Filemon 1 - Inkeanon

Mga Pagpangamusta

¹ Raya nga sueat hay halin kakon nga si Pablo nga napriso tungod sa akong pagwali parti kay Kristo Jesus, ag halin man ra kay Timoteo nga atong igmanghod sa pagtuo. Nagasueat kami kimo, Filemon, amon nga palangga nga amigo ag kapareho namon sa pagserbi sa Ginuo.

² Kumusta man kay Afia nga aton nga igmanghod sa pagtuo, kay Arkipus nga pareho man namon nga matsa soldado ni Kristo, ag sa grupo it tumueuo nga nagatililipon agod magsimba inha sa imong baeay.

³ Kabay pa nga masamitan pa gid nimo ro mga pagpakamaayo ag katawhayan nga halin sa Dyos nga atong Ama ag kay Ginuong Jesu-Kristo.

Gindayaw ni Pablo Ro Paghigugma ag Pagtuo ni Filemon

⁴ Permi ako nga nagapasaeamat sa akon nga Dyos kada nagapangamuyo ako para kimo

⁵ tungod habalitaan ko ro kalig-on ku imo nga pagtuo kay Ginuong Jesus, ag ro imong paghigugma sa tanan nga ginpaeain it Dyos nga anang katawhan.

⁶ Akon nga ginapangamuyo nga imo nga mas maeubtan ro tanan nga mayad nga butang nga gintao katon it Dyos, ag ro imong pagtuo kay Kristo ro magatueod kimo nga mangin mabuot sa iba para sa anang kadayawan.

⁷ Akon nga igmanghod, nalipay ako it duro ag nagbaskog pa gid ro akong buot tungod sa imo nga paghigugma sa mga katawhan it Dyos inha. Dahil man karon hay imo nga ginpabaskog ro andang buot.

Ro Pangabay ni Pablo kay Filemon Para kay Onesimus

⁸ Mawron man nga may ginapangabay ako kimo. Bilang *apostol ni Kristo hay may otoridad ako nga suguon ka kon ano ro imong dapat nga obrahon,

⁹ ugaling dahil palangga ko ikaw hay mangabay eang ako. Nagapangabay ako kimo bisan ako si Pablo nga tigeawas ni Kristo Jesus, ag napriso dahil sa akong pagserbi kana.

¹⁰ Ro akon ngara nga pangabay hay para kay Onesimus nga akong unga sa pagtuo. Nangin ama nana ako sa pagtuo samtang iya ako sa prisuhan.

¹¹ Pageaas nana hay owa mo eon imaw hapusli pero makaron hay mapuslan eon imaw natong daywa.

¹² Pabalikon ko eon si Onesimus inha kimo. Palangga ko gid ron imaw ngani kabay pa nga trataron mo imaw it mayad.

¹³ Gusto ko kunta imaw nga hawiran agod imaw ro magsal-i kimo sa pagbulig kakon myentras nga iya ako sa prisuhan tungod sa akong pagsugid ku Mayad nga Balita.

¹⁴ Pero owa ko imaw paghawiri ay owa pa ako kaeaong kimo. Gusto ko nga ro imong pagbulig kakon hay dahil naila ka ma't-ing magbulig, ag bukon it dahil nga hapilitan ka eang.

¹⁵ Pagbuot siguro it Dyos nga magbueag anay kamo ni Onesimus it madaling oras agod may inyo eon dayon nga bag-o nga kaangtanan nga magapadayon hasta sa owa it katapusan.

¹⁶ Halin makaron hay bukon mo eang imaw it ulipon kundi mas mahaega eo't-a imaw kimo kaysa sa ulipon, ay igmanghod mo eon imaw sa pagtuo nga dapat mong palanggaon. Palangga ko gid ron imaw pero mas palanggaon mo kunta imaw, ay mag-amo kamo ag pareho nga nagatuo sa Ginuo.

¹⁷ Ngani kon ginakabig mo ako nga imong isigkapareho nga nagatuo ag nagaserbi sa Ginuo hay batuna imaw pareho ku imong pagbaton kakon.

¹⁸ Kon nagkasaea gid man imaw kimo ukon may baeayran imaw kimo hay ako lang ro sukta.

¹⁹ Ako mismo nga si Pablo ro nagasueat kara, “Bayran ko ron kimo.” Owa eon ngani siguro it kinahangean nga padumdumon ko pa ikaw nga utang mo kakon ro imo mismong bag-o nga kabuhi bilang tumueuo ni Kristo.

²⁰ Ngani, Filemon, kabay pa nga taw-an mo ako it pabor dahil mag-igmanghod kita sa Ginuo. Pabaskuga ro akong buot tungod pareho kita nga may maeueot nga kaangtanan kay Kristo.

²¹ Nagasueat ako kara kimo ay sigurado ako nga tumanon mo ro akon ngarang mga pangabay, ag mas pa karon ro imong himuon.

²² Ag may sambilog pa gali ako nga ginapangabay kimo. Pahaumi abi ako it daeayunan, ay nagasalig gid ako nga sabton it Dyos ro inyong pangamuyo ag paguwaon ako agod makabisita ako inha kinyo.

Mga Katapusan nga Pagpangamusta

²³ Ginakumusta ka ni Epafras nga kaibahan ko iya sa prisuhan dahil sa among pagserbi kay Kristo Jesus.

²⁴ Ginakumusta ka man ku akong mga kapareho nga nagaserbi sa Ginuo nga sanday Marcos, Aristarcus, Demas ag Lucas.

²⁵ Kabay pa nga masamitan pa gid ninyo ro sobrang kabuot ku Ginuo nga si Jesu-Kristo.