1 Timoteo 3 - Inkeanon

Ro mga Pagginawi ag Batasan ku mga Manogdumaea it mga Grupo it mga Tumueuo

¹ Masaligan gid ro haeambaeunon nga ro nagahandom nga mangin manogdumaea it mga tumueuo hay nagahandom it dungganon nga katungdanan.

² Ngani kinahangean nga ro manogdumaea sa mga tumueuo hay owa it kasawayan, dapat nga owa it ibang bayi sa anang kabuhi kundi ro anang asawa eang, owa nagapasobra sa bisan ano, bukon it pinaumang magdesisyon, bukon it haras-haras, mailaon magpadayon it bisita sa anang baeay, ag mayad gid magturo.

³ Dapat nga bukon man it paeahilong, bukon it mapintas kundi mabuot, bukon it paeaaway, ag owa ginapakadyosa ro kwarta.

⁴ Dapat man nga ginadumaeahan nana it mayad ro anang panimaeay ag ginatuman imaw ag ginatahod ku anang mga unga.

⁵ Paalin abi nana madumaeahan ro mga tumueuo kon indi ngani imaw kaantigo magdumaea ku ana mismong panimaeay?

⁶ Dapat man nga ro manogdumaea hay mabuhay eon nga tumueuo ay kon bag-o pa eang hay basi sobra it taas ro anang pagdumdum sa anang kaugalingon, ag sintinsyahan imaw it Dyos nga pinahan pareho kay Satanas.

⁷ Kinahangean man nga may anang mayad nga reputasyon, bisan sa mga bukon it tumueuo, agod owa kana it ikasaway ag agod owa man it lugar si Satanas nga hikisiw imaw agod magkasaea.

Ro mga Pagginawi ag Batasan ku mga Manogbulig it mga Manogdumaea it mga Tumueuo

⁸ Ro mga manogbulig ma't-a it mga manogdumaea it grupo it mga tumueuo hay dapat nga taeahuron, bukon it purilon, bukon it paeahilong, owa gaobra it saea dahil eang sa kaila it kwarta,

⁹ malig-on ro andang pagtuo sa mensahi parti kay Jesus nga ginpasayod eon gid makaron it Dyos. Ag dapat nga malimpyo permi ro andang konsensya.

¹⁰ Ngani bago sanda pilion hay dapat anay nga siguruhon nga una sa andang kabuhi ro mga raya ngara. Kon owa eon kanda it ikasaway hay puydi dayon sanda nga mangin manogbulig it mga manogdumaea ku andang grupo it mga tumueuo.

¹¹ Ro mga bayi nga manogbulig it mga manogdumaea hay dapat nga taeahuron man, owa gapangsamad sa iba, owa nagapasobra sa bisan ano, ag masaligan sa tanan nga bagay.

¹² Dapat nga ro mga manogbulig it mga manogdumaea it mga tumueuo hay owa it ibang bayi sa andang kabuhi kundi ro andang asawa eang, ag ginadumaeahan nanda it mayad ro andang mga unga ag pati man ro bilog nanda nga panimaeay.

¹³ Kon ginatuman nanda it mayad ro andang katungdanan bilang mga manogbulig hay tahuron gid sanda ku andang isigkapareho nga mga tumueuo, ag mangin mas sigurado pa gid sanda sa andang pagtuo kay Kristo Jesus.

Dapat Naton Tindugan ag Depensahan ro Matuod nga Mensahi Halin sa Dyos

¹⁴ Gaplano ako nga mag-adto kunta inha kimo sa indi magbuhay pero nagsueat gihapon ako kimo

¹⁵ agod kon maatraso gid man ako hay sayod mo eon kon mauno dapat ro pagginawi ku mga myembro it panimaeay it Dyos. Ag ro mga myembro it panimaeay ngara hay kita nga nagatuo sa Dyos nga buhi hasta sa owa it katapusan. Ag kitang mga tumueuo hay pareho sa pundasyon ag mga haligi ku matuod nga mensahi halin sa Dyos.

¹⁶ Owa gid-a it makanigar nga grabi ro kahaega ku atong ginatuuhan parti kay Jesus nga ginpahayag eon it Dyos. Si Jesus hay nagpakatawo riya sa kalibutan, ginpamatud-an it Espirito kon sin-o gid imaw, nakita it mga anghel, ginwali sa bilog nga kalibutan, gintuuhan it mga tawo ag ginpakayab it Dyos sa eangit agod padunggan.