1 Timoteo 2 - Inkeanon

Mga Bilin Parti sa Pagtipon sa Pagsimba

¹ Ngani dahil sa sitwasyon inha, may akon nga mga bilin kinyo kon magtililipon kamo sa pagsimba. Una sa tanan, ginahinyo ko kamo nga ipangamuyo ninyo permi ro tanan nga tawo nga owa it pinaeabi. Pangayua sa Dyos ro andang mga kinahangean, ag ayaw kamo hilipat nga magpasaeamat permi kana.

² Ipangamuyo ninyo pati ro mga hari ag ro tanan nga nagadumaea sa banwa agod nga makapangabuhi kita it matawhay, matinumanon sa Dyos ag may tama nga pamatasan.

³ Ro pagpangamuyo para sa tanan hay mayad ag naila kara ro Dyos nga atong Maneueuwas,

⁴ ay gusto nana nga maeuwas ro tanan nga tawo ag makasayod ku matuod nga mensahi.

⁵ Ag puydi nga matabo ron kon magdangop sanda kana ay imaw gid lang ro sarang nga madangpan it tawo. Sambilog eang ro Dyos ag sambilog eang ro manogpatunga sa Dyos ag sa tawo, ag owa ra it iba kundi si Kristo Jesus nga nagpakatawo.

⁶ Imaw ro nagsakripisyo ku anang kabuhi agod tubson ro tanan nga tawo sa pina ku andang mga saea. Nagapakilaea ra nga ro kaeuwasan hay para sa tanan nga rasa it tawo, ag raya eon ro oras nga dapat ipasayod ra sa tanan.

⁷ Mawron 't-a nga ginbutang ako it Dyos nga apostol ag manogwali agod iwali ko sa mga bukon it Judio ro kamatuuran parti sa pagtuo kay Jesus. Minatuod ro akon ngara nga ginahambae ag owa gid ako nagapinuril.

⁸ Balikan naton ro parti sa pagpangamuyo. Gusto ko nga sa tanan nga lugar kon siin nagatililipon ro mga tumueuo hay ro mga eaki ro magpangamuyo. Pero bago sanda mag-alsa ku andang alima sa pagpangamuyo hay dapat anay nga ro andang pagkabuhi hay balaan ag owa it kaakig o pagpakigbais sa andang isigkatawo.

⁹ Ag gusto ko nga ro mga bayi hay mageambong it desenti, owa nagauba-uba ag bukon it pinaumang. Indi dapat nanda pagpasubrahan ro ayos ku andang buhok, ag indi magsuksuk it grabi it mahae nga mga alahas nga bueawan ag perlas ag mga eambong.

¹⁰ Imbis nga magpinagwapa it makaruyon, ro anda nga kagwapa hay dapat nga makita paagi sa andang paghimo it mayad nga mga buhat nga bagay sa mga bayi nga nagahambae nga nagataha ag nagatuo sanda sa Dyos.

¹¹ Kon may nagaturo sa oras it pagsimba, dapat nga ro mga bayi hay maghipos ag magpasakop sa nagaturo agod mag-antigo.

¹² Indi ako magsugot kon may bayi nga nagaturo sa eaki nga matsa ginaharian eo't-a nana ra. Dapat nga maghipos lang ro mga bayi.

¹³ Dumduma ninyo nga hauna gintuga si Adan, tapos si Eva dayon.

¹⁴ Ag bukon it si Adan ro hapataeang ni Satanas kundi si Eva't-a ag dahil karon hay nag-eapas imaw sa sugo it Dyos.

¹⁵ Daya ro dahilan kon ham-an it nagapasaeapo imaw ag ro tanan nga bayi kon magpangunga, pero maeuwas ma't-a sanda gihapon kon magapadayon sanda sa andang pagtuo kay Jesus, sa paghigugma sa andang isigkatawo ag sa balaan ag husto nga pagginawi.