2 Corinto 10 - Inkeanon

Gindepensahan ni Pablo ro Anang Otoridad Bilang Apostol

¹ Makaron, ako nga si Pablo hay nagahinyo kinyo nga may pagpaubos ag kaeueo pareho kay Kristo. May iba abi kuno inha kinyo nga nagahambae nga maisog eang ako nga magprangka kon sa maeayo pero indi man makadirikta it hambae kon sa atubang.

² Nagahinyo gid ako kinyo agod kon inha eon ako hay indi ako mapilitan nga mueayon kamo tanan pareho sa akong obrahon nga pagmueay sa iba kinyo nga nagahambae nga nagapangabuhi kami it kinalibutanon.

³ Matuod nga mga tawo man lang kami iya sa kalibutan, pero ro among pagpakig-away sa mga nagakuntra sa mga bueuhaton it Dyos hay bukon it tawhanon eang nga pagpakig-away.

⁴ Ro among armas hay bukon it pareho sa mga armas iya sa kalibutan kundi raya hay may gahom it Dyos ag raya ro amon nga ginagamit agod waskon gid ro tanan nga saea nga panindugan ku mga nagakuntra ngaron nga eaom nanda hay malig-on gid.

⁵ Paagi man sa among armas ngaron hay ginasumpo namon ro andang bugae nga nagabaeabag kanda sa matuod nga pagkilaea sa Dyos. Ag ro armas ngaron hay makasakop sa tanan nandang ginapaino-ino agod magmangin matinumanon sanda kay Kristo.

⁶ Pag-abot namon inha, kon may inha pa gihapon nga indi magtuman kana hay indi kami mag-isaea-daywa nga disiplinahon sanda. Pero kabay pa nga desidido eo't-a kamo nga magtuman kana sa tanan nga bagay.

⁷ Tan-awa ninyo kon ano ro una eon nga klaro sa inyong atubang. Kon may una nga nagahambae nga sanda ro gintaw-an ni Kristo it otoridad nga magturo parti kana hay dapat nga paino-inohon nanda ra it mayad ag batunon nga kami man hay gintaw-an nana it otoridad nga magturo parti kana.

⁸ Bisan matsa nagpinabugae ako ku otoridad nga gintao kamon it Ginuo hay owa ako nahuya ay gintao na ron kamon agod mapalig-on namon ro inyong pagtuo, bukon 't-a it agod samaron ron.

⁹ Ginahambae ko ron ay owa ako naila nga magpaino-ino kamo nga ginapaeag ko kamo sa akong mga sueat kinyo agod hadlukan kamo kakon.

¹⁰ Ginahambae ko ra ay hambae abi ku iba inha hay maisog ag poderoso gid kuno ako sa akong mga sueat pero kon sa personal eon ngani hay atahado man ag owa man it pueos ro akong ginahinambae.

¹¹ Dapat eang nga masayran ku nagahambae karon nga kon ano ro among ginahambae sa among mga sueat hay ruyon man ro among himuon kon mag-abot eon kami inha.

¹² May iba inha nga eaom nanda hay kamayad-mayad eo't-a sanda ag owa it mangahas nga magkompara ku andang kaugalingon kanda. Pero ro matuod hay ro andang pageubot hay kueabos. Gakueumparahan sanda sa kada isaea agod ipakita nga mas mayad sanda kaysa sa iba ugaling paeareho man lang sanda nga mga minos!

¹³ Pero owa kami nagapabugae ku owa namon nahimo ay owa kami it ibang ginapabugae kundi ro nahimo eang namon sa obra nga gintugyan it Dyos kamon. Ag tapoe sa oeobrahon namon ngaron hay ro among pagturo bisan kinyo.

¹⁴ Ag dahil hasakpan kamo karon, kon mag-istorya kami ku among haobra inha kinyo hay owa kami nagaako ku owa't-a namon haobra ay sayod gid kamo nga bisan maeayo ro inyong lugar hay nakaabot kami inha agod magwali ku Mayad nga Balita parti kay Kristo.

¹⁵ Owa man namon ginapabugae ro ginkabudlayan it iba nga matsa kami't-a ro nagkabudlay karon. Pero nagasalig kami nga padayon nga maglig-on ro inyong pagtuo, ag magaabo pa gid ro magatuo kay Kristo inha kinyo.

¹⁶ Makawali eon dayon kami ku Mayad nga Balita sa ibang lugar nga mas maeayo pa gid nga owa pa it nakaabot idto agod magwali. Owa eon dayon it makahambae nga ginapabugae't-a namon ro mayad nga bunga ku kinabudlayan it iba nga matsa amon gid-a.

¹⁷ Nasueat sa Sagradong Kasueatan nga, “Kon may gapabugae, ro ana dapat nga ipabugae hay ro hinimuan it Ginuong Dyos.”

¹⁸ Ro ginaaprubahan abi it Dyos hay bukon it rondatong nagadayaw ku anang kaugalingon kundi rondatong ginadayaw it Dyos.