1 Timoteo 1 - Inkeanon

Mga Pagpangamusta

¹ Raya nga sueat hay halin kakon nga si Pablo. Ako hay sangka apostol ni Kristo Jesus suno sa sugo it Dyos nga atong Maneueuwas, ag ni Kristo Jesus nga aton nga ginabasehan ku atong kasiguruhan nga maeuwas kita sa ulihi.

² Nagasueat ako kimo, Timoteo nga ginabilang ko nga akon gid nga unga sa pagtuo. Kabay pa nga masamitan pa gid nimo ro mga pagpakamaayo, kaeuoy ag katawhayan nga halin sa Dyos Ama, ag kay Kristo Jesus nga atong Ginuo.

Ginbilinan ni Pablo si Timoteo nga Papunduhon ro mga Nagaturo it Saea

³ Timoteo, ginahinyo ko kimo it uman, pareho sa akong hinyo kimo bago ako nagpanaw sa probinsya it Macedonia, nga magpabilin ka anay inha sa Efeso, agod hambaean mo ro mga nagaturo it eain kaysa sa matuod nga doktrina nga magpundo eon sa pagturo karon.

⁴ Hambaei man sanda nga indi magpilinati sa mga sugilanon nga bukon it minatuod, nga parti sa mga ngaean nga halin sa kaeawig-eawig nga mga listahan it mga linahi. Ro paeangpan eang karon hay pagbilinais, ay puro man lang ron mga tinahi-tahi nga istorya nga owa it pueos. Indi ron makabulig sa pagpasayod ku plano it Dyos nga maeuwas eang ro tawo paagi sa pagtuo kay Jesus.

⁵ Ro katuyuan ku pagturo it mensahi it Dyos sa mga tawo hay agod magmahigugmaon sanda, dahil limpyo eon ro andang kabubut-on ag konsensya ag agod magtuo sanda it minatuod.

⁶ Ro iba inha hay naglihis sa daean it tama nga doktrina ag idto't-a haadto sa daean it mga istorya nga owa it pueos.

⁷ Gusto nanda nga kilan-on sanda nga mga maaeam nga manogturo it *Kasuguan it Dyos, ag maisog gid sanda magturo, pero owa ngani sanda mismo kaeubot sa andang ginahinambae.

⁸ Hasayran naton nga mayad gid ro Kasuguan it Dyos kon ginagamit ra sa tama.

⁹ Dapat naton nga dumdumon nga ro Kasuguan hay owa pagtaw-an it Dyos agod badlungon ro mga matarong kundi ro mga nagabaliwala sa Kasuguan, ro mga indi magpasakop sa bisan ano nga otoridad, ro mga owa it kahadlok sa Dyos, ro mga makasasaea, ro mga owa it pagtaha sa mga bagay nga sagrado, ag ro mga nagabaliwala sa mga bagay nga mahaega sa Dyos. Ro Kasuguan hay pangbadlong man sa mga nagapamatay sa andang isigkatawo pati ku andang ama o ina,

¹⁰ sa mga nagahulid sa bukon nanda it asawa, sa mga nagahulid sa kapareho man nanda nga mga eaki, sa mga nagapangkidnap agod ibaligya bilang mga ulipon, sa mga purilon, sa mga nagatestigo it pinuril, ag sa mga nagaobra it bisan ano nga kuntra sa tama nga doktrina.

¹¹ Ro tama nga doktrina ngara hay ro Mayad nga Balita nga gintugyan kakon agod ituro. Nagapahayag ra ku pagkadaeayawon it Dyos nga ginahalinan it tanan nga pagpakamaayo.

Nagapasaeamat si Pablo sa Dyos sa Anang Sobrang Kabuot

¹² Nagapasaeamat ako kay Kristo Jesus nga aton nga Ginuo dahil ginbilang nana ako nga masaligan nga magserbi kana sa paghimo ku anang gintugyan ngaron kakon, ag gintaw-an nana ako it kapas nga mahimo ron.

¹³ Ginpili gihapon nana ako bisan kato anay hay gin-ininsulto ko imaw ag maisog ag mapintas ako sa akong paghiningabot sa anang mga sumueunod. Pero ginkaeuy-an ako it Dyos ay kato hay owa pa ako nagatuo kana ngani owa gid ako kasayod nga saea gali ro akong ginahimo ngato.

¹⁴ Ginbu-bu pa ngani kakon nga owa it hawid-hawid ku atong Ginuo ro anang sobrang kabuot, ay gintaw-an nana ako it pagtuo kana ag paghigugma nga una sa tanan nga may maeueot nga kaangtanan kay Kristo Jesus.

¹⁵ Masaligan ro haeambaeunon ngara, ag bagay gid nga patihan: Si Kristo Jesus hay nag-adto riya sa kalibutan agod euwason ro mga makasasaea. Ag ako gid ro pinakamaeaot kanda tanan.

¹⁶ Pero duyon ro rason nga ginkaeuy-an ako it Dyos agod paagi karon hay ikapakita ni Kristo Jesus nga grabi ro anang pagkamapinasensyahon. Ag kabay pa nga kon hieubtan ra it mga tawo hay magatuo man sanda kana, ag makabaton sanda it kabuhi nga owa it katapusan.

¹⁷ Ngani padunggan ag dayawon naton ro Dyos hasta sa owa it katapusan. Imaw gid lang ro Dyos ag hari imaw hasta sa owa it katapusan, owa gakamatay ag indi makita. Matuod 't-a ra!

¹⁸ Timoteo, ginakabig ko ikaw nga akon nga unga. Ro akon ngaron nga ginatugyan kimo nga imong obrahon inha sa Efeso hay nagakasinanto sa mga gintagna kato parti kimo. Ag kabay pa nga rato nga mga ginhambae parti kimo hay magpaisog kimo, agod makasukoe ka it mayad sa mga nagaturo it eain kaysa sa matuod nga doktrina.

¹⁹ Siguraduha nga hugot ro imong pagtuo ag perming limpyo ro imong konsensya, ay ro iba hay owa eon nagapamati sa andang konsensya ngani naduea eon ro andang pagtuo pareho it barko nga sumadsad ag ginwasak it daeagko nga humbak.

²⁰ Makaruyon ro natabo kanday Hymeneus ag Alexander. Gin-intrigar ko eon sanda kay Satanas agod masayran nanda nga bukon it mayad ro gainsulto sa Dyos.