2 Tesalonica 2 - Inkeanon

Ro mga Dapat Matabo Bago Magbalik si Ginuong Jesus

¹ Mga igmanghod, kon parti sa pagbalik ku atong Ginuo nga si Jesu-Kristo ag ro anang pagtipon katon agod mag-iba kana hay ginapangabay ko

² nga indi eagi kamo magpanirbyos ukon magpakueba kon makabati kamo nga nag-abot eon ro Adlaw ku pagbalik it Ginuo. Ayaw kamo it basta pati bisan may nagahambae nga ginpasayod ron it Espirito Santo, o kami kuno ro naghambae o nagsueat karon.

³ Bisan magkainalin hay ayaw gid kamo magpadaea-daea bisan kanyo dahil bago magbalik ro Ginuo hay abo anay nga mga tawo ro magatalikod sa andang pagtuo sa Dyos, ag matunga ro Hari it Pagbaliwala sa *Kasuguan it Dyos, imaw nga owa it ibang paeangpan kundi impyerno.

⁴ Kuntrahon nana tanan ro ginasimba it mga tawo ag tanan nandang ginapakadiyos, ag anang ipabugae nga mas eabaw pa imaw kanda tanan. Maplastar pa ngani imaw sa Templo it Dyos ag anang akuon nga imaw 't-a ro Dyos.

⁵ Owa baea ninyo hadumdumi nga kat inha pa ako hay ginsinugid ko eon kato kinyo ro mga raya ngara?

⁶ Sayod man kamo kon ano ro nagapugong pa makaron sa tawo ngaron agod indi anay imaw magtunga hasta owa pa ro anang oras.

⁷ Nagaamat-amat eon makaron ro pagbaliwala it tawo sa Kasuguan it Dyos pero nagakanabo eang it hipos dahil una pa ro nagapugong karon. Pero kon mag-abot eon ro oras nga bue-on eon it Dyos ro nagapugong ngaron hay

⁸ matunga eon dayon ro Hari it Pagbaliwala sa Kasuguan it Dyos. Pero sa ulihi, kon mag-abot eon si Ginuong Jesus hay maperdi ra imaw. Sa sang huyop eang it Ginuo hay tapos eon imaw.

⁹ Pero bago imaw ra tapuson it Ginuo hay magahimo imaw it mga makangawa-ngawa nga milagro paagi sa gahom ni Satanas. Akuon nana nga ro mga milagro ngaron hay mga pamatuod nga imaw ro Dyos pero pinuril ron.

¹⁰ Ag gamiton nana ro tanan nga klasi it kaeainan sa pagpataeang sa mga tawo nga owa it ibang paeangpan kundi impyerno. Mahamueag ra sanda sa Dyos tungod indi nanda pagpahaegahan ro matuod nga mensahi nga makaeuwas kunta kanda.

¹¹ Ngani, ginataw-an sanda it Dyos it paino-ino nga imposible gid nga magpati kon ano ro matuod agod patihan nanda ro pinuril ku tawo ngato.

¹² Ag sa ulihi, sintinsyahan nga pinahan ro tanan nga imbis magpati sa matuod nga mensahi hay mas nalipay pa nga mag-obra it saea.

Gineaygayan ni Pablo ro mga TagaTesalonica nga Mangin Malig-on sa andang Pagtuo ag Pagtuman sa Ginuo

¹³ Mga igmanghod nga palangga it Ginuo, dapat gid-a nga magpasaeamat kami permi sa Dyos tungod kinyo. Nagapasaeamat kami tungod kato pa eagi hay ginpili eo't-a kamo it Dyos agod anang euwason, paagi sa pagpaeain kinyo it Espirito Santo nga mangin mga balaan kamo nga katawhan it Dyos, ag paagi sa inyong pagtuo sa matuod nga mensahi.

¹⁴ Gintawag nana kamo agod makabaton ku rayang kaeuwasan paagi sa Mayad nga Balita nga ginsugid namon kinyo, agod sa ulihi hay makaambit man kamo ku kadungganan ku atong Ginuo nga si Jesu-Kristo.

¹⁵ Ngani, mga igmanghod, padayon kamo sa pagtuo it malig-on ag huptan it mayad ro amon nga mga ginsugo ag ginturo kinyo tag inha pa kami, ag pati man ro mga ginsueat namon kinyo.

¹⁶ Ginahigugma kita it Dyos. Dahil sa anang sobrang kabuot hay ana kita nga gintaw-an it owa it katapusan nga pagpabaskog it buot, ag kasiguruhan ku atong mayad nga kahimtangan sa ulihi. Nagapangamuyo kami nga ro atong Ginuo mismo nga si Jesu-Kristo ag ro Dyos nga atong Ama

¹⁷ hay magatao kinyo it kaisog it buot ag buligan kamo nga mangin ditirminado permi sa pag-obra ag paghambae it mayad.