1 Timoteo 5 - Inkeanon

¹ Kon may nagkasaea inha nga magueang nga eaki, ayaw pagpangisgi kundi hambaea eang it matawhay nga matsa imo imaw nga ama. Kon ro nagkasaea man hay eaki nga pamatan-on, sawaya eang nga matsa imo imaw nga igmanghod.

² Kon magueang nga bayi man ro nagkasaea hay hambaea eang it matawhay nga matsa imong ina. Kon mga pamatan-on nga bayi man ro nagkasaea hay sawaya nga matsa imong mga igmanghod, ag malimpyo dapat permi ro imong paino-ino kanda.

Mga Bilin ni Pablo Parti sa mga Baeo

³ Tahura ag buligi ro mga baeo nga bayi nga owa eon gid it ginasaligan.

⁴ Pero kon ro baeo hay may mga unga o mga apo hay dapat nanda masayran nga ro una nga paagi nga ikapakita nanda ro andang pagsimba sa Dyos hay sa andang pagdipara sa andang pamilya, agod makabaeos sa andang ginikanan ag mga lola. Nalipay ro Dyos sa mga makaraya nga buhat.

⁵ Ro mga baeo nga bayi nga owa eon gid-a it kapamilya ag kaigbataan hay nagasalig eamang sa Dyos ag nagapangamuyo sa adlaw ag gabii ag nagapangayo it bulig kana.

⁶ Pero ro baeo nga bayi nga nagapinagusto it owa it hawid-hawid sa bisan ano nga anang nailaan, bisan buhi pa imaw hay patay eon ro anang espirituhanon nga kabuhi. Ayaw ninyo pagbuligi ro mga makaruyon ngaron.

⁷ Sugua ro mga tumueuo inha nga tumanon ro akong mga bilin ngara agod owa it ikasaway kanda.

⁸ Ro tumueuo nga owa gadipara sa anang igbata, kapin gid sa anang panimaeay hay nagabaliwala sa matuod nga mensahi halin sa Dyos ag mas maeain pa imaw kaysa sa mga owa nagatuo sa Dyos.

⁹ Kon parti ma't-a sa kon sin-o ro puydi idugang sa listahan it mga baeo nga bayi hay dapat tag 60 anyos ro idad paibabaw ag owa nagpangeaeaki.

¹⁰ Dapat man nga imaw hay bantog dahil sa anang mayad nga binuhatan pareho ku mga raya: mayad nga pagpabahoe sa anang mga unga, pagkamaabi-abihon, pagpaubos ku anang kaugalingon sa pagserbi sa anang isigkapareho nga tumueuo, pagkamabinuligon sa mga nagakalisod, ag mahugod sa paghimo it bisan ano nga mayad.

¹¹ Ayaw pagtapean sa listahan ro mga baeo nga bayi nga bata pa ay kon mag-abot ro oras nga mas paeabyon nanda ro kaila sa paghulid hay maila sanda mag-asawa it uman, ag anda eon dayon nga mapabay-an ro andang katungdanan para kay Kristo.

¹² Kon matabo ron hay pagakundinahon sanda tungod ginbaliwala nanda ro anda anay nga ginpangako nga magserbi eang kay Kristo.

¹³ Ag sambilog pa nga rason nga indi sanda dapat itapoe sa listahan hay basi imbis nga tumanon nanda ro andang katungdanan hay magtinamad ag magpinanumbaeay lang sanda. Ag basi indi eang sanda magtinamad kundi mag-inintra pa sa pangabuhi it iba ag mag-inistorya it pinadapoe ag mga indi dapat istoryahan.

¹⁴ Ngani ro akong bilin kanda hay mag-asawa eon lang sanda it uman, magpangunga ag asikasuhon ro andang panimaeay agod owa it tsansa ro mga nagakuntra katon nga hipakaeain kita nga mga tumueuo.

¹⁵ Ginahambae ko ra ay may una eon abi nga mga baeo nga bayi nga nagtalikod kay Kristo ag nagsunod eon kay Satanas.

¹⁶ Kon may mga tumueuo nga bayi nga may igbata nga mga baeo nga bayi hay sanda mismo dapat ro magdipara sa mga baeo ngaron agod indi malisdan ro andang grupo it tumueuo sa pagdipara kanda. Kon matabo ron hay ro mga baeo lang dayon nga owa eon gid it ginasaligan ro diparahon ku grupo it mga tumueuo.

Mga Bilin Parti sa mga Manogdumaea it mga Grupo it mga Tumueuo

¹⁷ Daya ma't-a hay parti sa mga manogdumaea it mga grupo it mga tumueuo: kon mayad ro andang pagdumaea hay dapat sanda respetuhon ag swelduhan it husto, kapin gid ro mahugod sa pagwali ag sa pagturo ku mensahi halin sa Dyos.

¹⁸ Nagahambae abi ro Sagrado nga Kasueatan nga: “Ayaw pagbusaei ro baka samtang nagagiok” agod makakaon imaw. Ag may una pa gid nga nagahambae: “Dapat nga swelduhan ro trabahador.”

¹⁹ Ayaw pag-inatuha ro mga ginapabangod sa sangka manogdumaea, mageuwas eang kon may daywa o tatlo nga nagasaksi kuntra kana.

²⁰ Pero kon minatuod nga nagapakasaea imaw, hambaei imaw sa atubang it mga tumueuo, agod nga hadlukan ro iba nga magpakasaea.

²¹ Sa atubang it Dyos ag ni Kristo Jesus ag ku anang mga pinili nga anghel, ginabilin ko gid kimo nga tumana ro akong mga ginahambae ngara ag ayaw it apin bisan kanyo kundi patas ka eang dapat.

²² Ayaw magpadaso-daso it pagpili ag pagbutang it sangka manogdumaea it mga tumueuo kundi siguraduha anay nga owa imaw nagapakasaea, ay basi madaeahig ka karon. Magpangabuhi ka nga permi nga malimpyo sa mata it Dyos.

²³ Ayaw it ininom it pulos tubi eang. Pag-inom man it sangkiri nga bino para sa ing tiyan ag sa imo perming ginabatyag.

²⁴ Mabalik anay kita sa pagpili it mga manogdumaea it mga tumueuo. May mga tawo nga bisan owa pa hausisa ro andang kabuhi hay sayod eon eagi nga nagapakasaea sanda ay hayag man eagi ron. Ro iba ma't-a hay sa ulihi pa't-a masayran nga nagapakasaea gali sanda.

²⁵ Makaruyon man ro mga tawo nga mayad ro andang buhat. Makita eagi ro binuhatan ku iba pero ro ana ma't-a ku iba hay indi eagi hipan-uhan, pero indi man matago hasta hin-uno.