2 Corinto 8 - Inkeanon

Gineaygayan ni Pablo ro mga TagaCorinto nga Mangin Maatag sa mga Kubos nga Tumueuo sa Jerusalem

¹ Makaron mga igmanghod, gusto namon nga ipasayod kinyo ro mayad nga ginhimo ku mga grupo it mga tumueuo sa probinsya it Macedonia paagi sa bulig it Dyos kanda.

² Bisan ginatinestingan ro andang pagtuo paagi sa grabing kalisod hay duro gihapon ro andang kalipay. Ruyong kalipay ag ro andang ginaagyan nga grabing kapobrehon ro nagtueod kanda nga mangin maatag gid sa iba.

³ Mapamatud-an ko nga nagtao sanda bukon it kon ano eang ro andang masarangan kundi mas pa gid karon, ag owa it nagpilit kanda karon.

⁴ Sanda pa ngani ro naghininyo kamon nga taw-an sanda it pribilihiyo nga makaamot man sa bulig nga ginatao sa mga kapareho nanda nga katawhan it Dyos sa Jerusalem.

⁵ Sobra-sobra ro andang gintao sa among ginapaabot nga itao nanda. Anda anay nga ginpasakop ro andang mga kaugalingon sa Ginuo ag kamon man dahil sayod nanda nga ruyon ro kabubut-on it Dyos.

⁶ Ngani, dahil kumpleto eon ro andang inogbulig, amon man nga ginhinyo si Tito nga magbalik inha kinyo agod buligan nana kamo nga tapuson ro inyong pagtipon it kwarta nga inogbulig ninyo, tutal imaw ro nagpaumpisa karon kinyo kato.

⁷ Kamayad-mayad kamo sa abong bagay. Halimbawa hay sa inyong malig-on nga pagtuo, sa inyong ikasarang sa pagturo, sa inyong abo nga hasayran, sa inyong kahugod sa pagsunod sa Dyos, ag sa inyong mabahoe nga paghigugma sa iba nga nakita man ninyo kamon. Ngani kabay pa nga mayad man kamo pati sa inyong kaatag sa pag-amot sa inogbulig ngato.

⁸ Owa ako nagasugo kinyo. Ginasugid ko man lang kinyo nga pursigido gid ro iba nga mag-amot agod kon sundon ninyo ro andang halimbawa hay dikaron ko masayran nga minatuod ro inyong gugma sa inyong isigkatumueuo.

⁹ Kabay pa nga pursigido man kamo mag-amot ay sayod ninyo ro sobrang kabuot ku atong Ginuo nga si Jesu-Kristo. Bisan manggaranon imaw sa eangit hay nagpakapobre imaw para kinyo paagi sa anang pagpakatawo iya sa kalibutan agod paagi karon kamo hay mangin manggaranon.

¹⁰ Ngani daya ro akon nga mahambae kinyo. Ku isaeang dag-on hay gusto gid ninyo magtao it bulig sa mga kubos idto sa Jerusalem, ag gin-umpisahan eon ngani ninyo ro pagtipon it inyong inogtao. Ngani para man sa inyong kamaeayran kon padayunon ninyo ron

¹¹ hasta matapos. Paagi karon hay makumpleto dayon ninyo ro inyong gusto gid nga obrahon ngato. Ngani magtao kamo suno sa inyong masarangan.

¹² Kon magtao kita suno sa atong masarangan hay nalipay ro Dyos karon basta nagatao kita dahil nga gusto gid naton ron nga himuon. Owa ma't-a ro Dyos nagapaabot it indi naton masarangan.

¹³ Owa ako nagahambae nga buligan ninyo ro mga ginakueang ag pagkatapos hay kamo man dayon ro ginakueang. Ro akon hay tag parehas kamo nga indi mawad-an.

¹⁴ Sa makaron nga kamo ro bugana hay makabulig kamo sa mga nagakinahangean. Ag halimbawa abi nga magkinahangean man kamo sa ulihi ag sanda eon ro bugana hay makabulig man sanda kinyo. Kon makaruyon hay ro kinahangeanon it kada isaea hay mapun-an eon.

¹⁵ Pareho ra sa nasueat sa Sagradong Kasueatan parti sa mga tawo kato nga nagpamueot it pagkaon nga manna nga gintao it Dyos. Suno dikato, “Ro nagbuoe it abo hay owa man it habilin nga sobra ag ro nagbuoe it sangkiri eang hay owa man pagkueanga.”

Ro Plano ni Pablo Kon Paalin Ihatod ro Inogbulig it mga TagaCorinto

¹⁶ Nagapasaeamat ako sa Dyos dahil gintaw-an man nana si Tito it kapursigido sa pagbulig kinyo pareho man kakon.

¹⁷ Matuod ron dahil nalipay imaw nga tumanon ro among pangabay kana nga mag-adto inha kinyo it uman. Ag bukon eang it duyon, pursigido gid imaw nga bisitahan kamo ay nakadesidir eon imaw karon bisan bago pa namon imaw ginpangabay.

¹⁸ Amon man nga pamunton kay Tito ro isaea sa atong mga kaigmanghuran nga bantog sa tanan nga mga grupo it mga tumueuo iya dahil sa anang kamayad sa pagwali ku Mayad nga Balita.

¹⁹ Imaw 't-a ro ginpili ku mga grupo it mga tumueuo iya nga magmunot kamon sa paghatod sa Jerusalem ku inyong hatipon nga bulig pati ro ana ku ibang mga grupo it mga tumueuo. Amon nga dahanan ro kwarta ngato agod ro Ginuo mismo hay dayawon. Ag agod mapakita man namon ro amon nga kapursigido sa pagbulig sa atong mga kaibahan nga una sa malisod nga kahimtangan.

²⁰ Nagadahan gid kami sa pagbuyot ku mabahoe ngara nga kantidad agod owa gid it ikasaway kamon dahil kara.

²¹ Gusto namon nga ro among buhat hay tama, bukon eang it sa mata it Dyos kundi pati man sa mata it tawo.

²² May sangka igmanghod pa gid kita nga amon nga ginapamunot kanda sa pag-adto inha kinyo. Hapamatud-an eon ron namon imaw it makapilang beses ag sa abo man nga bagay nga pursigido gid-a imaw sa pagbulig sa oeobrahon para sa Ginuo. Ag makaron hay mas pa gid ro anang pagkapursigido sa pagbulig kinyo dahil sa anang mabahoe nga pagsalig kinyo nga seryoso kamo magsunod sa Ginuo.

²³ Kon parti ma't-a kay Tito hay kaibahan ko ron imaw ag katimbang sa pagserbi kinyo. Ro anang mga kaibahan ma't-a ngaron hay mga tigeawas ku mga grupo it mga tumueuo iya ag paagi kanda hay ginapinadunggan si Kristo.

²⁴ Ngani paagi sa inyong inogbulig, pakitaan man ninyo sa mga tigeawas ngaron ro inyong gugma sa mga nagakalisod sa Jerusalem. Kon himuon ninyo ron hay mapamatud-an man nga ro among pagpabugae parti kinyo hay matuod.