2 Timoteo 2 - Inkeanon

Dapat nga Maghugod ag Magtutum si Timoteo sa Anang Pagserbi kay Jesus

¹ Ngani, unga nakon sa pagtuo, magpakalig-on ka paagi sa bulig nga ginatao katon nga may maeueot nga kaangtanan kay Kristo Jesus.

² Ro mga ginturo ko sa atubang it kadagayaan nga habatian nimo hay imo man nga ituro ag itugyan sa mga masaligan ag mayad magturo, agod ikaturo man nanda sa iba.

³ Tiisa ro mga kalisod nga nagaabot katon nga mga nagatuo kay Kristo Jesus, pareho it masaligan nga soldado nga matiniison sa kalisdanan.

⁴ Owa abi it soldado nga una sa aktibo nga serbisyo nga nagapabaya nga hibaeanga it mga oeobrahon it sibilyan nga makaawat kana sa anang pagkasoldado, ay gusto nana nga mapalipay ro anang opisyal.

⁵ Isipa man ro sangka manogdaeagan sa karera. Bisan imaw ro nagdaog hay indi man imaw makabaton it premyo kon owa imaw nagsunod sa mga sueundanan.

⁶ Ro sambilog pa nga dapat mo paino-inohon hay raya: Ro mangunguma nga nagkabudlay hay imaw dapat ro hauna nga makasamit ku tubas ku anang kinabudlayan.

⁷ Paino-inoha it mayad ro akong ginahambae ngara ag buligan ka dayon it Ginuo nga maeubtan ra tanan.

⁸ Dumduma permi si Jesu-Kristo. Imaw ro Maneueuwas nga ginbanhaw it Dyos ag isaea imaw sa mga inapo ni Haring David. Raya ro Mayad nga Balita nga akong ginawali.

⁹ Ag tungod nagawali ako parti kara hay sige ro akong pag-antos ag hara, ginakadenahan pa ngani ako iya sa prisuhan nga matsa maeain nga tawo. Pero ro mensahi it Dyos hay indi makadenahan.

¹⁰ Ngani ginatiis ko ro bisan ano por dahil sa mga pinili it Dyos, agod nga maeuwas man sanda paagi sa ginhimo ni Kristo Jesus, ag sa ulihi hay masamitan nanda ro grabi it nami nga kahimtangan idto sa eangit hasta sa owa it katapusan.

¹¹ Masaligan ro hambaeunon nga, “Kon ginbilang eon kita nga namatay kaibahan nana tag namatay imaw hay magakabuhi man kita kaibahan nana sa ulihi.

¹² Kon tiison naton ro tanan nga kalisod nga atong maagyan dahil sa atong pagtuo kana, magahari man kita kaibahan nana sa ulihi. Pero kon ipanghiwaea naton nga sumueunod nana kita, sa ulihi hay ana nga pamatud-an nga bukon gid ma't-a kita it mga sumueunod nana.

¹³ Bisan bukon kita it matutom kana kon amat hay matutom 't-a gihapon imaw katon, ay makaruyon gid ma't-a ro anang kinaiya ag indi puydi nga kabaliskaran karon ro anang ginaobra.”

Ro mga Bilin ni Pablo kay Timoteo Kon Paalin Nana Matuman it Mayad ro Anang Katungdanan

¹⁴ Padumduma ro imong pagatugyanan nga mga manogturo inha ku akon ngarang mga ginhambae kimo, ag hambaei sanda sa atubang it Dyos nga indi dapat sanda makigdibati parti sa kahueugan it mga pamisaea. Owa ron it pueos ag makasamad eang sa pagtuo ku mga nagapamati.

¹⁵ Tinguhaa gid nga eubton it mayad ag ituro it insakto ro minatuod nga mensahi it Dyos, ag magapakita ron nga ikaw hay manogpangabudlay nga owa it ginakahuya ag pasado sa Dyos.

¹⁶ Likawi ro mga istorya nga owa it pueos ag owa it kaeabtanan sa mga bagay nga mahaega sa Dyos, ay ro mga nagaistorya karon hay mas kapin nga owa eon gid it kahadlok kana.

¹⁷ Ro andang ginahambae hay magaeapnaag ag magasamad sa pagtuo ku mga tawo, pareho it ganggrina nga nagaeapad ag nagasamad sa eawas it tawo. Makaruyon ro ginahambae nanday Hymeneus ag Filetus.

¹⁸ Naglihis eon sanda sa daean it tama nga doktrina ay nagaturo sanda nga tungod matsa nabanhaw eon kita tag nagtuo kita kay Jesus, ngani owa eon kita it mapaabot pa nga pagkabanhaw ku atong eawas sa ulihi. Dahil karon hay andang ginasamad ro pagtuo it iba.

¹⁹ Pero bisan may nagaturo it makaruyon, ro malig-on nga pundasyon nga gintukod it Dyos hay malig-on gid gihapon ag may tanda ron it makaraya: “Kilaea it Ginuo ro anang mga katawhan” ag “Tanan nga nagaako nga nagatuo sanda sa Ginuo hay dapat magpaeayo sa paghimo it bukon it matarong.”

²⁰ Sa baeay it mga manggaranon hay sari-sari ro kagamitan. May human sa bueawan ag pilak nga kon ginagamit hay nagatao it kadungganan sa tag-ana. Ro iba hay human sa kahoy ag sa daga nga pang-ordinaryo nga gamit.

²¹ Kon sa tawo ron, ro bisan sin-o nga nagatalikod ag nagalikaw sa ginahimo ag ginaturo ku mga nagaturo ngaron it saea hay limpyo eon sa mata it Dyos. Pareho imaw it kagamitan nga nagatao it kadungganan sa tag-ana. Ginpaeain imaw it Dyos bilang isaea sa anang balaan nga katawhan, ag mapuslanon sa Dyos nga anang Amo. Ag ginpahaom eon imaw sa pag-obra it maskin anong klasing mayad nga buhat.

²² Ngani paeagiwi ro mga maeain nga handom it mga pamatan-on, ag tinguhaa nga magkabuhi it matarong, ag maglig-on ro imong pagtuo sa Dyos. Tinguhaa man nga magmahigugmaon ka ag mahidaiton. Makaraya man dapat ro pagkabuhi ku tanan nga nagatuo it minatuod sa Ginuo, nga limpyo eon ro andang kabubut-on.

²³ Likawi ro mga tawo nga ignoranti nga gustong makigbais kimo parti sa mga pinaumang nga bagay, ay sayod mo nga inaway eang karon ro paeangpan.

²⁴ Ro nagaserbi sa Ginuo hay indi dapat makig-away kundi mabuot sa tanan, mayad magturo ag mapinasensyahon.

²⁵ Dapat maeueo imaw kon magpaathag sa mga nagakuntra sa anang ginaturo, ay basi eon lang buligan sanda it Dyos nga maghinuesoe ag magpundo sa andang pagkuntra, ag masayran dayon nanda ro matuod nga mensahi.

²⁶ Ag basi makatagumpaaw sanda ag makapaeagiw eon sa kisiw ni Satanas nga nagdakop kanda agod magtuman sa anang gusto.