1 Tesalonica 5 - Inkeanon

Dapat Mangin Alisto Kita sa Pagbalik it Ginuo

¹ Pero kon parti sa kon hin-uno gid ro adlaw nga gabalik ro Ginuo, mga igmanghod, hay owa eon it kinahangean pa nga sueatan kamo,

² tungod kamo mismo hay nakasayod gid nga ro Adlaw nga gabalik ro Ginuo hay matabo sa oras nga owa ginaeaumi it tawo, pareho it pag-abot it manakaw sa gabii.

³ Kon siin ngani gahambae ro mga tawo nga malinong man ag matsa owa gid it peligro hay dikaron man gulpi eang sanda nga abutan it grabi nga pagpina it Dyos nga indi gid nanda malikawan. Ro pag-abot karon hay pareho it pagsaeapo sa sangka manog-unga nga gulpi eang.

⁴ Pero kamo, mga igmanghod, hay indi hikibot kon mag-abot eon ro adlaw ngaron nga parehas it tawo nga hakibot pag-abot it manakaw, tungod owa eon kamo nagakabuhi sa kadueom it saea.

⁵ Kamo tanan hay nakaeubot eon sa mensahi it Dyos ag pareho ron it nagakabuhi kamo sa kahayag it adlaw. Kita nga nagatuo kay Jesus hay owa eon nagakabuhi sa kadueom it saea ay nahayagan eon ro atong paino-ino.

⁶ Ngani indi kita magtuead sa mga owa nagatuo nga matsa mga nagakatueog kundi dapat nga alisto kita ag may pagpugong sa atong kaugalingon.

⁷ Bukon baea it sa gabii hay bukon it alisto ro mga tawo dahil nagakaeatueog sanda, ag sa gabii man nagaininom ro mga paeahilong?

⁸ Pero kita hay nagakabuhi eon sa kahayag, ngani magpugong kita sa atong kaugalingon. Dapat nga mangin pareho kita it soldado nga protektado sa pagsalakay it kaaway. Ro atong pagtuo ag paghigugma sa Dyos hay una dapat permi sa tagipusuon ay pareho sanda it panaming sa dughan. Ag ro aton nga kasiguruhan nga pagaeuwason kita it Dyos sa ulihi hay pareho it helmet nga pangprotektar sa ueo.

⁹ Ro plano it Dyos para katon hay bukon it hisamitan naton ro anang pina sa atong mga kasae-anan kundi maeuwas kita sa pina ngato paagi sa ginhimo ku atong Ginuo nga si Jesu-Kristo.

¹⁰ Imaw hay namatay para katon agod bisan buhi man o patay eon kita sa anang pagbalik, magakabuhi gihapon kita kaibahan nana.

¹¹ Ngani padayuna ninyo ro inyong pagpabaskog ku buot ag pagpalig-on ku pagtuo it kada isaea, pareho ku inyo eon nga ginaobra.

Mga Katapusan nga Bilin ag Sugo nanday Pablo

¹² Mga igmanghod, hara ro among katapusan nga mga bilin kinyo. Tahura ninyo ro mga nagapanikasog sa oeobrahon nga gintao kanda it Ginuo nga magdumaea ag magturo kinyo.

¹³ Pahaegahi gid ninyo sanda it mayad ag palanggaa sanda tungod sa andang ginaobra para kinyo. Mag-ililiba kamo nga may paghidait sa kada isaea.

¹⁴ Ag ginahinyo man namon kinyo, mga igmanghod, nga paandami ninyo ro mga matamad. Aeam-aeami ninyo ro mga ginaeuyahan it buot, buligi ro mga bukon pa it malig-on ro pagsunod sa Ginuo, ag mangin mapinasensyahon kamo sa tanan.

¹⁵ Dapat nga owa it bisan sambilog kinyo nga magbaeos bisan kanyo kon may magkasaea kinyo. Imbis nga magbaeos kamo hay tinguhaa gid ninyo ro paghimo it mayad sa kada isaea kinyo ag sa tanan nga tawo.

¹⁶ Magkalipay kamo permi.

¹⁷ Magpangamuyo kamo permi.

¹⁸ Magpasaeamat kamo permi sa Dyos bisan ano ro inyong kahimtangan, tungod raya ro kabubut-on it Dyos nga obrahon ninyo bilang mga tumueuo ni Kristo Jesus.

¹⁹ Ayaw ninyo pagbaeabagi ro ginahimo it Espirito Santo.

²⁰ Kon may mga mensahi nga ginbutang ro Espirito Santo sa paino-ino it inyong mga kaibahan agod ipaabot kinyo hay ayaw gid ron ninyo pagbaliwalaa.

²¹ Pero usisaa ninyo ro tanan nga ginahambae ngato kon halin gid rato sa Dyos o bukon. Batuna ag sunda kon ano ea't-a ro mayad

²² ag likawi ro tanan nga klasi it kaeainan.

²³ Kabay pa nga ro Dyos nga ginahalinan it katawhayan hay imaw man ro gabulig kinyo nga magpangabuhi it matarong gid bilang anang mga katawhan nga anang ginpaeain. Ag kabay pa nga bantayan nana ro bilog ninyo nga pagkatawo agod sa pagbalik it atong Ginuo nga si Jesu-Kristo hay owa gid kinyo it ikasaway.

²⁴ Ro Dyos nga gatawag kinyo bilang anang mga katawhan hay masaligan ag ana gid nga sabton ro akong pangamuyo ngara.

²⁵ Mga igmanghod, ipangamuyo man ninyo kami.

²⁶ Magkueumustahan kamo bilang katawhan it Dyos nga may pagpalangga sa kada isaea.

²⁷ Ipangako ninyo kakon sa ngaean it Ginuo nga basahon ninyo ro sueat ngara sa tanan nga mga kaigmanghuran sa pagtuo inha.

²⁸ Kabay pa nga masamitan pa gid ninyo ro sobrang kabuot ku atong Ginuo nga si Jesu-Kristo.