2 Corinto 5 - Inkeanon

Sa Ulihi, ro mga Tumueuo hay Makabaton it Bag-o nga Eawas nga Owa it Pagkamatay

¹ Ro sangka halimbawa kara hay ro atong eawas ay sayod eon naton nga bisan mamatay kita hay taw-an kita it Dyos it bag-o nga eawas idto sa eangit. Ro eawas nga itao katon hay bukon it halin sa tawo kundi sa Dyos mismo ag magakabuhi rato hasta sa owa it katapusan.

² Hasta owa pa natabo ron hay matsa nagapanghayhay kita ay nagahandom gid kita nga mabayluhan eon ro atong eawas ngara it eawas nga halin sa Dyos.

³ Ag sambilog pa nga rason kon ham-an it gusto naton it bag-o nga eawas hay owa abi kita naila nga owa eon it eawas ro atong espirito kon aywanan eon naton ro atong eawas ngara.

⁴ Myentras nga iya pa kita sa aton ngarang eawas hay matsa nagapanghayhay kita dahil ginalisdan kita. Owa ako gahambae nga nagapanghayhay kita dahil nga gusto eon natong mamatay agod aywanan naton ro atong eawas ngara nga nagakamatay kundi gusto naton nga mabayluhan eon ra it eawas nga nagakabuhi hasta sa owa it katapusan.

⁵ Ro Dyos gid ro nagpahaom katon nga mabaton ra ag nagtao ku anang Espirito bilang garantiya nga ana gid ra nga obrahon katon.

⁶ Dahil karon hay maisog gid permi ro among buot. Sayod man kami nga myentras iya pa kami sa among eawas ngara hay owa pa kami sa lugar kon siin idto ro Ginuo.

⁷ Pero sigurado kami nga makaabot gid kami idto ay owa kami nagapangabuhi nga nabase sa kon ano ro makita ku among mga mata kundi nagapangabuhi kami nga nabase sa among pagtuo sa ginhambae it Dyos nga matabo sa paeaabuton.

⁸ Mawron nga maisog ro among buot ag igakalipay namon kon aywanan eon namon ro among eawas ngara ag magsaylo sa amon gid mismo nga ilistaran kon siin idto ro Ginuo.

⁹ Ngani amon gid-a nga ginatinguha nga amon imaw nga mataw-an it kalipay maskin iya pa kami o idto eon kaibahan nana.

¹⁰ Ginatinguhaan namon ron ay kita tanan hay dapat nga ipaatubang kay Kristo nga magahukom katon, agod ro kada isaea hay makabaton it baeos suno sa anang binuhatan kat nagakabuhi pa imaw iya sa kalibutan, mayad man o maeain.

¹¹ Ngani dahil sayod namon nga makahaeadlok ro paghukom it Ginuo, mawron nga nagapangabudlay kami nga kumbinsihon ro mga tawo nga magpati sa Mayad nga Balita. Hasayran it Dyos nga ro among batasan ag motibo hay mayad ag gaeaom ako nga hasayran man ra ninyo.

¹² Basi mag-isip euman kamo nga nagapadayaw-dayaw kami kinyo sa among ginhambae ngaron. Ro amon man lang hay agod may ikadepensa kamo kamon sa mga tawo inha nga nagapakaeain kamon. Ro ginapahaegahan eang ku mga tawo ngaron hay ro mataas nga kahimtangan sa pagpangabuhi, bukon it ro mayad nga kabubut-on.

¹³ Kon sa isip it iba hay mga kaumangon kami hay indi bali dahil ro among ginaobra hay para sa kadayawan it Dyos. Ag kon sa iba ma't-a hay mayad ro among paino-ino, sayod gid ninyo nga ro among ginaobra hay para sa inyong kamaeayran.

¹⁴ Ro paghigugma ni Kristo sa tanan nga tawo ro nagagahom kamon sa tanan namong ginahimo. Ro ebidensya ku gugma ngaron hay nga namatay imaw bilang sal-i it tanan, ngani ro anang kamatayon hay ginakabig nga kamatayon man it tanan nga tawo.

¹⁵ Namatay imaw para sa tanan agod ro makabaton it bag-ong kabuhi halin kana hay magakabuhi nga bukon eon it ro andang gusto ro ginatuman, kundi ay Kristo nga namatay ag nabanhaw para kanda.

¹⁶ Ngani makaron, ro among pagtan-aw sa tawo hay bukon eon it nabase sa kon ano ro among makita kanda nga pangguwa eang. Kato anay, ro amon nga pagtan-aw kay Kristo hay makaruyon man, pero makaron hay eain eon ay hasayran eon namon nga bukon eang imaw it tawo.

¹⁷ Makaruyon ro nagakatabo sa bisan sin-o nga may maeueot nga kaangtanan kay Kristo. May ana eon nga bag-o nga pagkatawo. Ro anang dati nga paino-ino, batasan ag pagpangabuhi hay ginbag-o eon.

¹⁸ Ro Dyos ro nag-obra kara tanan. Paagi sa kamatayon ni Kristo, ginbuoe it Dyos ro atong saea agod may aton eon nga mayad nga relasyon kana. Ag anang gintugyan kamon ro among oeobrahon nga magturo sa mga tawo kon paalin magmayad ro andang relasyon sa Dyos.

¹⁹ Ginaturo namon ro mensahi nga paagi sa kamatayon ni Kristo hay nag-obra ro Dyos it paagi agod puydi nana hibilang nga owa eon it mga pageapas ro tawo kana. Daya ro mensahi nga gintugyan nana kamon nga ituro, agod magmayad ro andang relasyon sa Dyos.

²⁰ Ngani mga representanti kami ni Kristo ag matsa ro Dyos mismo ro nagahambae sa mga tawo kon nagahinyo kami kanda nga magpasakop sanda sa Dyos agod magmayad eon ro andang relasyon kana.

²¹ Bisan owa gid it saea si Kristo, ginbilang imaw it Dyos nga imaw 't-a ro nag-obra it atong mga saea. Ag ginpinahan imaw it kamatayon dahil karon agod bilangon kita it Dyos nga matarong sa anang panueok.