1 Timoteo 6 - Inkeanon

Mga Bilin ni Pablo sa mga Ulipon nga Tumueuo

¹ Raya ro akong bilin sa mga ulipon nga tumueuo inha. Dapat sanda nga magtahod gid sa andang mga amo agod owa it ikahambae ro andang mga amo ngaron kuntra sa ngaean it Dyos, ag indi nanda pagpakaeainon ro atong ginaturo.

² Ro mga ulipon nga ro andang mga amo hay tumueuo man, indi nanda dapat pagbaliwalaon ro andang mga amo ay magmaeanghod sanda sa pagtuo. Mas kapin pa gid ngani nga dapat nanda nga serbihan it mayad ro andang amo, tungod ro nagapanipueos sa andang serbisyo hay tumueuo nga palangga it Dyos. Tud-an ro akon ngara nga mga ginabilin kimo ag ipatuman gid sa mga tumueuo inha.

Nagpaandam Euman si Pablo Parti sa mga Nagaturo it Saea

³ Kon may inha nga owa nagaayon sa tama nga doktrina nga halin sa atong Ginuo nga si Jesu-Kristo nga nagagiya katon sa pagpangabuhi nga matinumanon sa Dyos, ag kon nagaturo imaw it eain karon,

⁴ ro tawo ngaron hay sobra it taas ro anang pagdumdum sa anang kaugalingon ag owa it hasayran. Naila eang ron imaw magpakigbais ag makigdibati parti sa kahueugan it mga pamisaea. Raya ro ginahalinan it paghilisaan, pag-ilinaway, pagsaeamaran, pagdueudahan

⁵ ag owa it pahuway nga pagbinagsang. Makaraya ro ginaobra it mga tawo nga nasamad eon ro paino-ino, ag owa eon kaeubot ku matuod nga mensahi. Eaom nanda nga gamanggaranon sanda kon matinumanon sanda sa Dyos.

⁶ Pero ro matuod 't-a nga manggad hay ro pagkamatinumanon sa Dyos ag pagkakuntento bisan sa anong kahimtangan.

⁷ Owa man abi kita it dinaea pagkatawo naton iya sa kalibutan ag kon mamatay kita hay owa man kita it madaea.

⁸ Ngani basta may atong ginakaon ag ginaeambong hay dapat nga makuntento eon kita karon.

⁹ Pero ro mga nagahandom nga magmanggaranon hay madali matentar ag madali man hikisiw ku abo nga pinaumang ag peligroso nga buhat, ag ku mga maeain nga handom nga ro bunga hay kasamaran ag owa it katapusan nga pina sa impyerno.

¹⁰ Ro sobra abi nga kaila sa kwarta hay nagatueod sa tawo nga mag-obra it tanan nga klasi it saea. Ngani ro iba nga hasubrahan sa kaila sa kwarta hay nagpaeayo sa matuod nga mensahi parti kay Jesus ag nakaagi it abo nga kasubo ay hungod man nanda ron.

Mga Katapusan nga Bilin ni Pablo kay Timoteo

¹¹ Pero ikaw, Timoteo, bilang sueuguon it Dyos, magpaeagiw ka sa mga butang ngaron. Tinguhaa gid nga magkabuhi it matarong ag magmatinumanon sa Dyos, maglig-on ro imong pagtuo kana, magmahigugmaon ka, magmatiniison ag magbuot.

¹² Pareho it sangka manogdaeagan sa karera nga nagasukoe it husto agod magdaog, himua man ro tanan nimong masarangan sa imong pagsunod ag pagserbi sa Dyos. Itanom permi sa imong paino-ino ro kabuhi nga owa it katapusan nga imong mangin premyo, ay duyon ro rason nga gintawag ka it Dyos. Ag isaea pa hay nagpangako ka kato sa atubang it kadagayaan nga magasunod ka kay Jesus bisan ano ro matabo.

¹³ Sa atubang it Dyos nga nagatao it kabuhi sa tanan, ag ni Kristo Jesus nga nagpamatuod it mayad parti sa kamatuuran sa atubang ni Poncio Pilato, ginasugo ko ikaw nga

¹⁴ tumanon ro akong mga bilin kimo. Siguruha nga tama gid ag owa it kasawayan ro imong pagtuman karon, hasta sa pag-abot ku atong Ginuo nga si Jesu-Kristo.

¹⁵ Mabalik imaw sa oras nga gintaeana it Dyos nga ginahalinan it tanan nga pagpakamaayo. Imaw gid lang ro may otoridad sa tanan-tanan, imaw ro pinakahari ku tanan nga mga hari sa kalibutan ag imaw man ro Ginuo ku tanan nga manogdumaea sa kalibutan.

¹⁶ Imaw eang ro owa it kamatayon ag nagaistar sa hayag nga grabi it silaw nga indi mapaeapitan it bisan sin-o. Owa pa gid it tawo nga nakakita kana, ag indi gid ma't-a imaw makita it bisan sin-o. Daeayawon imaw ag makagagahom hasta sa owa it katapusan. Amen!

¹⁷ Hambaei ro mga tumueuo inha nga manggaranon sa mga butang iya sa kalibutan, nga indi magpabugae ag indi magsalig sa anda nga manggad nga madali maduea. Sa Dyos 't-a dapat sanda magsalig ay imaw ro nagatao it bugana ku tanan nga mga butang agod mangin malipayon kita.

¹⁸ Tud-i man sanda nga mag-obra permi it mayad agod magmanggaranon sanda pati sa mayad nga buhat. Tud-i man sanda nga magmaatag ag haom permi nga magtao sa iba.

¹⁹ Kon himuon nanda ron hay nagatipon sanda it minatuod nga manggad nga indi maduea idto sa eangit, ag dahil karon hay sigurado nga mabaton nanda ro andang ginapaabot sa ulihi nga kabuhi nga minatuod gid.

²⁰ Timoteo, haeungi gid it mayad ro gintugyan kimo. Likawi ro mga istorya nga owa gid it pueos ag owa it kaeabtanan sa mga bagay nga mahaega sa Dyos. Likawi man ro mga ginaturo ku iba inha nga may hasayran kuno, pero ro andang hasayran ngaron hay nagakuntra sa kamatuuran nga halin sa Dyos.

²¹ Ro iba abi inha hay nagpati sa mga may hasayran kuno ngaron, mawron nga naglihis eon sanda sa daean it tama nga doktrina. Kabay pa nga masamitan pa gid ninyo ro sobrang kabuot it Dyos.