2 Timoteo 4 - Inkeanon

¹ Sa atubang it Dyos ag ni Kristo Jesus nga magabalik sa ulihi bilang daeayawon nga hari nga magahukom sa tanan, mga buhi man o patay eon, ginabilin ko gid kimo nga

² iwali ro mensahi it Dyos. Dapat nga permi ka nga haom nga magwali bisan mayad o bukon it mayad ro sitwasyon. Ipasayod sa mga tawo ro andang saea, pangisgi sanda ag eaygayan mo man dayon agod nga magbaskog ro andang buot. Magmapinasensyahon ka samtang nagaturo kanda.

³ Maabot abi ro tyempo nga indi eo't-a makatakod ro mga tawo magpamati sa tama nga doktrina, ag tungod nga gusto nandang sundon ro andang maeain nga handom hay magausoy sanda it mga manogturo nga gaturo it mga matsa nagaitik kanda.

⁴ Nagapabungoe sanda sa kamatuuran pero maanting ro andang dueunggan sa mga sugilanon nga bukon it minatuod.

⁵ Pero ikaw 't-a, Timoteo, pugngi permi ro imong kaugalingon sa tanan nga bagay, tiisa ro tanan nga kalisod nga gaabot kimo dahil sa imong pagwali ku Mayad nga Balita, padayuna ro imong pagwali karon, ag obraha ro tanan nga gintugyan kimo it Dyos.

⁶ Ginabilinan ko ikaw kara ay nag-abot eon ro oras nga ro akong dugo hay iuea nga bilang haead sa Dyos, pareho ku bino nga ginauea sa altar pagkatapos it pagsakripisyo it sapat. Ro akong gustong hambaeon hay sa indi magbuhay hay pagapatyon eon ako.

⁷ Grabi gid ro akong pagtinguha sa akong pagserbi sa Dyos. Pareho it manogkarera hay nagdaeagan ako it mayad ag natapos ko ro karera. Owa gid ako nagtalikod sa atong ginatuuhan.

⁸ Ngani may ginatigana eon kakon nga premyo ro Ginuo nga para sa mga matarong, nga anang itao kakon sa adlaw it anang pagbalik. Matarong gid imaw ag perming tama ro anang desisyon kon pinahan na o premyuhan ro mga tawo. Sa adlaw ngaron, bukon eang it ako ro anang premyuhan kundi pati man ro tanan nga nagapaabot gid ku anang pagbalik iya sa kalibutan.

Katapusang mga Pamisaea ag Pagpangamusta

⁹ Tinguhaa gid nga mag-adto riya kakon sa indi magbuhay

¹⁰ ay gin-aywanan eon ako ni Demas ag nag-adto imaw sa Tesalonica, ay naila't-a imaw it duro sa kasadyahan sa rayang tyempo, ag owa eo't-a it bali kana kon owa imaw it mabaton nga premyo sa ulihi. Nagpanaw si Cresens sa probinsya it Galacia, ag si Tito ma't-a hay idto sa probinsya it Dalmatia.

¹¹ Si Lucas lang ro akong kaibahan iya makaron. Hapita si Marcos ag daehon mo man imaw riya ay mapuslan ko gid imaw sa atong pagserbi sa Dyos.

¹² Ginapaadto ko eon inha si Tikicus sa Efeso.

¹³ Kon mag-adto ka riya, hapita abi ro akong pangsanib nga akong haaywanan kay Carpus sa Troas. Daeha man ro akong mga kasueatan, kapin gid ro mga pinakaimportanti nga nasueat sa panit it sapat.

¹⁴ Si Alexander nga panday it saesaeon hay naghimo it abo nga halit kakon. Baslan gid imaw it Ginuo sa ana ngatong ginhimo.

¹⁵ Ruyong tawo hay dapat mo man nga andaman ay ginkuntra gid nana it grabi ro atong ginaturo.

¹⁶ Ku primero nga nag-atubang ako sa korte hay owa gid it nagtindog sa akong kilid bilang akong mga kaapin. Ginsikway nanda ako tanan. Kabay pa nga indi sanda pagsukton it Dyos dahil karon.

¹⁷ Pero sa gihapon hay gin-ibhan ako it Ginuo ag ginpaisog ro akong buot agod paagi kakon hay ikasugid ro bug-os nga mensahi parti kana, ag agod makabati karon ro tanan nga mga bukon it *Judio. Ag gineuwas nana ako sa mga gustong magpatay kakon.

¹⁸ Ag sayod ako nga euwason ako it Ginuo sa bisan anong maeain nga obrahon kakon hasta daehon na eon ako sa eangit, kon siin imaw magahari it husto sa anang mga sinakpan. Dayawon ta imaw hasta sa owa it katapusan. Amen.

¹⁹ Kumusta lang kanday Prisca ag Aquila ag sa panimaeay ni Onesiforus.

²⁰ Ay, si Erastus gali hay nagpabilin sa Corinto, ag si Trofimos ma't-a hay inaywanan ko sa Miletus ay nagamasakit imaw.

²¹ Magtinguha ka gid nga makaabot riya bago magtigbaeagyo. Nagapangamusta kimo si Eubulus ag pati man sanday Pudens, Linus ag Claudia, ag pati man ro tanan naton nga mga igmanghod sa pagtuo iya.

²² Kabay pa nga ibhan ka permi it Ginuo ag masamitan pa gid ninyo inha ro sobrang kabuot it Dyos.