2 Juan 1 - Inkeanon

¹ Para kimo, haeangdon nga bayi nga pinili it Dyos, ag sa imo man nga mga unga. Ro nagasueat ngara kinyo hay tag ginakilaea nga Ro Magueang. Isaea ako sa mga magueang nga nagadumaea sa mga tumueuo. Hantop gid sa tagipusuon ro akong paghigugma kinyo, ag bukon eang it ako ro nagahigugma kinyo, kundi pati man ro tanan nga nakasayod ku matuod nga mensahi.

² Ginahigugma namon kamo bangod ku matuod nga mensahi it Dyos nga nakatanom gid sa atong paino-ino, ag magapabilin ron hasta sa owa it katapusan.

³ Kon ginatuman naton ro matuod nga mensahi, ag ginahigugma naton ro atong isigkapareho hay masamitan pa gid naton ro mga pagpakamaayo, kaeuoy ag katawhayan nga halin sa Dyos Ama, ag kay Jesu-Kristo nga ana nga Unga.

⁴ Nalipay gid ako it duro pagkasayod ko parti sa imong mga unga nga nagatuman sa matuod nga mensahi it Dyos nga Ama, suno sa anang sugo katon.

⁵ Pero makaron, haeangdon nga bayi, ginapadumdum ko ikaw nga dapat nga maghigugmaanan kita. Bukon it bag-o nga sugo ro akon ngara nga ginasueat kimo, tungod hasayran eon naton ra umpisa pa ku pagtuo naton kay Jesus.

⁶ Ro nagapakita nga ginahigugma matuod naton ro Dyos hay ro aton nga pagtuman sa anang mga sugo. Daya ro pinakapunto ku anang mga sugo: nga maghigugmaanan kita. Umpisa pa ku inyong pagtuo hay habatian eon ninyo nga dapat ninyo ra nga tumanon.

⁷ Abo eon nga mga manogpataeang nga nagaeapnaag sa bisan siin nga parti it kalibutan, nga nagaturo nga si Jesu-Kristo hay owa nangin matuod nga tawo sa anang pag-adto iya sa kalibutan. Ro mga nagaturo it makaruyon hay may paino-ino pareho ku Manogpataeang ag Manogkuntra kay Kristo.

⁸ Ngani mag-andam gid kamo nga indi hipataeang ag mawad-an it pueos ro among kinabudlayan kinyo sa pagturo. Ayaw kamo magbueag sa matuod nga mensahi, agod mabaton ninyo ro husto nga premyo it Dyos.

⁹ Ro tanan nga owa nagapadayon sa pagsunod sa ginaturo ni Kristo, kundi nagaturo it sobra pa karon hay owa it maeueot nga kaangtanan sa Dyos. Pero ro nagapadayon sa pagsunod sa ginaturo ni Kristo hay may maeueot nga kaangtanan sa Dyos nga Ama, ag sa ana nga Unga.

¹⁰ Ngani kon may mag-adto kinyo nga eain ro ginaturo kaysa sa ginaturo ni Kristo hay ayaw pagpasayluha sa inyong baeay, ag ayaw pag-abi-abiha,

¹¹ tungod kon abi-abihon ninyo hay hidaeahig kamo sa anang maeain nga ginaobra.

¹² Abo pa't-a kunta ro akong gustong ihambae kinyo, ugaling hay indi ko eon lang igpaagi sa sueat. Ngani kabay pa nga makaadto ako inha, agod magkilita kita ag magkaistorya it personal, agod mangin tueos gid ro aton nga kalipay.

¹³ Ginakumusta ka man ku mga unga ku imong igmanghod nga bayi, nga pinili man it Dyos.