2 Corinto 1 - Inkeanon

Mga Pagpangamusta

¹ Raya nga sueat hay halin kakon nga si Pablo nga sa pagbuot it Dyos hay ana nga ginpili nga mangin *apostol ni Kristo Jesus ag halin man ra kay Timoteo nga atong igmanghod sa pagtuo. Nagasueat kami kinyo nga mga katawhan it Dyos inha sa Corinto ag sa tanan nga ginpaeain it Dyos nga mangin anang katawhan inha sa probinsya it Acaya.

² Kabay pa nga masamitan pa gid ninyo ro mga pagpakamaayo ag katawhayan nga halin sa Dyos nga atong Ama ag kay Ginuong Jesu-Kristo.

³ Dayawon ta ro Dyos nga Ama ku atong Ginuo nga si Jesu-Kristo. Ro Dyos hay aton man nga Ama nga maeueuy-on gid ag imaw ro ginahalinan it tanan nga kabaskog it buot nga kinahangean naton.

⁴ Sa tanan nga kalisod nga atong ginaagyan hay ana nga ginapabaskog ro atong buot agod mag-antigo man kita magpabaskog ku buot it iba sa bisan ano nga andang ginakalisdan. Mapabaskog naton ro andang buot ay nag-antiguhan eon kita paagi man sa pagpabaskog it Dyos ku atong buot.

⁵ Bilang mga tumueuo ni Kristo hay abo nga kalisdanan ro atong ginaagyan parehas kato kana pero paagi man sa atong kaangtanan kana hay abo man ro aton nga ginaagyan nga pagpabaskog it Dyos ku atong buot.

⁶ Ngani bisan ginapakalisdan kami dahil sa amon nga pagwali ku Mayad nga Balita hay may pueos gid ron ay ro bunga karon hay ro pagpabaskog ku inyong buot ag ro inyong kaeuwasan. Ag kon ginapabaskog ro among buot hay pabaskugon man namon ro inyong buot ag ro bunga karon hay makatiis kamo kon maagyan ninyo ro mga kalisdanan nga pareho sa among ginaagyan.

⁷ Ngani may salig kami sa kalig-on ku inyong pagtuo ay sayod namon nga kon ginapakalisod kamo pareho kamon hay pabaskugon man it Dyos ro inyong buot pareho ku anang pagpabaskog ku amon.

⁸ Mga igmanghod, gusto namon nga masayran ninyo ro grabi nga paghingabot nga among haagyan idto sa probinsya it Asya nga haeos indi namon masarangan. Nadueaan eon ngani kami it pageaom nga mabuhi pa kami sa among mga gin-agyan ngato.

⁹ Ag bisan ngani hasta makaron, ro among pamatyag hay mga sintinsyado it kamatayon. Pero mayad man rato agod indi kami magsalig sa among kaugalingon kundi sa Dyos nga nagabanhaw it patay.

¹⁰ Ana gid-a kami nga gineuwas sa pat-od nga kamatayon ag sigurado kami nga obrahon na man gihapon ron sa ulihi.

¹¹ Ag makabulig man kamo kamon paagi sa inyong pagpangamuyo para kamon. Kon sige kamo nga nagapangamuyo hay sabton ron it Dyos ag pakamaayuhon nana kami ag ro bunga karon hay abo man ro magapasaeamat kana.

Gin-insistir ni Pablo nga Masaligan Gid Imaw sa Tanan nga Anang Ginahambae

¹² Ikapabugae namon nga limpyo ro among konsensya parti sa among pagginawi iya sa kalibutan ag eabi gid inha kinyo. Sa among pagturo kinyo, owa kami nagsalig sa among tawhanon nga kaaeam kundi sa bulig it Dyos ag paagi sa anang bulig ngara hay sinsiro kami ag owa it motibo nga maeain.

^13-14 Owa kami it ginatago sa among ginasueat kinyo. Kon ano ro inyong ginbasa hay ruyon eo't-a karon ro kahueugan ag owa eon it iba pa. Sa makaron hay owa pa gid ninyo matungkad ro among paino-ino ag motibo pero kabay pa nga matungkad gid ron ninyo agod sa adlaw it pagbalik it atong Ginuo nga si Jesus hay ikapabugae man ninyo kami pareho ku among pagpabugae kinyo.

¹⁵ Dahil sigurado ako karon ngani nagplano ako nga mabisita kunta kinyo it daywang beses agod daywang beses ko man kamo mabuligan.

¹⁶ Ro akong dati nga plano hay maghapit kunta inha kinyo kon magpaMacedonia ako ag kon maghalin eon ako sa Macedonia hay mahapit pa gid kunta ako inha it uman. Ag kon magpaJudea eon ako halin inha kinyo hay basi puydi ninyo ako mabuligan sa akon nga mga kinahangeanon sa pagbiyahe.

¹⁷ Pero owa natuman ro akong plano ngato ngani basi ginaisip ninyo nga madali magbaylo ro akong isip. Ag basi naisip man ninyo nga pareho ako it mga tawo iya sa kalibutan nga nagaplano agod masunod ro anda ea't-ang gusto. Gahambae sanda it “huo,” pero ro anda gali nga buot hambaeon hay “indi.”

¹⁸ Pero bukon kami it makaruyon nga ro among huo hay indi't-a gali. Ro tanan namon nga ginasugid kinyo hay matuod ag masaligan pareho man sa hambae it Dyos.

¹⁹ Ginahambae ko ra dahil ro Unga it Dyos nga si Jesu-Kristo nga ginwali namon kinyo nanday Silas ag Timoteo hay masaligan gid ag bukon it huae-huae ag ginatuman nana permi ro tanan nanang ginahambae.

²⁰ Ag paagi kay Jesu-Kristo hay natuman ro tanan nga mga ginpromisa it Dyos. Ngani dahil sa anang pagtuman karon hay gakompormi kita nga ro mga ginpromisa it Dyos hay matuod ag masaligan ag paagi karon hay ginapadunggan imaw.

²¹ Ro Dyos ro nagapalig-on kamon ag kinyo man sa atong pagsunod kay Kristo. Ginpili nana kita nga mangin anang mga katawhan agod magserbi kana.

²² Imaw man ro nagtao katon ku anang Espirito bilang tanda nga kita hay ana. Ro anang Espirito nga iya katon ro garantiya nga tumanon nana ro tanan nanang ginpromisa katon.

²³ Akon nga ginapasaksi ro Dyos makaron sa akon ngarang ihambae kinyo. Ro rason kon ham-an it owa ako nagpadayon sa akong plano nga mag-adto inha kinyo hay dahil gusto ko nga taw-an kamo it kahigayunan nga maghinuesoe ag magtalikod sa inyong mga saea agod owa eon it kinahangean nga pangisgan ko kamo kon mag-adto eon ako inha sa ulihi.

²⁴ Ro among pagbilin kinyo hay bukon it pagdominar kinyo kon ano ro inyong dapat tuuhan dahil malig-on eon kamo dikaron. Pero ginabilin namon kamo bilang mga katimbang ninyo agod malipay gid kamo sa inyong pagsunod sa Ginuo.