2 Pedro 2 - Inkeanon

Pagapinahan Gid sa Ulihi ro mga Nagaturo it Saea

¹ Pero kato anay, sa mga inapo ni *Israel hay may mga nagaako nga propeta man sanda it Dyos, pero nagapakuno-kuno man lang gali. Makaruyon man inha kinyo ay may magaako man nga manogturo sanda it mensahi it Dyos pero bukon ron it matuod. Magaturo sanda it saea nga makasamad sa pagtuo it mga tawo. Ag anda pa nga ipanghiwaea ro Ginuo nga nagtubos kanda. Ngani nagasako ma't-a sanda nga pinahan sa impyerno hasta sa owa't katapusan.

² Abo ro magatuead sa andang owa it hawid-hawid nga pangueag ag tungod karon hay surahon ro mensahi it Dyos, ay ginasugtan kuno ro makaruyon nga klasi it pagpangabuhi.

³ Mga hangoe it kwarta ro mga manogturo ngaron, ngani magaimbento sanda it istorya agod eang makapangkwarta kinyo. Pero hasintinsyahan eon sanda it Dyos kato pa ag matuman gid ron. Owa imaw nagakatueog ag haom imaw nga pinahan sanda sa impyerno hasta sa owa it katapusan.

⁴ Sigurado gid ron, tungod owa ngani nana pagpataliwana ro saea ku mga anghel kato kundi ana sanda nga tinagbong sa kadudueman nga mamingaw sa impyerno, kon siin mat kinadinahan sanda idto hasta sa adlaw nga sintinsyahan sanda ag pinahan.

⁵ Owa man nana pagpataliwana ro kasae-anan ku mga tawo sa tyempo ni Noe kato anay. Gin-gunaw nana ro bilog nga kalibutan ay owa it kahadlok kana ro mga tawo. Pero gineuwas nana ro 8 ka tawo, kaibahan karon si Noe nga nagwinali sa mga tawo nga dapat sanda magpangabuhi it matarong.

⁶ Ginpinahan man it Dyos ro mga tagaSodoma ag Gomora. Ana sanda nga ginsunog, pati ro andang mga syudad hasta natugbang agod mangin halimbawa rato kon mauno imaw magpina sa mga owa it kahadlok kana.

⁷ Pero anang gineuwas si Lot tungod matarong imaw nga tawo ag gasakit ro anang buot gapamantaw sa owa't hawid-hawid nga pangueag ku anang mga kasimanwa nga nagabaliwala sa kasuguan it Dyos.

⁸ Idto anay kato si Lot nagaistar kaibahan nanda, ag dahil matarong imaw nga tawo hay mat ginakuso ro anang tagipusuon, ay adlaw-adlaw hakita ag habatian nana ro mga kaeainan nga ginaobra ku mga nagabaliwala ngato sa kasuguan it Dyos.

⁹ Raya ngara nga nagkaeatabo kato hay nagapakilaea nga antigo ro Dyos mageuwas sa mga matinumanon kana sa mga testing nga ginaagyan nanda. Nagapakilaea man rato nga antigo ro Dyos magpina sa mga bukon it matarong ag maggwardya kanda hasta sa adlaw nga ana eon sandang husgaran.

¹⁰ Pinahan nana eabi eon gid ro mga nagapinagusto sa mga makangingil-ad ag maeain nga handom ku andang eawas ag ro mga nagabaliwala sa bisan anong otoridad. Ro mga manogturo ngaron it saea hay mga owa it huya ag mga matinaas-taason. Owa sanda nahadlok magpakaeain bisan sa mga dapat nandang padunggan.

¹¹ Bisan ro mga anghel nga mas gamhanan pa ngani kaysa sa mga manogturo ngaron it saea hay owa nagakondenar ag nagapakaeain sa atubang it Ginuo ku mga kaibahan nanda nga mga anghel nga nagkasaea't-a kato.

¹² Pero ro mga manogturo't-a ngaron hay nagapakaeain sa mga bagay nga owa nanda maeubti. Pareho sanda it mga sapat nga owa it paino-ino nga gasunod eang sa baeatyagon, ag ro anda eang nga dangatan hay dakpon ag patyon. Dahil sa andang ginaturo ag makasasaea nga pagpangabuhi nga makasamad sa tawo, sanda man mismo hay samaron paagi sa owa it katapusan nga pina kanda sa impyerno.

¹³ Pagabaeusan sanda it kasakit sa masakit nga andang ginaobra. Ro andang kalibangan hay pagpinagusto sa andang maeain nga handom bisan mahayag pa ro adlaw. Kon nagaiba sanda kinyo sa inyong mga pagkaon kaibahan ku pagdumdum ku kamatayon it Ginuo hay ginaluko nanda kamo ay ro anda malang nga ginaobra hay maglinamon ag mag-ininom nga owa it pugong-pugong. Pareho sanda it mantsa ag diperensya nga nagapaeaw-ay sa manami nga eambong.

¹⁴ Nagainusoy sanda it mga bayi nga bisan may asawa hay naila ma't-a maghulid kanda ag owa man sanda it kabueusgan sa andang pagpakasaea. Anda nga ginaingganyo nga magkasaea ro mga maeuya it pagtuo. Pinaligos eon nanda nga batasan ro paghinangoe. Pero indi gid sanda makalikaw sa pina it Dyos sa ulihi.

¹⁵ Nagtalikod eon sanda sa tama nga daean ag nagtaeang. Anda nga gintuead ro maeain nga batasan ku propeta anay nga si Balaam nga unga ni Bosor. Nagsugot imaw nga mag-obra it maeain agod eang makakwarta.

¹⁶ Pero ginbadlong imaw sa ana ngatong saea. Bisan owa gahambae ro mga sapat pero ginpahambae it Dyos ro asno ngato nga ginasakyan ni Balaam. Matsa tawo rato nga naghambae ngani hapugngan imaw sa anang kabungog.

¹⁷ Ro mga manogturo ngaron it saea hay owa it pueos pareho it tuburan nga namaehan ag pareho man it gae-om nga ginaapok it mabaskog nga hangin bago makatueo ro uean. Ginatigan-an eon sanda ku Dyos it lugar nga sobrang kadueom ag kamingaw.

¹⁸ Duyon ro andang dangatan ay nagapangganyak sanda it mga tawo nga bag-o eang nakahilway sa makasasaea nga pagpangabuhi, ag sa impluwensya it mga maeain nga kaibahan nga magbalik sa owa it hawid-hawid nga pangueag. Gapangganyak sanda paagi sa andang mga pahabok-habok nga istorya nga owa it pueos, ag sa pagpukaw sa nagakatueog eon nga maeain nga handom it eawas ku mga tawo ngaron.

¹⁹ Nagapromisa sanda nga hilway eon ro mga nagasunod kanda nga obrahon ro bisan ano nga andang gusto. Pero sa kamatuuran hay sanda ngani mismo hay mga ulipon it pagpakasaea nga nagasamad kanda, tungod ro sangka tawo hay ulipon it bisan ano nga nakaperdi kana.

²⁰ Kon nakakilaea eon ro tawo sa atong Ginuo ag Maneueuwas nga si Jesu-Kristo hay nakahilway eon sanda sa makangingil-ad nga pagpangabuhi iya sa kalibutan. Ugaling kon magpaperdi ag magpaulipon 't-a sanda it uman sa pagpakasaea hay mas maeaot ro andang kahimtangan kaysa sa dati.

²¹ Mas mayad pa kon owa nanda hasayri ro daean kon paalin mangin matarong kaysa sa hasayran nanda ag pagkatapos hay magtalikod sanda sa sagrado nga mensahi it Dyos nga ginturo kanda.

²² Kon magbalik sanda sa pagpakasaea nga anda eon nga gintalikdan hay pareho ron sa mga hambaeunon nga, “Ginadilapan it ayam ro anang suka,” ag “Bisan paligsan mo ro baboy hay maeugaeog man lang gihapon it uman sa eunang.”