2 Corinto 9 - Inkeanon

Ro Mayad nga Bunga it Pagkamaatag

¹ Parti ma't-a sa pagtipon it kwarta nga ibulig sa mga kubos nga katawhan it Dyos sa Jerusalem, sayod ko nga owa eon it kinahangean pa nga sueatan ko kamo ag kumbinsihon nga magtao.

² Sayod abi ako nga pursigido't-a kamo nga himuon ron. Ngani ginpinabugae ko sa mga grupo it mga tumueuo iya sa Macedonia nga kamo nga mga tagaAcaya hay haom eon sa pagbulig ku isaea pa ngatong dag-on. Ag dahil sa inyong pagkapursigido ngaron, ro kaeabanan kanda hay ginanahan man nga mag-amot.

³ Pero ginapaadto ko inha si Tito ag ro daywa pa ngatong kaigmanghod nga ginsambit nakon ku hauna agod buligan nanda kamo nga tipunon ro inyong amot agod haom eon don ag makita nga ro akong ginpinabugae parti kinyo hay bukon it puro eang sugid.

⁴ Kon bukon pa it haom ro inyong amot pag-abot nakon kaibahan ku mga tagaMacedonia nga gamunot kakon hay makahueuya ron katon tanan.

⁵ Ngani naisip ko nga mas mayad nga umuna eon lang sanday Tito inha agod ro inyong gintug-an nga amot hay haom eon bago ako inha mag-abot. Kon makaruyon hay gapakita nga ro inyong pagtao hay hantop gid sa inyong tagipusuon ag bukon eang it dahil nga hapilitan kamo.

⁶ Tandai ninyo ra. Kon sangkiri ro gintanom hay sangkiri man ro anihon. Pero kon abo ro gintanom hay abo man ro anihon.

⁷ Kon magtao kita hay dapat nga isipon anay naton kon man-o ro nailaan natong itao nga may kalipay it buot. Bukon it mayad nga nagatao ro sangka tawo ag pagkatapos hay nasubo imaw ay gintao nana rato o ginaisip nana nga ginpilit imaw. Nalipay gid abi ro Dyos sa nagatao nga may kalipay.

⁸ Makasarang ro Dyos nga pakamaayuhon kamo it bugana agod bugana gid kamo permi sa tanan nga inyong kinahangean ag agod abo gihapon nga sobra nga ikabulig man ninyo sa iba.

⁹ Pareho ra sa nasueat sa Sagrado nga Kasueatan, “Abo gid imaw magtao, ag ana permi nga ginabuligan ro pobre. Ro anang matarong nga buhat hay indi malipatan hasta sa owa't katapusan.”

¹⁰ Nagatao ro Dyos it binhi sa manogtanom ag ginapatubo na ra agod mangin pagkaon. Sa makaruyon man nga paagi, taw-an nana kamo it sobra sa inyong kinahangean agod may inyong ikatao sa iba nga pareho it pagtanom. Ag ro resulta karon hay padayon nga paabuon it Dyos ro inyong binhi nga ginatanom agod ro tubas ku inyong matarong nga buhat hay bugana gid.

¹¹ Pagapabuganaon kamo it Dyos sa tanan nga butang agod mangin maatag man kamo permi sa iba. Ag kon ikahatod eon namon ro inyong amot sa mga nagakinahangean sa Jerusalem hay abo gid ro magapasaeamat sa Dyos.

¹² Ngani daywa ro mangin bunga ku inyong pagserbi ngaron sa mga kapareho ninyong tumueuo. Ro una hay mabuligan ro mga katawhan it Dyos nga nagakinahangean, ag ro ikaywa hay mangin abo gid ro mga magapasaeamat sa Dyos.

¹³ Kon mabaton ku mga nagakinahangean sa Jerusalem ro inyong bulig hay makita nanda nga matuod gid ro inyong ginhambae nga nagatuo kamo sa Dyos ag nagasunod kamo sa Mayad nga Balita. Anda man nga pagadayawon ro Dyos dahil sa inyong bulig kanda ag sa iba pa.

¹⁴ Ag dugang pa karon hay pangamuyuan nanda kamo permi ag mangin maeapit gid kamo sa andang tagipusuon dahil sa sobrang kabuot it Dyos kinyo nga nagtueod kinyo nga magmaatag gid kanda.

¹⁵ Aton nga pasaeamatan ro Dyos dahil sa anang gintao katon nga ro haega hay indi sarang ikapaathag it mga pamisaea.