1 Tesalonica 3 - Inkeanon

Ginpaadto ni Pablo si Timoteo sa Tesalonica Agod Kumustahon kon Mauno eon ro Andang Pagtuo

¹ Ngani tag indi eon namon matiis ro among kahidlaw kinyo, ginpakamayad lang namon nga magpabilin kami ni Silas sa syudad it Atenas,

² ag paadtunon inha kinyo si Timoteo. Igmanghod naton ra imaw sa pagtuo ag kapareho man namon nga nagaserbi sa Dyos sa pagwali it Mayad nga Balita parti kay Kristo. Ginpaadto namon imaw inha kinyo agod buligan kamo nga maglig-on pa gid ro inyong pagtuo,

³ para indi magtalikod ro bisan sambato kinyo sa inyong ginatuuhan dahil sa mga paghingabot nga inyong ginaagyan. Sayod man kamo nga kaibahan ron sa plano it Dyos katon.

⁴ Sayod eon eagi ninyo ron ay tag inha pa kami kinyo hay amon eagi kamo nga ginsugiran nga kita nga nagatuo kay Jesus hay pagahingabuton gid. Sayod kamo nga nagminatuod ro among ginhambae ngato kinyo ay ginaagyan eon ngani ninyo.

⁵ Mawron ngani nga ginpaadto ko inha si Timoteo, ay indi ako himayang ag gusto kong masayran kon nagapadayon kamo sa inyong pagtuo. Basi sinakon kon hatentar eon kamo ku Panueay nga magtalikod sa inyong ginatuuhan, ag mangin owa it pueos ro among kabudlay sa pagtinuro kinyo.

Nalipay si Pablo Pagkasayod Nana nga Malig-on Gihapon ro Pagtuo ku mga TagaTesalonica

⁶ Pero nakabalik eon iya kamon si Timoteo ag mayad gid ro anang ginbalita kamon parti sa inyong pagtuo kay Jesus, ag sa inyong paghigugma sa Dyos ag sa inyong isigkapareho. Ginsugid man nana kamon nga nalipay kamo nga nagapanumdum kamon permi ag pareho man kamo kamon nga gustong magkililita kita it uman.

⁷ Ngani mga igmanghod, ro balita ngaron nga nagapadayon kamo sa inyong pagtuo hay nagapabaskog ku amon nga buot bisan nagaantos kami ag abo ro amon nga ginaatubang nga kalisdanan.

⁸ Mat habugnutan eon kami it tunok sa dughan ay sayod eon namon nga malig-on gihapon ro inyong pagtuo sa Ginuo.

⁹ Kon gapangamuyo kami sa atong Dyos hay owa kami it mga bisaea nga magamit agod ikapaabot gid ro among pagpasaeamat kana sa among grabi nga kalipay dahil sa anang ginhimo kinyo.

¹⁰ Adlaw-gabii hay nagapakitluoy gid kami sa Dyos nga kabay pa nga magkililita kita it uman, agod mas mapalig-on pa gid namon ro inyong pagtuo.

¹¹ Kabay pa nga ro Dyos mismo nga atong Ama ag ro atong Ginuo nga si Jesus ro maghimo it paagi nga makabalik kami inha kinyo.

¹² Kabay pa nga pabahueon gid it Ginuo ro inyong paghigugma sa kada isaea, ag sa tanan nga mga tawo pareho ku among paghigugma kinyo.

¹³ Kon makaruyon ro inyong paghigugma hay mangin pursigido pa gid kamo nga magpangabuhi it matarong bilang mga katawhan it Dyos nga anang ginpaeain. Ag makaatubang kamo nga owa it kasawayan sa atong Dyos nga Ama sa pagbalik ku atong Ginuo nga si Jesus, kaibahan ku tanan nanang mga balaan nga katawhan.