1 Tesalonica 2 - Inkeanon

Ro Pagserbi ni Pablo Para sa Kamaeayran ku Mga TagaTesalonica

¹ Mga igmanghod, kamo mismo hay nakasayod nga ro primero namong pagbisita inha sa Tesalonica hay nagbunga it mayad kinyo, ag nagapadayon ron hasta makaron.

² Hasayran man ninyo nga ginpaantos kami ag ginpakahuy-an tag idto pa kami sa Filipos bago kami nag-adto inha kinyo. Pero sayod namon nga indi kami pagpabay-an it aton nga Dyos, ngani nag-isog ro among buot ag nag-adto gihapon kami inha ag nagwali kinyo ku Mayad nga Balita nga halin sa Dyos bisan abo ro nagakuntra kamon.

³ Gapakilaea ron nga kon ginahinyo namon ro mga tawo nga batunon ro among mensahi hay owa kami it motibo nga malaswa o tuyo nga magpataeang o magpangluko.

⁴ Hapamatud-an it Dyos nga masaligan kami ngani gintugyanan nana kami nga magwali ku Mayad nga Balita. Ngani makasalig kamo nga ro among ginawali hay kamatuuran. Owa't-a namon ginabayluhi ro mensahi it Dyos agod eang malipay ro tawo karon. Ro importanti't-a hay malipay 't-a karon ro Dyos, dahil imaw 't-a ro nakatungkad kon ano gid ro una sa among tagipusuon.

⁵ Sayod kamo nga owa it makahambae nga gin-into namon kamo ag owa man kami nagturo kinyo agod eang makapangwarta. Saksi karon ro Dyos!

⁶ Ag owa man kami nagapadayaw-dayaw sa tawo, bisan kinyo o kanyo pa.

⁷ Bilang mga apostoles ni Kristo hay may kinamatarong kami nga magpangayo it bisan ano kinyo pero owa ron namon gin-obraha tag inha pa kami. Nangin mabuot 't-a kami pareho it ina nga nagatatap sa anang mga maintok nga mga unga.

⁸ Tag inha pa kami hay nalipay kami bukon eang it sa pagsugid kinyo ku Mayad nga Balita halin sa Dyos kundi haom pa gid kami nga isakripisyo ro amon mismong kabuhi para kinyo. Makaruyon kabahoe ro among paghigugma kinyo.

⁹ Hadumduman man siguro ninyo, mga igmanghod, nga tag inha pa kami nga nagawali ku Mayad nga Balita halin sa Dyos hay nagpatay-patay kami sa pagtrabaho. Adlaw-gabii hay nagpangita't-a kami agod indi kami magpabug-at bisan kanyo kinyo.

¹⁰ Kamo nga mga tumueuo ag ro Dyos mismo hay saksi namon nga tag inha pa kami hay mayad ro among pagtratar kinyo. Nagpangabuhi kami nga matinumanon sa Dyos, matarong ag owa it kasawayan.

¹¹ Sayod kamo nga ro among pagtratar sa kada isaea kinyo hay pareho ku pagtratar it ama sa anang mga unga.

¹² Ginpinabakod namon ro inyong buot, gin-inaeam-aeaman kamo ag permi namon nga ginbilinan nga magkabuhi it bagay sa mga katawhan it Dyos. Imaw ro Dyos nga gatawag ag gatapoe kinyo sa anang mga sinakpan ag mag-ambit sa anang kadungganan.

¹³ Permi man kami nagapasaeamat sa Dyos tungod pagkabati ninyo ku among mensahi hay ginbaton ninyo nga halin gid ra sa Dyos, bukon it halin eang sa tawo. Ag matuod nga halin gid ma't-a ra sa Dyos. Ro mensahi ngara hay nagapamunga it mayad sa kabuhi ninyo nga mga tumueuo.

¹⁴ Hasayran namon ra tungod nagpadayon kamo sa inyong pagtuo bisan pa ginhingabot kamo ku inyong mga kasimanwa. Mga igmanghod, pareho ro inyong haagyan ag ro haagyan man ku mga grupo it mga tumueuo sa probinsya it Judea nga may maeueot nga kaangtanan kay Kristo Jesus. Ginbatas man nanda ro mga paghingabot ku andang mga kasimanwa nga mga *Judio.

¹⁵ Mga Judio man ro nagpinamatay ku mga propeta kato anay ag imaw man kay Ginuong Jesus. Mga Judio man ro naghingabot it grabi kamon ag nagaobra sanda permi it makapaakig sa Dyos ag kuntra nanda ro tanan nga mga tawo.

¹⁶ Ginapugngan kunta nanda kami sa pagsugid ku mensahi it Dyos sa mga bukon it Judio agod maeuwas ra sanda. Sa andang ginahimo ngaron hay mas kapin nandang ginadugangan ro mga saea nga ginhinimo ku andang kalolo-lolohan halin pa kato. Ngani naakig gid ro Dyos kanda ag kon mapuno eon imaw hay indi nanda malikawan ro anang pina.

Nahidlaw gid si Pablo sa mga TagaTesalonica

¹⁷ Mga kaigmanghuran, tag ginpahalin kami inha kato it pilit, naghalin matuod kami pero inha permi ro among buot kinyo. Grabi gid-a ro among handom ag gusto nga makita kamo it uman, bisan man-o pa eang it buhay kitang owa magkilita.

¹⁸ Mawron ngani nga gabalik kunta kami inha kinyo. Bukon eang it kaisaea ako gaadto kunta inha ugaling hay ginbaeabagan kami ni Satanas.

¹⁹ Gusto namon nga makita kamo it uman tungod ro inyong malig-on nga pagtuo hay nagatao kamon it kalipay, ag ipabugae namon ron sa atong Ginuo kon magbalik eon imaw. Ag dahil man karon hay sigurado kami nga ana kami katong premyuhan.

²⁰ Matuod 't-a ron, kamo ro among ikapabugae ag dahilan ku among kalipay.