2 Timoteo 3 - Inkeanon

Ro Pagginawi it mga Tawo sa Katapusan nga mga Inadlaw

¹ Pero dapat mong masayran nga mangin malisod ro sitwasyon sa ulihing mga inadlaw,

² tungod ro mga tawo eo't-a kato hay magahigugma sa anda eang nga kaugalingon, mailaon gid it manggad, bugaeon, palabi-labihon, manogpakaeain sa isigkatawo, bukon it masinueundon sa ginikanan, owa't kabaeaslan, owa it pagtaha sa mga bagay nga sagrado,

³ owa it gugma bisan kanyo, indi gid magpahusay, gapangsamad sa isigkatawo, owa it pagpugong sa kaugalingon, mapintas, owa naila sa bisan ano nga mayad,

⁴ traidor, daso-daso, sobra it taas ro andang pagdumdum sa andang kaugalingon, ag mailaon it duro sa pagkinalipay imbis nga mahigugmaon sa Dyos.

⁵ Kon tan-awon hay mga matinumanon sanda sa Dyos pero owa nagapasakop sa anang paggahom agod nga makatuman gid sanda kana. Likawi ro makaruyong klasi it mga tawo

⁶ ay ro iba kanda hay nagapang-into agod makasueod sa mga baeay ag mangkumbinsi it mga bayi nga ula-ula nga magpati gid sa andang saea nga turo. Ro mga bayi ngara hay ulipon it kaabo-abo nga saea, ay nadadaea sanda ku sari-sari nandang maeain nga mga handom.

⁷ Naila sanda nga magtuon permi ugaling indi gid gihapon sanda makaeubot kon ano ro tama nga turo.

⁸ Ruyong mga nagaturo it saea hay nagakuntra sa tama nga doktrina pareho anay kanday Jannes ag Jambres nga nagkuntra kay Moises kato anay. Samad eon ro paino-ino ku mga nagaturo ngaron, ag ro andang bukon it minatuod nga pagtuo hay indi makapasar sa Dyos.

⁹ Pero hasta siin gid abi sanda ron? Mahayag gid sa tanan ro anda ngarong pagkabungog pareho man kato kanday Jannes ag Jambres.

Ginbilinan it Uman ni Pablo si Timoteo nga Magpadayon sa Pagtuman ku Kamatuuran

¹⁰ Pero ikaw 't-a, Timoteo hay hasayran mo gid ro akong ginaturo, ro akong batasan, ro akong gustong obrahon sa akong kabuhi, ro kalig-on ku akong pagtuo, ro akong pasensya, kon paalin ako maghigugma ag kon paalin ako magtiis.

¹¹ Hasayran mo man ro mga paghingabot kakon ag ro akong mga pag-antos, pareho sa akong haagyan nga grabi nga paghingabot sa mga syudad it Antioc, Iconium ag Listra. Pero gineuwas ako it Ginuo dikato tanan.

¹² Minatuod gid-a nga pagahingabuton man ro tanan nga may maeueot nga kaangtanan kay Kristo Jesus nga gustong magkabuhi nga matinumanon sa Dyos.

¹³ Ag ro mga maeain nga nagapakuno-kuno nga manogturo sanda it tama hay mas gaeain pa gid. Pataeangon pa gid nanda ro mga tawo, ag sanda mismo hay mas magataeang pa gid.

¹⁴ Pero ikaw 't-a, Timoteo, padayuna ro pagpati ag pagtuman sa mga ginturo kimo. Nangin kumbinsido ka nga matuod rato, ay sayod mo gid nga masaligan ro mga nagturo kato.

¹⁵ Ag syempre, owa ka man halipat nga halin ku unga ka pa hay haeubtan eon nimo ro Sagrado nga Kasueatan nga makatao kimo it kaaeam kon paalin ka maeuwas paagi sa pagtuo kay Kristo Jesus.

¹⁶ Ro tanan nga ginsueat sa Sagradong Kasueatan hay halin mismo sa Dyos ag ginsueat paagi sa anang paggiya. Mapinuslanon gid ron tanan dahil nagaturo katon ku kamatuuran, nagasaway ag nagabadlong ku atong saea, ag nagaturo katon kon mauno kita magkabuhi it matarong sa mata it Dyos.

¹⁷ Ro Sagrado nga Kasueatan hay nagaturo katon nga katawhan it Dyos ku tanan natong kinahangean agod makasarang kita sa pag-obra it maskin anong klasing mayad nga buhat.