2 Tesalonica 3 - Inkeanon

Naghinyo si Pablo nga Pangamuyuan

¹ Mga igmanghod, may amon pa nga ginahambae kinyo. Pangamuyui ninyo kami agod nga ro mensahi hanungod sa Ginuo hay mageapnaag it madasig ag batunon ag pahaegahan it mga tawo pareho ku natabo inha kinyo.

² Ag ipangamuyo man ninyo nga euwason kami sa mga maeain nga tawo iya nga gahimo it owa haeabot, ay abo nga mga tawo iya nga owa nagatuo kay Jesus.

³ Pero ro aton nga Ginuo hay masaligan. Buligan nana kamo agod maglig-on pa gid ro inyong pagtuo ag protektahan nana kamo kay Satanas, ro ginahalinan it kaeainan.

⁴ Ag tungod nga may maeueot kamo nga kaangtanan sa Ginuo hay nagasalig kami nga ginatuman eon ninyo, ag padayon pa gid ninyo nga tumanon ro amon nga ginasugo kinyo.

⁵ Nagapangamuyo kami nga buligan kamo it Ginuo nga maeubtan pa gid ro paghigugma it Dyos para kinyo. Ag kabay pa nga madumduman gid ninyo ro pagtiis ni Kristo ku tanan nga kalisdanan nga haagyan nana agod tuearon ninyo rato.

Dapat Kita Maghugod sa Pagpangita

⁶ Mga igmanghod, dahil sa otoridad nga gintao kamon ku atong Ginuo nga si Jesu-Kristo, ginasugo namon kamo nga likawan ro inyong mga igmanghod sa pagtuo inha nga nagatinamad ag nagapangabuhi nga bukon it suno sa amon nga ginturo kinyo.

⁷ Kamo mismo hay nakasayod nga dapat ninyo nga tuearon ro amon nga ginpakita kinyo nga halimbawa. Owa kami nagtinamad tag inha pa kami.

⁸ Owa kami nagsalig kinyo ku among mga kinahangeanon, kundi nagbaka-baka kami sa pagtrabaho sa adlaw ag gabii agod indi kami magpakalisod kinyo.

⁹ Gin-obra namon ron, bukon it dahil nga owa kami it kinamatarong nga suportahan ninyo, kundi gusto namon nga mangin hueuwaran agod inyo kaming pagatuearon.

¹⁰ Tag inha pa ngani kami kinyo, ginhinambaean namon kamo nga ro owa naila magtrabaho hay indi man pagpakan-on.

¹¹ Ginahambae namon raya it uman tungod nakabalita kami nga may iba inha kinyo nga nagatinamad. Owa sanda nagahugod sa pagpangita pero mahugod 't-a sa pag-intra sa pangabuhi it iba.

¹² Ngani dahil pareho kita nga may maeueot nga kaangtanan kay Ginuong Jesu-Kristo, ginasugo ag ginahinyo namon sa makarayang klasing mga tawo nga magpormal ag magpangita agod may anda mismong pang-adlaw-adlaw.

¹³ Pero kamo ma't-a, mga igmanghod nga mahugod, ayaw kamo magkataka sa paghimo it mayad.

¹⁴ Kon may tawo nga indi magtuman sa amon nga hambae kinyo sa sueat ngara hay tandai ninyo imaw, ag indi kamo mag-iniba kana agod mahuya imaw.

¹⁵ Pero ayaw ninyo imaw pagbilanga nga kaaway kundi hambaei imaw bilang igmanghod ninyo sa pagtuo.

Katapusan nga Pamisaea

¹⁶ Amon nga ginapangamuyo makaron nga ro Ginuo mismo nga ginahalinan it katawhayan hay magatao kinyo permi it katawhay maskin ano ro inyong kahimtangan. Ag ginapangamuyo man namon nga ibhan nana kamo tanan.

¹⁷ Ako mismo nga si Pablo ro nagasueat makaron ku akong pagpangamusta ngara. Makaraya ro akong ginaobra sa kada sueat nakon agod masayran it mga tawo nga halin gid ron kakon ay kilaea nanda ro akong agi.

¹⁸ Kabay pa nga masamitan pa gid ninyo tanan ro sobrang kabuot ku atong Ginuo nga si Jesu-Kristo.