it Tawo hay pagapadunggan.

²⁴ Matuod gid rang ginahambae kinyo nga kon ro binhi hay indi igtanom sa eapok hay indi ra maeunot ag indi magtubo ag makapamunga. Pero kon itanom ra ag maeunot hay magatubo dayon ra ag magapamunga it abo.

²⁵ Ro naila nga magsunod sa ana eang nga gusto sa anang kabuhi hay mamatay man lang gihapon ag pinahan sa impyerno. Pero ro magsakripisyo ku anang gusto iya sa kalibutan agod sundon ro akong pagbuot hay makabaton it kabuhi nga owa it katapusan.

²⁶ Ro gustong magserbi kakon hay dapat nga magsunod kakon bisan magkainalin, ag sa ulihi hay magaiba imaw kakon sa akong aeadtunan. Ro tanan nga nagaserbi kakon hay pagapadunggan ku akong Ama.”

²⁷ Naghambae pa gid si Jesus, “Nagalitik ro akong ueo. Ano ro akong ihambae? Mahambae baea ako nga, ‘Ama kon mahimo hay euwasa lang ako sa mga kasakit nga akong aeatubadngon’? Pero indi man puydi dahil ruyon ngani ro katuyuan nga nag-adto ako riya.”

²⁸ Tapos, naghambae si Jesus sa Ama, “Ama, pakitaan nga daeayawon ka nga Dyos.” May naghambae dayon halin sa eangit, “Ginpakita ko eon don ag ipakita ko ron it uman.”

²⁹ Abo ro mga nagatindog idto ag habatian nanda ro limog, ag sinanda ku iba hay daeugdog man lang rato. Pero sinanda ma't-a ku iba hay may anghel nga naghambae kay Jesus.

³⁰ Pero naghambae si Jesus, “Bukon it para kakon ro limog nga inyong habatian kundi para kinyo.

³¹ Makaron eon ro oras nga sintinsyahan ro tanan nga nagakuntra kakon. Makaron man ro oras nga perdihon eon ro manogdumaea ku tanan nga nagakuntra sa Dyos.

³² Kon hibayaw eon ako sa krus hay taw-an ko it kahigayunan ro tanan nga tawo nga magdangop kakon agod maeuwas.”

³³ Ginhambae nana ra agod ipasayod kon paalin imaw mamatay sa indi magbuhay.

³⁴ Pagkabati ku kaabo nga tawo sa anang ginhambae, may naghambae kana, “Hatun-an namon sa Kasuguan nga ro Maneueuwas nga ginpromisa it Dyos hay indi mamatay bisan hasta hin-uno. Ham-an it mahambae ka nga ro Unga it Tawo hay igabayaw sa krus? Sin-o ro Unga it Tawo nga imong ginahambae ngaron?”

³⁵ Nagsabat si Jesus, “Mangin kaibahan pa ninyo ro Iwag it madaling oras. Ngani samtang iya pa ra kinyo hay magkabuhi kamo suno sa paggiya it kahayag nga anang ginatao agod indi madueman it husto ro inyong paino-ino. Ro nagatikang sa kadueom hay owa kasayod kon siin imaw paadto.

³⁶ Ngani magtuo kamo kakon nga Iwag, samtang kaibahan pa ninyo ako, agod kamo hay mangin tawo nga nahayagan gid ro paino-ino.” Pagkahambae karon ni Jesus hay pumanaw imaw ag owa eon imaw magpakita kanda.

Kaeabanan sa mga Judio hay Owa Nagtuo kay Jesus

³⁷ Bisan kaabo eon ro ginpakita ni Jesus nga mga milagrosong pamatuod sa atubang it mga tawo hay owa gihapon sanda nagtuo kana.

³⁸ Natabo ra agod matuman ro hambae kato ni Propeta Isaias nga, “Ginuong Dyos, may nagpati baea sa among mensahi? May nagkilaea man baea sa imong gahom tag ginpakita mo ra kanda?”

³⁹ Ginpaathag ni Isaias sa ana man nga ginsueat kon ham-an it indi sanda makapati. Suno rikato,

⁴⁰ “Hambae it Dyos nga ginbulag nana ro andang mga mata ag ginpatig-a ro andang tagipusuon agod indi nanda maeubtan ro kahueugan ku andang hakita ag agod indi sanda magdangop kana agod hipamayad nana sanda.”

⁴¹ Ginsueat ra ni Propeta Isaias dahil ginpakita eon kana kon paalin padunggan si Jesus, ag si Jesus man ro ginapatungdan ku anang ginsueat ngato.

⁴² Bisan kaeabanan sa mga Judio hay owa magtuo kana, abo ma't-a gihapon ro nagtuo. Bisan ngani sa andang mga manogdumaea hay abo ro nagtuo man kay Jesus, ugaling hay owa ra nanda ginasugiran ay nahadlok sanda nga indi eon pagpasudlon ku mga Pariseo sa sinagoga,

⁴³ ay mas ginapaeabi pa abi nanda nga dayawon it tawo kaysa sa dayawon sanda it Dyos.

Ro Katapusan nga Pagturo ni Jesus sa Kadagayaan

⁴⁴ Naghambae dayon si Jesus it mabaskog sa mga tawo, “Ro nagatuo kakon hay owa eang kakon nagatuo, kundi pati man sa nagpadaea iya kakon.

⁴⁵ Ro nakakita kakon hay nakakita man sa nagpadaea iya kakon.

⁴⁶ Ako ro Iwag nga nag-adto iya sa kalibutan agod ro bisan sin-o nga nagatuo kakon hay indi eon magkabuhi sa kadueom.

⁴⁷ Bukon it ako ro nagasintinsya nga pinahan ro mga nakabati sa akong ginahambae pero owa man nagatuman. Nag-adto abi ako iya sa kalibutan agod euwason ro mga tawo, bukon it agod sintinsyahan sanda.

⁴⁸ Pero may una nga magasintinsya sa mga nagabaliwala kakon ag owa nagabaton sa akong mga ginahambae. Ro magasintinsya kanda nga pinahan sa katapusan nga adlaw hay ro mensahi nga akon nga ginpanghambae nga owa nanda pagbatuna.

⁴⁹ Ro akon nga ginahambae hay bukon it akon-akon eang, kundi kon ano ro ginapahambae kakon ku akong Ama nga nagpadaea kakon iya.

⁵⁰ Sayod ako nga ro mensahi nga ginapahambae kakon ku akon nga Ama hay nagatao it kabuhi nga owa it katapusan, ngani kon ano ro anang ginapahambae kakon hay ruyon man ro akong ginahambae.”