2 Corinto 7 - Inkeanon

¹ Mga pinalangga ko, tungod raya ngara tanan hay ginpromisa katon it Dyos, aton eon nga talikdan ro tanan nga maeain nga buhat ag maeain nga paino-ino nga nagapahigko katon sa mata it Dyos. Ag magtinguha kita nga magpangabuhi nga ro ginahimunta hay mangin balaan gid kita dahil ginataha naton imaw.

² Taw-i man kami it lugar sa inyong mga tagipusuon dahil owa gid kami it ginhimo nga saea kinyo. Owa man kami it gin-obra nga makasamad kinyo ag owa man kami it ginluko.

³ Owa ako gahambae kara agod kondenaron kamo. Matuod ro akong ginhambae nga palangga namon kamo hasta nga buhi kami ag bisan pa mamatay kami dahil kinyo.

⁴ Mabahoe gid ro akong salig kinyo ag ginapabugae ko gid kamo permi sa iba. Sa tanan nga kalisod nga ginaagyan namon hay ginapabaskog ro akong buot ag nalipay gid ako it duro.

Nalipay si Pablo ay ro Anang Hauna nga Sueat sa mga tagaCorinto hay May Mayad nga Resulta

⁵ Ku pag-abot namon iya sa Macedonia hay owa gid kami it pahuway. Permi lang kaming gaagi it tanang klasing kalisod. Permi kaming ginainaway ku mga nagakuntra kamon ag abo nga mga bagay nga nagapanirbyos kamon.

⁶ Pero ro Dyos nga nagapabaskog sa buot ku mga nadueaan eon it pageaom hay nagpabaskog sa among buot paagi sa pag-abot ni Tito iya.

⁷ Bukon eang it dahil nga nag-abot imaw hay nagbaskog ro among buot kundi dahil man sa anang ginsugid kamon kon paalin nagbaskog ro anang buot dahil kinyo. Ginsugid nana kamon nga gusto gid ninyo nga makita ako it uman ag maemae ro inyong pagnuoe ag kasubo sa inyo katong gin-obra nga maeain. Sinana pa gid hay pursigido eon kuno kamo nga depensahan ako sa mga nagapakaeain kakon ngani mas nalipay pa gid ako.

⁸ Owa ako naganuoe nga ginpadaehan ko kamo ku sueat ngato nga nagapangisog kinyo ugaling hay nasubo ako nga ginpasubo kamo kato it madaling oras.

⁹ Pero nagakalipay man ako makaron bukon it dahil sa nagkasubo kamo kundi dahil nga ro inyong kasubo hay nagtueod kinyo sa paghinuesoe ag pagtalikod sa inyong mga saea. Ro inyong kasubo hay suno sa kabubut-on it Dyos agod nga ro among sueat ngato hay indi magbunga it ikaduea ku inyong pagtuo.

¹⁰ Ro kasubo nga suno sa kabubut-on it Dyos hay ro kasubo nga gapahinue-soe sa mga tawo ag gapatalikod kanda sa andang saea ag gadaea ron kanda sa kaeuwasan. Ngani indi dapat nga nue-an ro kasubo nga makaruyon. Pero ro kasubo ku mga owa nagatuo hay indi kanda makapatalikod sa saea ag magadaea ron kanda sa kamatayon nga owa it katapusan nga pina sa impyerno.

¹¹ Paino-inoha ninyo ro kamaeayran nga resulta it inyong kasubo ngato nga suno sa kabubut-on it Dyos. Isaea sa kamaeayran kato hay owa kamo nagpundo hasta owa naayos ro saea inha kinyo nga ginsueat ko ngato, agod ipakita nga owa eon ninyo ginakunsinti ro saea ngato. Naakig kamo it duro dahil sa saea nga gin-obra it tawo ngato. Nahadlok kamo nga pinahan it Dyos ay ginsugtan ninyo rato nga matabo. Gusto gid ninyo nga magbalik ro atong mayad nga relasyon. Nangin pursigido kamo nga pinahan ro nagkasaea ngato. Ginpakita ninyo nga inyo gid nga gin-ayos ro tanan nga dapat nga ayuson ag owa eon it ikasaway kinyo.

¹² Ngani bukon eang it para sa nagkasaea o sa gin-obrahan it saea ro akong sueat ngato. Ro akong pinakatuyo sa pagsueat kinyo hay agod sa mata it Dyos hay makamaeasmas kamo, nga sa minatuod hay palangga ninyo kami ag ganado gid kamo nga magtuman sa among ginaturo.

¹³ Nagbaskog ro among buot dahil karon. Ag isaea pa hay nalipay pa gid kami dahil hakita namon nga malipayon gid si Tito. Naduea eon abi ro anang kabangat kinyo dahil sa mayad ninyo tanan nga pagbaton sa sueat ngato.

¹⁴ Bago imaw mag-adto inha hay gindinayaw ko kamo kana ag owa ako mahuy-i karon. Hapamatud-an abi nana nga matuod ro akong ginpabugae kana parti kinyo pareho sa tanan namong ginsugid kinyo nga matuod man.

¹⁵ Ngani mas palangga kamo ni Tito makaron ay ginadumdum nana nga ginbaton ninyo imaw nga may katahap ag grabing respeto, ag gintuman ninyo tanan ro mga ginbilin sa akong sueat ngato.

¹⁶ Ngani nalipay gid ako it duro makaron ay sigurado eon ako nga sa tanan nga bagay hay gusto eon ninyo permi nga himuon kon ano ro tama.