1 Pedro 5 - Inkeanon

Mga Bilin sa Mga Manogdumaea it mga Tumueuo

¹ Dahil sa mga kalisdanan ngaron, may akon nga ginahambae kinyo nga mga nagadumaea sa mga tumueuo. Tungod manogdumaea man ako, ag saksi man ako sa pag-antos kato ni Kristo, ag isaea man sa mga makaambit sa anang kadungganan nga inogpahayag eon, ngani ginahinyo ko kamo nga

² tatapa ninyo ro mga katawhan nga gintugyan kinyo it Dyos nga matsa anang panong it karnero. Dumaeahi ninyo sanda bukon it dahil napilitan eang kamo, ukon dahil gusto eang ninyo nga makapangwarta kundi dahil 't-a nga naila gid kamo nga obrahon ron, ay sayod ninyo nga kabubut-on gid 't-a ron it Dyos para kinyo.

³ Ayaw ninyo pagdominahi ro mga tawo nga gintugyan kinyo, kundi mangin hueuwaran kamo nanda paagi sa inyong mayad nga batasan.

⁴ Ag kon magbalik eon si Kristo nga Pinakapinuno naton tanan nga mga manogdumaea it mga tumueuo hay ana kita nga premyuhan it owa't katapusan nga kadungganan.

Dugang nga mga Bilin Para sa mga Tumueuo

⁵ Kamo ma't-a nga mga pamatan-on nga mga eaki, ro akon nga bilin kinyo hay magpasakop gid kamo sa mga manogdumaea inha kinyo. Ag kamo tanan inha hay dapat nga mapainubuson sa kada isaea ay nasueat sa Kasueatan nga, “Ro mga palabi-labihon hay ginakuntra it Dyos pero ro mga mapainubuson hay anang ginapakamaayo.”

⁶ Ngani mangin mapainubuson gid kamo sa makagagahom nga Dyos agod ana kamo nga padunggan sa oras nga anang gintaeana.

⁷ Tugyanan ninyo sa Dyos ro tanan ninyong ginakahawagan ay nahakat imaw kinyo.

⁸ Pugngi ro inyong kaugalingon ag mangin alisto permi ay ro inyong kaaway nga si Satanas hay pareho it naganginueob nga liyon nga nagalinibot ag nagainusoy it anang maeapa-eapa.

⁹ Sukei ninyo imaw paagi sa inyong malig-on nga pagtuo sa Dyos ay sayod kamo nga bukon eang it kamo ro nagaagi it mga kalisod. Ro inyo ngarong ginaagyan hay pareho man sa ginaagyan ku inyong mga kaigmanghuran sa pagtuo sa bilog nga kalibutan.

¹⁰ Sa sobrang kabuot it Dyos hay ana kamo nga gintawag nga mag-iba kana sa anang kadungganan nga owa it katapusan, dahil sa inyong maeueot nga kaangtanan kay Kristo Jesus. Ngani pagkatapos it inyong madali man lang nga pag-antos, ro Dyos mismo ro magatao ku tanan ninyong kinahangeanon sa inyong pagkabuhi bilang mga tumueuo, magapalig-on it uman ku inyong pagtuo ag magapabaskog ku inyong buot, agod mangin kapareho kamo it bilding nga nagatindog it malig-on sa anang pundasyon.

¹¹ Imaw ro Makagagahom nga nagahari hasta sa owa it katapusan. Amen.

Katapusan nga mga Pagpangamusta

¹² Gin-obra ko raya ngara nga matag-od nga sueat sa bulig ni Silvanus nga ginabilang nakon nga masaligan nga igmanghod sa pagtuo. Nagsueat ako kinyo kara agod mapabaskog ko ro inyong buot ag agod pamatud-an ko dikara kinyo ro matuod nga sobrang kabuot it Dyos. Ayaw gid ninyo pagbaliwalaa ro anang sobrang kabuot ngara kundi paagi kara hay magpalig-on kamo permi sa inyong pagtuo kana.

¹³ Nagapangamusta kinyo ro inyong mga kaigmanghuran nga pinili man it Dyos iya sa Babilonya, pati man si Marcos nga akong ginabilang nga unga sa pagtuo.

¹⁴ Magkueumustahan kamo nga may pagpalangga sa kada isaea. Kabay pa nga taw-an kamo tanan it Dyos it katawhayan, kamo nga may maeueot nga kaangtanan kay Kristo.