2 Corinto 4 - Inkeanon

Ginturo nanday Pablo it Klaro gid ro Mayad nga Balita Agod ro Una pa sa Kadueom hay Mahayagan

¹ Dahil sa sobrang kabuot kamon it Dyos hay gintugyanan nana kami ku dayang pagserbi kana paagi sa pagwali ku Mayad nga Balita, ngani owa kami ginapangeuyahi it buot.

² Sa amon nga pagturo hay nagalikaw gid kami sa mga tinago nga mga motibo nga makahueuya ag owa man kami gapataeang it tawo. Owa man namon ginabayluhi ro mensahi it Dyos kundi ginaturo namon ro kamatuuran it klaro ag diritso ag sayod it tanan nga matuod ro among ginaturo ngaron, kon batunon eang ku andang konsensya. Ag sayod man it Dyos nga matuod ro among ginaturo.

³ May una gid ma't-a nga nadueman ro andang paino-ino nga indi't-a sanda kaeubot ku Mayad nga Balita nga among ginawali. Pero makaruyon ron dahil indi ma't-a sanda magpati ag owa sanda it ibang paeangpan kundi impyerno.

⁴ Ro andang paino-ino hay ginapadueom ni Satanas nga nagapadiyos-diyos sa rayang tyempo. Mawron nga indi sanda mahayagan it Mayad nga Balita nga nagasugid ku pagkadaeayawon ni Kristo nga imaw ro nagapakita kon mauno gid ro Dyos.

⁵ Owa namon ginawali ro among kaugalingon nga matsa importanti kami kundi ginawali namon si Jesu-Kristo. Ginawali namon nga imaw ro Ginuo ag kami hay nagaserbi kinyo dahil kana.

⁶ Ginahimo namon ra dahil ro Dyos nga naghambae nga maghayag eon tag madueom pa't-a ro kalibutan hay imaw man ro nagpahayag sa among kaisipan agod maeubtan namon nga una kay Jesu-Kristo ro pagkadaeayawon it Dyos.

Pursigido sanday Pablo nga Magwali ku Mensahi Parti kay Jesus dahil Mahaega ra nga Mayad

⁷ Pero kami ma't-a hay pareho it kueon nga madali mapusa nga ginsudlan it grabi kamahae nga manggad dahil gintugyan it Dyos ro mayad nga balita nga grabi it mahae kamon nga mga tawo man lang. Ginhimo nana ron agod ipakita nga ro gahom nga eabaw sa tanan nga makita sa mayad nga bunga ku among pagwali hay halin sa Dyos ag bukon it halin sa among kaugalingon.

⁸ Permi kami nga gaagi it tanang klasing kalisdanan pero owa kami nagapaperdi. Kon amat hay nagalitik ro among ueo pero owa kami nadudueai it pageaom.

⁹ Ginahingabot kami it mga tawo pero owa man kami ginapabay-i it Dyos. Kon amat hay haeos patyon eon kami pero buhi pa gihapon.

¹⁰ Sa among pag-antos it mga kasakit ag mga paghingabot hay matsa nagaambit man kami it pas-an ku mga makaruyon nga haagyan ni Jesus hasta sa anang kamatayon agod makita sa among kabuhi kon paalin ro anang pagtiis ku mga butang ngato.

¹¹ Matuod nga bisan adlaw-adlaw hay sa peligro ro among kabuhi dahil sa among pagserbi kay Jesus, owa nana ginapasugti nga mamatay kami agod makita it tanan nga buhi matuod imaw dahil ana kami nga ginaeuwas sa kamatayon.

¹² Ngani bisan permi eang kami nagaatubang it kamatayon, ro bunga karon hay makabaton kamo it kabuhi nga owa it katapusan.

¹³ Nasueat sa Sagrado nga Kasueatan nga, “Nagtuo ako sa Dyos, mawron nga naghambae ako parti kana.” Makaruyon man do among pagtuo sa Dyos, ngani padayon kami nga nagawali parti kay Jesus.

¹⁴ Ginaobra namon ra dahil sayod kami nga ro Dyos nga nagbanhaw kay Ginuong Jesus hay imaw man ro magabanhaw kamon, dahil sa amon nga maeueot nga kaangtanan kay Jesus. Pareho man karon ro ana nga obrahon kinyo ag pagkatapos hay ana kita nga bue-on ag daehon kon siin man imaw.

¹⁵ Ro tanan nga ginaagyan namon dahil sa among pagwali hay para sa kamaeayran ninyo nga mga ginatud-an namon agod mangin abo gid ro mga tawo nga makaambit ku pagpakamaayo it Dyos dahil sa andang pagtuo. Kon matabo ron hay mas abo man dayon ro gapasaeamat kana ag duyon hay sa kadayawan nana.

¹⁶ Ngani owa kami ginapangeuyahi it buot sa among pagserbi sa Dyos ay bisan ro among eawas hay amat-amat nga nagaeuya pero ro bag-ong kabuhi nga halin sa Espirito Santo nga iya kamon hay padayon nga ginapabaskog adlaw-adlaw.

¹⁷ Ro among ginaagihan nga kalisod makaron hay owa sa kumaingking kon ikompara sa kon ano ro atong mabaton sa ulihi. Ro mga kalisod abi ngaron hay magaresulta sa sobrang kanami nga kahimtangan sa eangit nga indi matupungan ag owa it katapusan.

¹⁸ Ngani ro amon nga mga paino-ino hay owa nakasentro sa mga butang nga makita iya sa kalibutan kundi sa mga butang nga idto eang makita sa eangit. Ro mga butang nga makita iya sa kalibutan hay agi eang pero ro butang nga indi naton makita makaron nga idto sa eangit hay owa it katapusan.