1 Tesalonica 1 - Inkeanon

Mga Pagpangamusta

¹ Raya nga sueat hay halin kamon nga sanday Pablo, Silvanus, ag Timoteo. Nagasueat kami kinyo nga grupo it mga tumueuo inha sa Tesalonica, kamo nga may maeueot nga kaangtanan sa Dyos Ama ag kay Ginuong Jesu-Kristo. Kabay pa nga masamitan pa gid ninyo ro mga pagpakamaayo ag katawhayan nga halin sa Dyos.

Ro Pagpasaeamat ni Pablo sa Pagtuo it mga TagaTesalonica nga Makita sa Andang Kabuhi

² Permi kami nga nagapasaeamat sa Dyos dahil kinyo tanan ag ginasambit namon kamo permi sa amon nga mga pangamuyo.

³ Kon magpangamuyo kami para kinyo hay amon nga ginadumdum ro mga mayad nga buhat nga inyong ginahimo tungod sa inyong pagtuo. Ginadumdum man namon ro inyong pagpangabudlay sa pagbulig sa iba tungod sa inyong paghigugma kanda. Ginadumdum man namon ro inyong pagtiis sa pihak it mga paghingabot dahil sigurado kamo nga batunon kamo it Dyos nga atong Ama dahil sa inyong pagtuo sa atong Ginuong Jesu-Kristo.

⁴ Mga igmanghod nga palangga it Dyos, nagapasaeamat kami tungod hasayran namon nga kamo hay ginpili it Dyos nga mangin anang mga katawhan.

⁵ Hasayran namon ron tungod ro Mayad nga Balita nga amon nga ginwali kinyo hay bukon it puro eang hinambae kundi kaibahan kato ro gahom it Espirito Santo mawron nga nagpati kamo nga matuod gid rato. Nakasayod man kamo kon mauno ro among pagginawi tag inha pa kami agod buligan kamo.

⁶ Ag inyo gid-a nga ginbaton ro among mensahi nga may kalipay halin sa Espirito Santo bisan grabi ro paghingabot kinyo. Sa inyong pagtiniis it mga paghingabot ngaron hay ginatuead ninyo kami, pati ro Ginuo.

⁷ Dahil man karon hay nangin hueuwaran kamo it tanan nga mga tumueuo sa mga probinsya it Macedonia ag Acaya.

⁸ Ag inyong ginpaeapnaag ro mensahi hanungod sa Ginuo bukon eang it sa bilog nga Macedonia ag sa Acaya kundi sa mas maeayo pa nga mga lugar. Ag ro inyong pagtuo hay bantog man hasta sa kon siin-siin pa nga mga lugar. Owa eo't-a namon ron ginaistorya sa mga tawo ay sayod eon eagi sanda.

⁹ Sanda mismo ro nagasugid kon mauno ro inyong pagbaton kamon ag kon paalin ninyo gintalikdan ro inyong mga diyos-diyos agod magserbi sa matuod ag buhi nga Dyos.

¹⁰ Ag ginasugid man nanda nga ginapaabot gid ninyo ro pagbalik halin sa eangit ku anang Unga nga anang ginbanhaw. Ro anang Unga ngara hay si Jesus, ag imaw ro magaeuwas katon sa pina nga maabot tungod sa kaakig it Dyos sa kasae-anan it tawo.