2 Timoteo 1 - Inkeanon

Mga Pagpangamusta

¹ Raya nga sueat hay halin kakon nga si Pablo nga sangka *apostol ni Kristo Jesus suno sa pagbuot it Dyos. Ginpili nana ako agod magturo parti sa kabuhi nga anang ginpromisa, nga mabaton ku tanan nga may maeueot nga kaangtanan kay Kristo Jesus.

² Nagasueat ako kimo, Timoteo, nga akon nga pinalangga nga unga sa pagtuo. Kabay pa nga masamitan pa gid nimo ro mga pagpakamaayo, kaeuoy ag katawhayan nga halin sa Dyos Ama, ag kay Kristo Jesus nga atong Ginuo.

Ginbilinan ni Pablo si Timoteo nga Magpadayon nga Matutom sa Anang Pagserbi sa Dyos

³ Permi ko gid ikaw nga ginasambit sa akong pagpangamuyo adlaw-gabii, ag ginapasaeamatan ko ro Dyos dahil kimo. Imaw ro Dyos nga akong ginasimba pareho ku akong mga kalolo-lolohan, ag malimpyo ro akong konsensya sa akong pagserbi kana.

⁴ Indi ko malipatan ro imong pagtangis ku pagbueag naton, ngani nagahandom gid ako nga hikita ta it uman agod mas pa gid ro akong kalipay.

⁵ Ag indi ko man malipatan ro imong minatuod nga pagtuo, ag kumbinsido ako nga pareho ron sa pagtuo ku imong lola nga si Lois ag ku imong ina nga si Eunice, nga mga hauna nga nagtuo kaysa kimo.

⁶ Ngani ginapadumdum ko ikaw nga maghugod ka it uman sa paggamit ku abilidad nga gintao kimo it Dyos tag gintungtung ko kimo ro akong alima, ay nangin pareho eon ron it baga nga nagaamat it ugdaw ag dapat nga kabkaban agod mag-ugwad it uman.

⁷ Obraha ra tungod ro Espirito Santo nga gintao katon it Dyos hay owa katon gatao it kataeaw kundi nagatao katon it anang gahom, gugma ag pagpugong sa atong kaugalingon.

⁸ Ngani indi ka magkahuya nga magpamatuod parti sa atong Ginuo, ag indi mo man ako igkahuya nga iya ginpriso dahil sa akong pagwali parti kana, kundi paagi sa gahom it Dyos nga anang ginatao katon hay dapat nga pareho ka kakon nga haom mag-antos dahil sa pagwali ku Mayad nga Balita.

⁹ Ro Dyos ro nageuwas ag nagtawag katon agod mangin anang mga pinaeain nga katawhan nga balaan. Owa ron nana paghimua tungod sa atong hinimuan kundi tungod kato pa't-a, bago gintuga ro kalibutan hay ginplano eon it Dyos nga ipakita katon ro anang sobrang kabuot paagi kay Kristo Jesus.

¹⁰ Ag natuman eon ron tag nag-abot ro atong Maneueuwas nga si Kristo Jesus. Ana nga ginbue-an it gahom ro kamatayon, ag paagi sa Mayad nga Balita hay ana nga ginpasayod ro tanan kon paalin makabaton ro mga tawo it kabuhi nga owa it katapusan.

¹¹ Para gid-a sa pagpasayod ku rayang Mayad nga Balita nga ginbutang ako it Dyos bilang manogwali, apostol ag manogturo.

¹² Ro pagpasayod man ku Mayad nga Balita ro rason nga nagaantos ako iya sa prisuhan. Pero owa ako nahuya nga iya ako ay sigurado ako nga masaligan gid ro akong ginasaligan. Ag kumbinsido man ako nga masarangan nanang amligan ro akong gintugyan kana hasta sa adlaw it paghukom.

¹³ Ro mensahi nga habatian mo nga ginturo ko tag inha pa ako hay sueundanan kon ano ro tama nga doktrina nga dapat man nimong ituro. Ag sa imong pagturo, padayuna gihapon ro imong pagtuo ag paghigugma nga una sa tanan nga may maeueot nga kaangtanan kay Kristo Jesus.

¹⁴ Paagi sa bulig it Espirito Santo nga nagaistar iya katon, haeungi gid nga indi maeaktan it saea ro mahaega nga doktrina nga gintugyan kimo.

¹⁵ Sayod mo nga haeos tanan nga mga tumueuo inha sa probinsya it Asya hay nagtalikod kakon, pati man sanday Figelus ag Hermogenes.

¹⁶ Kabay pa nga pakamaayuhon it Ginuo si Onesiforus ag ro anang panimaeay, ay pilang beses nga ana nga ginpabaskog ro akong buot. Owa nana ako igkahuya, maskin iya ako nakakadena sa prisuhan.

¹⁷ Ana gid-a ngani ako nga gin-inusoy pag-abot nana iya sa syudad it Roma hasta nga ana ako nga hakita.

¹⁸ Ag sayod mo gid nga kaabo-abo ro anang ginbinulig katon inha sa Efeso. Kabay pa nga kaeuy-an gid imaw it Ginuo sa adlaw it paghukom.