2 Pedro 1 - Inkeanon

Mga Pagpangamusta

¹ Raya nga sueat hay halin kakon nga si Simon Pedro, nga isaeang ka ulipon ni Jesu-Kristo ag isaea sa anang mga *apostoles. Nagasueat ako kinyo nga nagatuo man kay Jesu-Kristo nga atong Dyos ag Maneueuwas. Ag tungod nga matarong imaw ag owa it pinaeabi hay paeareho ro pagtuo nga gintao nana katon tanan.

² Kabay pa nga masamitan pa gid ninyo ro mga pagpakamaayo ag katawhayan halin sa Dyos samtang ro inyong pagkakilaea kana ag kay Jesus nga atong Ginuo hay mas nagadaeom.

Ro mga Mayad nga Pamatasan nga Dapat Idugang sa Atong Pagtuo

³ Paagi sa ana mismong gahom hay gintaw-an kita it Dyos it tanan naton nga kinahangeanon agod magkabuhi kita nga matinumanon kana. Nabaton naton ron tungod nakakilaea eon gid kita kana, ag imaw ro nagtawag katon agod makaambit kita sa anang kadungganan ag mayad nga kinaiya.

⁴ Tungod sa anang kadungganan ag mayad nga kinaiya ngaron hay ginpromisahan nana kita it mahaega ag grabi it nami nga mga butang, agod paagi karon hay mangin balaan ag matarong ro atong kinaiya pareho ku ana. Bukon eon kita it pareho ku mga tawo iya sa kalibutan nga indi magpasakop sa Dyos ag ro andang paino-ino ag eawas hay nasamad eon dahil andang ginapinagustuhan ro andang mga maeain nga handom.

⁵ Ngani tungod sa mga raya ngara, tinguhaa gid ninyo nga hidugangan ninyo ro inyong pagtuo it mayad nga kinaiya, ag ro inyong mayad nga kinaiya ngaron hay hidugangan man it pageubot kon ano ro mayad ag bukon.

⁶ Dugangi ninyo ro inyong pageubot ngaron it pagpugong sa kaugalingon, ag ro pagpugong hay dugangi ninyo it pagkamatiniison, ag ro pagkamatiniison hay dugangi pa ninyo it pagkamatinumanon sa Dyos.

⁷ Ro pagkamatinumanon sa Dyos hay dugangan ninyo it pagpalangga sa mga kaigmanghuran sa pagtuo, ag ro paglangga ngaron sa mga kaigmanghuran hay dugangan pa gid ninyo it paghigugma sa tanan nga tawo.

⁸ Ro mga ruyon ngaron ro inyong ginakinahangean tungod kon bugana kamo karon hay magahugod kamo sa pag-obra it mayad, ag mangin mapinuslanon kamo nga mga tawo dahil sa inyong pagkakilaea sa atong Ginuo nga si Jesu-Kristo.

⁹ Pero ro mga tawo nga owa ku raya ngara nga mga batasan hay matsa mga bulag o mga harapon. Halipatan eon nanda nga ginlimpyuhan eon sanda ay ginpatawad eon it Dyos ro tanan nga kasae-anan nga andang nahimo kato.

¹⁰ Ngani, mga igmanghod, tinguhaa gid nga magpadayon ro inyong mayad nga batasan agod masiguro ninyo sa inyong kaugalingon nga pinili gid matuod kamo it Dyos, ag tinawag nga mangin anang mga katawhan. Kon himuon ninyo ron hay indi gid kamo hinandad sa inyong pagsunod sa Ginuo

¹¹ ag grabi gid ro pag-abi-abi kinyo sa lugar kon siin kamo magaistar hasta sa owa it katapusan, kaibahan ku iba pa nga mga ginaharian it atong Ginuo ag Maneueuwas nga si Jesu-Kristo.

¹² Ngani bisan sayod eon ninyo ro akong mga ginahambae ngara, ag malig-on eon ro inyong pagtuo sa kamatuuran nga ginturo kinyo hay padumdumon ko gihapon kamo permi parti kara.

¹³ Kon kakon ngani hay akon gid-a nga obligasyon nga padumdumon kamo myentras iya pa ako sa ibabaw it kalibutan.

¹⁴ Sayod ako nga sa indi magbuhay hay bue-on eon ro akon ngarang hueam nga kabuhi ay ruyon ro ginpasayod kakon ku atong Ginuong Jesu-Kristo.

¹⁵ Pero tinguhaon ko gid nga maidiyahan nga madumduman ninyo ro mga bagay ngara bisan owa eon ako.

Masaligan Gid ro Ginhambae ku mga Propeta it Dyos

¹⁶ Ro among ginsugid kinyo parti sa gahom ku atong Ginuo nga si Jesu-Kristo, ag sa anang pagbalik hay bukon it pareho sa mga sugilanon nga bukon it minatuod nga gintahi-tahi it mga mayad mag-obra karon. Matuod ron tanan tungod nasaksihan gid namon ro anang pagkagamhanan.

¹⁷ Ginpadunggan abi imaw ag gindayaw ku Dyos nga Ama nga may pagkadaeayawon nga owa it katupong paghambae nana, “Unga ko gid-a raya ngara nga palangga ko gid-a. Nalipay gid ako kana.”

¹⁸ Habatian gid namon ro limog it Dyos halin sa eangit nga naghambae karon ay idto't-a kami sa ratong bukid kon siin ginpadunggan it Dyos si Jesus. Idto kami ay gindaea kami kato ni Jesus.

¹⁹ Ag isaea pa hay iya katon ro masaligan gid nga mensahi nga ginsueat ku mga propeta kato anay. Ngani mayad nga inyo gid ron nga inatuhon ay pareho ron it iwag nga nagahayag sa kadueom. Inatuha ron ninyo hasta mag-abot ro adlaw nga magbalik si Kristo ag pahayagon nana it mayad ro inyong paino-ino. Ro anang pagbalik hay pareho it pagtunga ku kabugwason bago magbanaag ro adlaw.

²⁰ Eabi sa tanan hay dapat ninyo maeubtan nga owa it ginhambae nga mensahi ro mga propeta nga nasueat sa Sagrado nga Kasueatan nga anda-anda eang.

²¹ Owa abi it ginhambae nga mensahi ro mga propeta nga halin eang sa andang gusto ag paino-ino kundi ro Espirito Santo ro naggiya kanda sa paghambae nanda it mensahi nga halin sa Dyos.