2 Corinto 3 - Inkeanon

Ro mga Mayad nga Resulta ku Pagwali ni Pablo hay Nagapakita nga Matuod Imaw nga Apostol

¹ Basi nagaisip eon man kamo nga nagapinuril kami ag ginadayaw eang namon mismo ro among kaugalingon sa amon ngarang ginahambae. Ham-an it himuon pa namon ron? Hakita eon ninyo ro mayad nga resulta ku among pagwali inha kinyo. Owa eon kami gakinahangean nga magtao kinyo it sueat nga halin sa iba nga nagapamatuod ku among buhat bilang mga apostoles. Ag owa man kami nagakinahangean it makaruyon nga sueat halin kinyo agod ipakita sa iba. Bukon kami it pareho sa iba nga nagahimo karon.

² Kamo't-a mismo ro among pinakasueat ay ro natabo kinyo dahil sa among pagwali hay pamatuod ku among buhat inha kinyo. Sayod namon ra sa among tagipusuon ag klaro man ron sa tanan nga nakasayod kon ano ro natabo kinyo.

³ Klaro gid nga pareho kamo it sueat nga gin-obra ni Kristo paagi sa among pagdipara kinyo sa among pagwali it mensahi it Dyos. Ro una sa sueat hay parti sa inyong bag-o nga kabuhi ag ro Espirito it buhi nga Dyos ro tinta nga gin-gamit sa pagsueat karon. Ag owa ron nasueat sa tapyas nga bato pareho sa *Kasuguan ni Moises kundi sa tagipusuon it tawo.

⁴ Sayod gid namon nga ro amon ngarang ginahambae hay matuod dahil ro Dyos ro among ginasaligan nga magbulig kamon paagi kay Kristo.

⁵ Sayod namon nga indi namon mahimo ro trabaho nga ginsalig kamon it Dyos kon magsalig eang kami sa among kaugalingon. Pero ro among ikasarang nga mahimo ron hay halin sa Dyos.

⁶ Imaw ro nagatao it ikasarang agod amon nga ikaturo ro parti sa anang bag-ong kasugtanan nga anang gintao sa tawo. Rayang bag-ong kasugtanan kon paalin ro tawo maeuwas hay owa nabase sa pagtuman sa Kasuguan ni Moises dahil garesulta eang ron sa pina nga owa it katapusan sa impyerno, dahil owa it tueos nga makatuman ku Kasuguan. Pero sa bag-o nga kasugtanan, ginapahayag katon it Espirito it Dyos ro bag-o nga paagi kon paalin maeuwas ro tawo. Ag kon tumanon naton ro paagi ngaron hay makabaton kita it kabuhi nga owa it katapusan.

Ro Bag-o nga Kasugtanan hay Mas Eabaw pa Kaysa sa Hauna nga Kasugtanan

⁷ Ro hauna nga kasugtanan hay ginbase sa pagsunod it mga tawo sa Kasuguan nga ginsinsil sa mga tapyas nga bato pero nagadaea ron sa tawo sa kamatayon nga owa it katapusan nga pina dahil owa gid it makatuman it tueos sa Kasuguan. Pero bisan makaruyon, pagtao it Dyos kay Moises ku Kasuguan ngato hay nangin masilaw ro anang uyahon dahil nakapaeapit imaw sa Dyos. Ngani tag gintao eon ni Moises ro Kasuguan sa anang mga kapareho nga inapo ni *Israel hay indi sanda kana katueok dahil nasilawan sanda bisan pa nagaamat-amat eon it hina ro kasilaw ku anang uyahon. Ngani kon hakita ro pagkadaeayawon it Dyos ku pagtao ku Kasuguan nga nagadaea sa tawo sa kamatayon,

⁸ mas kapin pa gid nga makita ro anang pagkadaeayawon sa tyempo ngara makaron kon siin ro tawo hay ginaistaran ag ginagiyahan it Espirito Santo.

⁹ Kon daeayawon abi ro hauna nga paagi nga gintao it Dyos bisan nagresulta ra nga sintinsyahan it pina nga owa it katapusan ro tawo hay mas kapin pa gid nga daeayawon ro anang bag-o nga paagi kon siin mangin matarong ro tawo sa anang panueok.

¹⁰ Bisan daeayawon abi ro hauna nga paagi ngato hay matsa bukon eon rato it daeayawon ay gineabawan eon rato ku bag-o ngara nga paagi nga gintao it Dyos.

¹¹ Kon daeayawon ngani ro hauna ngato nga paagi nga nagalipas eon ay ginabayluhan eon it bag-o makaron hay mas kapin pa gid ro bag-o ngara nga nagapabilin hasta sa owa it katapusan.

¹² Ngani, dahil kumbinsido kami nga matuod 't-a ro tanan ngara nga ginahambae namon mawron nga owa kami it kahadlok nga magwali parti kara.

¹³ Bukon kami it pareho kay Moises nga nagtinabon ku anang uyahon agod indi masayran ku anang mga kapareho nga inapo ni Israel nga naduea eon gali ro kasilaw kato.

¹⁴ Pero ro mga *Judio ngato hay nangin bundoe. Bisan ngani ro mga Judio sa makaron nga tyempo, kada nagapamati sanda sa hauna nga kasugtanan nga gintao it Dyos nga ginabasa it mabaskog sa *sinagoga hay matsa natabunan gihapon ro andang paino-ino ay owa sanda kaeubot karon. Raya nga matsa nagatabon sa anda nga paino-ino hay mabuoe eamang kon ro tawo hay magtuo kay Kristo.

¹⁵ Umanon ko nga bisan ngani hasta makaron, kon ginabasa it mabaskog ro mga ginsueat ni Moises hay matsa ginatabunan gihapon ro andang paino-ino ag matsa bato ro andang tagipusuon.

¹⁶ Pero kon magtalikod ro tawo sa andang dati nga ginasaligan agod maeuwas ag magdangop ag magpasakop sa Ginuo hay mabuoe ro nagatabon sa andang paino-ino.

¹⁷ Ro akong ginapatungdan kara nga Ginuo hay ro Espirito Santo nga ginpaistar katon it Ginuo. Ag ro bisan sin-o nga ginaistaran ku Espirito it Ginuo hay may kahilwayan halin sa pagkaulipon it Kasuguan ag sa saea.

¹⁸ Ginbuoe eon tag nagatabon anay sa atong paino-ino ag makita eon naton ro pagkadaeayawon it Ginuo. Ag makita man sa atong kabuhi ro anang pagkadaeayawon dahil ana nga padayon nga ginabag-o ro atong pagginawi ag nagadinugang ro atong pagkamakana ag maabot ro adlaw nga mangin makana eon gid kita. Ro nagahimo kara hay ro Ginuo, paagi sa Espirito Santo.