2 Corinto 12 - Inkeanon

Mas Makita ro Gahom it Dyos Kon Siin Owa Eon kita it Mahimo

¹ Sinakon hay indi ako magpabugae ay owa ron it pueos pero matsa ginapilit ako nga himuon ra dahil sa mga ginahinambae it iba inha parti kakon. Ngani isugid ko kinyo ro parti sa mga ginpahayag kakon it Ginuo ag ro mga ginpakita nana kakon paagi sa paeanan-awon.

^2-4 Katorse anyos eon ro nagtaliwan hay may hakilaea ako nga isaeang ka tumueuo ni Kristo nga ginhabnit halin iya sa kalibutan ag gindaea sa ikatlong eangit kon siin idto ro Dyos. Owa ako kasayod kon pati ro anang eawas hay gindaea o ro anang espirito eang. Ro Dyos eang ro nakasayod. Ag sayod ko nga gindaea imaw sa Paraiso ag nakabati imaw it mga indi ikamitlang sa mga linggwahe it mga tawo iya sa kalibutan. Ag bisan puydi nga ikamitlang hay ginabawaean man it Dyos ro bisan sin-o nga isugid rato.

⁵ Bagay nga ipabugae ko ro tawo nga nakaagi it makaruyon pero indi't-a ako magpabugae ku akon nga kaugalingon. Ro ipabugae ko eang hay ro mga bagay nga nagapakita ku akong kahinaan.

⁶ Kon gusto ko nga magpabugae hay abo ro akong ikapabugae nga natabo kakon ag nahimo nakon, ag bukon 't-a it pinaumang ron dahil matuod ron tanan. Pero indi ako magpabugae agod owa it magdayaw kakon nga eabaw pa sa andang hakita ag habatian kakon.

⁷ Hay ngani, agod indi ako magbinugae ag magpaino-ino nga matsa kon sin-o gid ako dahil sa sobra-sobra nga mga makangawa-ngawa nga ginpahayag it Dyos kakon, ginsugtan nana nga pakalisdan ako ni Satanas sa matsa siit nga nagatinuslok sa akon nga eawas.

⁸ Tatlong beses nga naghinyo ako sa Ginuo nga ana nga papunduhon rato

⁹ pero sinana kakon, “Salig eang sa akong bulig kimo ay bastanti ron nga makatakod ka, dahil kon nakahimo ro tawo it sangka bagay bisan owa imaw it ikasarang hay dikaron makita nga nahimo na rato dahil eang sa akong gahom.” Ngani malipayon ako sa pagpabugae ku akon nga kahinaan agod buligan ako permi ku gahom ni Kristo nga nagapabilin kakon.

¹⁰ Ngani nalipay gihapon ako bisan owa ako it ikasarang, kon ginasamaran ako, kon ginapakalisdan, kon ginahingabot ag kon sa kapipit-an dahil sa akong pagserbi kay Kristo. Sa oras abi nga maeuya ako ag owa it ikasarang hay dikaron man dayon ako ginagamhan it Dyos.

¹¹ Matsa kaumangon ako sa akong pagpinabugae ngara pero inyo gid ako nga ginapilit. Dapat kunta nga kamo ro nagdepensa kakon tag ginapakaeain ako ku mga nagaako inha nga sanda hay mga apostoles nga indi maeabawan. Dapat hay gindepensahan ninyo ako kanda ay bisan owa ako it pueos, bisan magkainalin hay indi man ako maulihi bilang apostol.

¹² Tag inha ako kinyo hay ginpamatud-an ko nga matuod ako nga apostol dahil, bisan ginapakalisdan ako hay gintiis ko ron ag naghimo ako it mga makangawa-ngawa ag milagroso nga pamatuod paagi sa gahom it Dyos.

¹³ Eaom baea ninyo hay minos ro akong pagtratar kinyo kaysa sa akong pagtratar sa ibang grupo it mga tumueuo? Bukon a, maeuwas eang abi nga owa ko kamo pagpabug-ati sa akong mga kinahangeanon. Hay saea ko baea ron kinyo? Syempre, bukon!

Malipayon si Pablo nga Magsakripisyo Para sa Kamaeayran ku mga TagaCorinto

¹⁴ Haom eon ako nga magbisita kinyo it uman. Pangatlong beses eon ra nga pagbisita ko kinyo. Indi ko man gihapon kamo pagpabug-atan sa akong mga kinahangeanon. Bukon it kon ano nga butang nga inyong ikatao kakon ro akong gusto kundi kamo't-a mismo. Matsa ginikanan eon ninyo ako ag bukon it ro mga unga ro nagatipon it kwarta para sa andang ginikinanan kundi ro ginikanan 't-a ro gatipon para sa andang mga unga.

¹⁵ Ngani nalipay ako maggasto ku akon nga kaugalingon nga kwarta para kinyo. Ag bukon eang it duyon kundi haom man ako nga isakripisyo ro tanan por dahil kinyo agod eang maeuwas kamo. Pero bisan nagabinahoe ro akong paghigugma kinyo hay matsa nagabinuhin ma't-a ro inyong paghigugma kakon!

¹⁶ Kabay pa nga gakompormi eon kamo kakon nga owa ko kamo pagpabug-ati sa akong mga kinahangeanon. Pero basi may iba inha kinyo nga nagahambae nga tuso man kuno ako ay ginluko ko kamo.

¹⁷ Paalin ko ron nahimo? Ayaw abi kamo maghinambae nga ginluko ko kamo paagi sa mga ginpaadto ko inha.

¹⁸ Halimbawa si Tito nga ginpangabay ko nga mag-adto inha kinyo kaibahan it isaea sa atong mga igmanghod sa pagtuo, nagpamintaha baea sanda kinyo? Owa gid. Bukon abi it ro among tuyo ag batasan hay pareho?

¹⁹ Basi nagapaino-ino kamo nga kinyo't-a namon ginadepensahan ro among kaugalingon sa among ginahambae sa sueat ngara nga matsa kinyo't-a kami dapat manabat. Bukon a! Sa Dyos 't-a kami manabat ag saksi imaw nga ginahambae ra namon tanan kinyo bilang inyong isigkapareho nga may kaangtanan kay Kristo, ag para ron sa ikalig-on ku inyong pagtuo, mga hinigugma.

²⁰ Nahadlok ako nga basi hiabutan ko kamo nga nagahimo ku mga bagay nga owa nakon nailai nga makita. Ag kon makaruyon hay indi ninyo mailaan ro akong pagbadlong kinyo. Basi hiabutan ko kamo nga nagailinaway, nagahilisaan, nagaueugtan, nagapatiansigan, nagapakaeain sa inyong isigkatawo, nagatsismis, matinaas-taason kamo ag nagakinagulo.

²¹ Nahadlok ako nga kon inha eon ako hay mahuy-an ako sa Dyos ag masubuan ako dahil sa abo nga nagkasaea kinyo inha kato ag owa gihapon naghinuesoe ag nagtalikod sa andang kalaswaan, paghulid sa bukon nanda it asawa ag owa it hawid-hawid nga pangueag.