2 Corinto 13 - Inkeanon

Katapusan nga mga Paandam ag mga Bilin ni Pablo

¹ Pangatlo ko eon raya nga pag-adto inha kinyo. Dumduma ninyo ro nasueat sa Sagrado nga Kasueatan nga, “Kon may gapabangod sa anang isigkapareho hay dapat nga daywa o tatlo ro magatestigo nga matuod ro tanan nanang ginapabangod.”

² Ku ikaywa ko ngato nga pagbisita inha kinyo hay ginpaandaman ko ro mga nagkasaea ag ginauman ko ro akon nga paandam makaron bisan nga owa pa ako inha. Sa akong pagbalik hay sigurado gid nga indi sanda makalikaw sa akong pagdisiplina kanda, pati ro iba pa nga indi maghinuesoe ag magtalikod sa andang kaeainan.

³ Sininyo hay gusto ninyo nga pamatud-an ko nga kon maghambae ako kinyo hay gahambae ako paagi sa otoridad nga gintao kakon ni Kristo. Bukon gid-a it maeuya si Kristo sa pagdisiplina it tawo ag kon disiplinahon ko eon kamo hay dikaron makita ninyo ro anang gahom.

⁴ Matuod nga matsa owa imaw it mahuman kat gineansang imaw sa krus pero nabanhaw imaw ag una kana ro gahom it Dyos. Makaruyon man kami ay dahil sa among kaangtanan kay Kristo hay matsa owa man kami it mahuman sa among pagserbi kana kon sa among kaugalingon eang. Pero kon mag-adto kami inha hay ipakita namon nga iya kamon ro gahom it Dyos sa among pagtratar kinyo.

⁵ Ro inyo't-a mismong kaugalingon ro dapat ninyong usisaon agod mapamatud-an kon nagapangabuhi kamo suno sa matuod nga pagtuo. Sayod ma't-a baea kamo nga una kinyo si Jesu-Kristo no? Euwas eang kon bukon it matuod ro inyong pagtuo.

⁶ Pero kon mapamatud-an ninyo nga matuod ro inyong pagtuo hay nagasalig ako nga masayran man ninyo nga matuod kami nga mga apostoles ni Kristo.

⁷ Nagapangamuyo kami sa Dyos nga indi eon kamo maghimo it maeain. Owa kami naila nga magpadayon kamo sa paghimo it maeain agod eang mapakita namon nga may otoridad kami nga magpina kinyo bilang mga apostoles. Ro pinakaimportanti sa tanan hay nagahimo eon kamo it mayad imbis nga maeain.

⁸ Owa eon abi it kinahangean nga disiplinahon kamo kon nagpundo eon kamo sa paghimo it maeain, pero kon owa gihapon hay dapat nga disiplinahon gid-a kamo. Bukon 't-a abi it mayad nga mag-obra kami it owa nagaayon sa kamatuuran halin sa Dyos dahil ro amon't-a nga obra hay dapat nagaayon gid-a permi sa kamatuuran.

⁹ Nalipay kami kon indi eon namon dapat paggamiton ro among otoridad sa pagdisiplina kinyo ag malig-on eon ro inyong pagtuo. Ag ginapangamuyo man namon nga ro inyong paino-ino ag batasan hay nagapadayon nga nagamayad hasta nga owa eon karon it ikasaway.

¹⁰ Ngani akon eagi nga ginasueat ro mga bagay ngara samtang owa pa ako kaabot inha, agod kon inha eon ako hay owa eon it kinahangean nga gamiton ko pa ro akong otoridad ag pangisgan ko kamo. Ro kadapatunan gid-a ku otoridad ngaron hay agod palig-unon kamo sa inyong pagtuo bukon it agod samaron ron.

¹¹ Raya ro katapusan ko nga mga bilin kinyo, mga igmanghod. Magkalipay kamo ag kaadyana eon ninyo ro inyong batasan hasta nga owa eon it ikasaway kinyo. Pabaskuga ro inyong buot. Magkaeasugot kamo ag magkabuhi it may paghidait sa kada isaea. Kon makaruyon kamo hay ibhan kamo ku Dyos nga ginahalinan it gugma ag katawhayan.

¹² Magkueumustahan kamo bilang katawhan it Dyos nga may pagpalangga sa kada isaea ag ginakumusta man kamo ku tanan nga mga katawhan it Dyos iya.

¹³ Kabay pa nga masamitan ninyo tanan ro sobrang kabuot ku Ginuo nga si Jesu-Kristo, ro paghigugma it Dyos, ag ro pagpakig-iba kinyo it Espirito Santo.