2 Corinto 2 - Inkeanon

¹ Bukon abi nga sinakon hay nagdesidir ako nga indi lang anay ako mag-adto inha? Owa abi ako naila nga ro akong pag-adto inha hay makapasubo euman kinyo pareho ku hauna ngato.

² Kon hipasubo ko kamo, owa eon it makapalipay kakon. Paalin pa abi ninyo ako mapalipay ay hapasubo ko kamo?

³ Ngani nagsueat lang anay ako imbis nga magbisita eagi kinyo. Ginhimo ko ra agod kon mag-adto ako inha kinyo hay indi ako masubuan dahil kinyo nga dapat kunta nga magtao kakon it kalipay. Sigurado ako nga kon malipayon kamo tanan hay makapalipay man ron kakon.

⁴ Tag nagaobra ako ku akong sueat ngato hay nagatueo ro akon nga euha ag nagapin-ot ro akon nga dughan sa grabi nga kasubo. Owa ako nagsueat kinyo agod pasubuon kamo kundi ipakita kinyo kon mauno kabahoe ro akong pagpalangga kinyo.

Dapat eon nga Patawaron ro Nagkasaea Idto Kanda

⁵ Kon parti ma't-a sa tawo inha kinyo nga nagtao it kasubo kakon hay bukon eang it ako ro anang ginpasubo kundi pati kamo tanan, ugaling bukon it paeareho ro inyong pagkasubo. Owa ako naila maghambae it sobra.

⁶ Kaeabanan kinyo hay nag-intra sa pagpina kana ag bastanti eon dato.

⁷ Dapat eon ninyo nga patawaron imaw ag pabaskugon ro anang buot agod indi imaw masubrahan it kasubo nga indi eon imaw makatibawas.

⁸ Ngani ginahinyo ko gid kinyo nga ipakita ninyo kana nga ginahigugma ninyo imaw.

⁹ Sambilog pa nga rason nga nagsueat ako kinyo kato hay agod mapamatud-an ko kon matinumanon kamo sa tanan nakon nga mga ginbilin kinyo.

¹⁰ Kon nagapatawad kamo hay kompormi ako karon. Ro ginpatawad ko, kon may dapat gid man ako nga patawaron hay ginpatawad ko para sa inyong kamaeayran sa atubang ni Kristo.

¹¹ Gin-obra ko ron agod indi kita hiisahan ni Satanas ag hikumbinsi nga indi naton pagpatawaron ro tawo ngaron ay sayod naton kon mauno it eain ro isip ag motibo ni Satanas.

Naghawat-hawat ro Ginhawa ni Pablo nga Makabati it Balita Parti sa mga Tumueuo sa Corinto

¹² Dahil gusto ko gid nga hikita eon si Tito nga halin inha kinyo, nag-adto ako sa Troas agod tabuon imaw idto ag magwali idto ku Mayad nga Balita parti kay Kristo. Pag-abot ko idto hay ginpahaom it Ginuo ro mga tawo sa pagpamati ag pagbaton ku akong ginawali.

¹³ Pero dahil owa ko hakita idto ro akong igmanghod nga si Tito hay owa ako himayang. Ngani nageaong ako sa mga tagaidto ag nagpaMacedonia.

Mayad ro Resulta sa Nagatuo sa Mayad nga Balita Pero Bukon it Mayad sa Owa

¹⁴ Pero bisan makaruyon, mabahoe gid ro akong pagpasaeamat sa Dyos, imaw nga nagadaea permi it kadaeag-an kamon dahil sa among kaangtanan kay Kristo. Ag ginagamit nana kami agod ipasayod ro mensahi parti kana sa bisan siin nga lugar. Rondayang Mayad nga Balita hay pareho it pahumot nga ro hugom hay nagapaeang-abot kon siin-siin.

¹⁵ Dahil sa among pagwali ku Mayad nga Balita hay pareho kami it mahumot nga hugom ni Kristo nga nagaabot sa Dyos. Ro hugom ngara hay mahugman man ku mga ginaeuwas ag ku mga rato nga ro ginapaeangpan hay pina sa impyerno.

¹⁶ Sa mga rato nga ro ginapaeangpan hay pina sa impyerno, ro among hugom hay matsa ana it nagakaeunot nga patay nga eawas, pero sa mga ginaeuwas hay pareho kami it mahumot nga pahumot nga nagatao kanda it kabuhi nga owa it katapusan. Malisod ro among trabaho ay sin-o ro makapadayon sa pagwali kon ro tan-aw kimo ku mga nagapamati hay mabaho nga nagakaeunot nga patay nga eawas?

¹⁷ Pero mahimo namon ron dahil bilang mga tawo nga may maeueot nga kaangtanan kay Kristo, ginasugid namon ro anang ginapasugid kamon. Owa kami it maeain nga motibo sa among paghimo kara dahil sayod namon nga ro Dyos hay nagatan-aw permi kamon. Bukon kami it pareho it abo ngarong mga tawo nga nagaturo ku mensahi it Dyos agod eang makakwarta.