2 Tesalonica 1 - Inkeanon

Mga Pagpangamusta ag Pagpasaeamat ni Pablo sa Paghigugma ag Pagtuo ku mga TagaTesalonica

¹ Raya nga sueat hay halin kamon nga sanday Pablo, Silvanus, ag Timoteo. Nagasueat kami kinyo nga grupo it mga tumueuo inha sa Tesalonica nga may maeueot nga kaangtanan sa Dyos nga atong Ama ag kay Ginuong Jesu-Kristo.

² Kabay pa nga masamitan pa gid ninyo ro mga pagpakamaayo ag katawhayan nga halin sa Dyos nga atong Ama ag kay Ginuong Jesu-Kristo.

³ Mga igmanghod, dapat gid-a nga magpasaeamat kami permi sa Dyos tungod kinyo. Ag tama ma't-a ron ay padayon nga nagalig-on pa gid ro inyong pagtuo kay Jesus, ag nagadinugang gihapon ro inyong paghigugma sa kada isaea.

⁴ Mawron nga ginapabugae namon kamo sa mga grupo it mga tumueuo it Dyos sa ibang mga lugar. Ginasugid namon kanda nga bisan ano nga paghingabot ag kalisod ro inyong ginaatubang hay ginatiis ron ninyo ag nagapadayon gihapon kamo sa inyong pagtuo.

⁵ Ro inyong pagtiis sa mga paghingabot nga inyong ginaagyan dahil sa inyong pagtuo hay nagapamatuod nga tama ro desisyon it Dyos sa pagbilang kinyo sa ulihi nga bagay kamo nga itapoe sa anang mga sinakpan.

⁶ Ag dahil matarong ro Dyos kon maghusgar, mawron nga sa ulihi hay anang baeusan it kalisdanan ro mga nagapakalisod kinyo

⁷ ag papahuwayon nana kamo nga ginapakalisdan makaron, pati man kami. Matuman ra kon magbalik eon si Ginuong Jesus halin sa eangit, kaibahan ku anang mga gamhanan nga anghel.

⁸ Kon magpakita eon ro atong Ginuo nga si Jesus hay may galibot kana nga nagadaba-daba nga kaeayo. Ana nga pinahan ro mga indi magkilaea sa Dyos, ag indi magpati sa Mayad nga Balita parti kana.

⁹ Ro pina kanda hay owa it katapusan nga kasamaran nga ro buot hambaeon hay pagkahamueag sa Ginuo hasta sa owa it katapusan. Indi eon gid nanda masamitan ro anang makangawa-ngawa nga gahom.

¹⁰ Matabo ra kanda sa Adlaw nga magbalik imaw. Sa adlaw ngaron hay pagadayawon ag kangawahan imaw ku tanan nga nagatuo kana, sanda nga ginpaeain bilang anang mga katawhan. Mangin kaibahan man kamo nanda tungod ginpatihan ninyo ro among pamatuod parti kana.

¹¹ Imaw ngani nga nagapangamuyo kami permi para kinyo. Ginapangabay namon sa aton nga Dyos nga buligan nana kamo nga magpangabuhi it bagay sa anang mga gintawag nga mangin anang mga balaan nga katawhan. Ag kabay pa nga paagi sa anang gahom hay maobra ninyo ro tanan nga kamaeayran nga gusto ninyong obrahon dahil sa inyong pagtuo.

¹² Kon mahimo ron ninyo hay pagadayawon ro atong Ginuo nga si Jesus dahil kinyo ag kamo man hay dayawon dahil kana. Matabo ra tanan sa sobrang kabuot ku atong Dyos ag ni Ginuong Jesu-Kristo.