2 Pedro 3 - Inkeanon

Sigurado nga Magabalik ro Ginuo

¹ Mga hinigugma, raya ro akong pangaywa nga sueat kinyo. Sa daywa nakon nga sueat ngara hay may mga ginapadumdum ako kinyo agod pukawon kamo agod makapaino-ino kamo it malimpyo ag insakto.

² Gusto ko nga dumdumon ninyo ro mga ginhambae kato anay ku mga balaan nga propeta ag pati man ro mga sugo ku atong Ginuo ag Maneueuwas nga ginturo kinyo ku mga apostoles.

³ Eabi sa tanan, dapat ninyo masayran nga sa ulihing mga inadlaw hay may maabot nga mga paeatuya-tuya ag magapinagusto sa andang mga maeain nga handom.

⁴ Mahambae sanda, “Bukon baea nga nagpromisa si Jesus nga gabalik imaw? Hay siin eon imaw? Nagkaeamatay eon ro atong mga kalolo-lolohan pero owa gihapon imaw mag-abot. Umpisa ku pagtuga it kalibutan hasta makaron hay owa man it ginbag-o, imaw man lang gihapon.”

⁵ Pero bukon ron it matuod. Ginalipatan nanda nga kato anay hay gin-gunaw it Dyos ro bilog nga kalibutan. Ku primero gid hay gintuga it Dyos ro kaeangitan ag ro kalibutan sa ana eang nga hambae. Tubi ro anang gin-gamit sa pagtuga it eugta, ag nagtunga ro eugta halin sa tubi.

⁶ Ag paagi man sa tubi hay anang ginsamad ro kalibutan anay kato tag anang ginpagunaw.

⁷ Ag paagi man sa gahom it anang hambae, ro kalibutan ag kaeangitan nga makita naton makaron hay anang ginapreserbar hasta mag-abot ro adlaw nga anang gintaeana nga ana ra nga sunugon. Matabo ron sa adlaw nga sintinsyahan nana nga pinahan sa impyerno hasta sa owa it katapusan ro tanan nga owa it kahadlok kana.

⁸ Pero ayaw ninyo pagkalipati, mga hinigugma, nga kon sa Ginuo, ro sang adlaw hay matsa 1,000 nga dag-on, ag ro 1,000 nga dag-on hay matsa sang adlaw eang kana.

⁹ Kon makaruyon, indi naton mahambae nga ulihi ro Ginuo sa pagtuman ku anang promisa nga magabalik imaw, bisan makaruyon ro ginahambae it iba. Pero ro matuod hay nagapasensya imaw kinyo, ay owa imaw naila nga may bisan sambilog nga hipinahan sa impyerno, kundi ro anang gusto hay maghinuesoe ag magtalikod ro tanan nga tawo sa andang mga kasae-anan.

¹⁰ Pero maabot gid man ro Adlaw nga mabalik ro Ginuo. Ag ro anang pag-abot hay indi masayran kon hin-uno, pareho it pag-abot it manakaw. Sa ruyon nga Adlaw hay mabatian ro mabaskog nga hagunos sa gulpi eang nga pagkaduea it kaeangitan. Ro adlaw, buean ag mga bituon hay magakaeatunaw sa sobrang kainit. Ro kalibutan ma't-a hay mawasak ag ro tanan nga binuhatan it tawo hay mabulgar.

¹¹ Ngani, kon makaruyon ro magakaeanabo, mauno dapat ro atong batasan? Dapat kita nga magpangabuhi it balaan ag matinumanon sa Dyos

¹² samtang nagahueat kita ag nagahandom nga makaron eo't-a kunta ro adlaw nga himuon it Dyos ro tanan ngaron. Sa adlaw ngaron hay sunugon ro kaeangitan, ngani ro adlaw, ro buean ag ro mga bituon hay magakaeatunaw sa sobrang kainit.

¹³ Pero nagahueat kita sa ginpromisa it Dyos nga bag-o nga eangit ag eugta kon siin ro batasan it tanan nga nagaistar idto hay puro matarong.

¹⁴ Ngani, mga hinigugma, samtang nagahueat kita nga matabo tanan ra hay magmahugod gid kita nga magpangabuhi it limpyo gid ag owa it ikasaway sa panueok it Dyos. Kon makaruyon hay may aton eon nga katawhayan sa atong tagipusuon kon mag-atubang eon kita kana.

¹⁵ Ayaw it kalipat nga dahil ginapasensyahan it Ginuo ro mga tawo hay mas abo ro andang kahigayunan nga maeuwas. Imaw man ron ro ginsueat kinyo ku atong hinigugmang igmanghod nga si Pablo, paagi sa kaaeam nga gintao kana it Dyos.

¹⁶ Parti man karon ro anang ginasambit sa tanan nanang sueat. Ro iba sa anang ginahambae hay malisod maeubtan. Ag ro ibang mga kueabos it pag-intindi ag mapati-patihon hay anda nga ginaeain ro kahueugan ku ginhambae ni Pablo pareho ku andang ginaobra sa iba pang mga parti it Sagrado nga Kasueatan. Dahil sa anda ngarong ginaobra, sanda mismo ro nagadaea it kasamaran sa andang kaugalingon.

Katapusan nga mga Bilin

¹⁷ Ngani mga hinigugma, tungod ginapauna ko eagi kinyo raya tanan, mag-andam kamo sa saea nga ginaturo it mga nagabaliwala sa kasuguan it Dyos. Mag-andam gid kamo agod indi nanda kamo hipataeang ag indi kamo magbaling-baling sa inyong pagtuo.

¹⁸ Padayuna ninyo ro pagkabuhi nga nagapalipay sa Dyos agod masamitan pa gid ninyo ro anang pagpakamaayo ag tinguhaa ninyo nga magdaeom pa gid ro inyong pagkakilaea sa atong Ginuo ag Maneueuwas nga si Jesu-Kristo. Dapat nga dayawon imaw halin makaron hasta sa owa it katapusan. Amen.