1 Pedro 4 - Inkeanon

Ginbag-o Eon ro Atong Kabuhi Bilang mga Tumueuo

¹ Tungod haom si Kristo nga mag-atubang sa mga kasakit ag pag-antos nga naagyan nana tag iya pa imaw sa kalibutan, ngani dapat nga ro inyong paino-ino hay pareho man ku ana, agod nga haom kamo nga magtuo gihapon bisan mag-antos kamo dahil karon. Kon haom ro sangka tawo nga obrahon ron hay nagapakita ron nga nagtalikod eon imaw sa pagpakasaea.

² Owa eon nana ginagamita ro nabilin nga inadlaw ku anang kabuhi iya sa kalibutan sa pagbusog ku anang mga kalibutanon nga kailigbon kundi sa pagtuman ku kabubut-on it Dyos.

³ Tama eon ro oras nga inyo nga gin-amulitan kato sa inyong kabuhi sa pag-intra sa mga maeain nga ginahimo ku mga owa nagakilaea sa Dyos. Ro inyong ginaobra kato hay owa ninyo ginahawid-hawiri ro inyong kaueag, ginapagustuhan ninyo ro inyong mga maeain nga handom, gahinilong, gahilinadya nga owa it pugong-pugong ag puro eang ininom ag inueag nga buhat, ag nagasimba sa mga diyos-diyos nga nagabunga it paghimo it mga bagay nga makangingil-ad.

⁴ Makaron hay hangawa ro inyong mga kaibahan kato sa pag-obra karon, ag grabi eon ro andang pagpakaeain kinyo ay owa eon kamo nagahama-hama nga mag-intra sa andang sobrang hinaras-haras.

⁵ Pero maabot ro adlaw nga manabat sanda sa Dyos nga haom maghukom sa tanan nga tawo, sa mga buhi pa ag sa mga patay eon pag-abot it adlaw ngaron.

⁶ Parti sa mga tumueuo nga namatay eon hay bukon sanda it alkansi sa adlaw it paghukom dahil ginwalihan sanda it Mayad nga Balita ag nagtuo sanda. Ngani bisan namatay ro andang eawas pareho ku normal nga dangatan it tawo hay magapadayon it pagkabuhi ro andang espirito pareho it Dyos.

Paalin Dapat Magkabuhi ro mga Tumueuo sa Rayang Katapusan nga mga Inadlaw

⁷ Madali eon lang ro katapusan it kalibutan, ngani magpaino-ino kamo it maeawig, ag timbang-timbanga ninyo it mayad ro mga butang agod mas insakto ag epektibo ro inyong mga pangamuyo.

⁸ Eabaw sa tanan, maghigugmaanan kamo it hantop sa inyong tagipusuon. Kon ginahigugma abi ninyo ro inyong isigkatawo hay mapatawad gid ninyo imaw maskin man-o it abo ro anang saea kinyo.

⁹ Diparaha it mayad ro inyong mga isigkatumueuo nga nagadayon sa inyo, ag ayaw kamo it minueo-mueo.

¹⁰ Sari-sari ro mga abilidad nga gintao it Dyos sa anang mga katawhan. Ro kada isaea katon hay dapat nga gamiton ro anang abilidad nga gintugyan it Dyos kana sa pagbulig sa kada isaea bilang matutom nga sueuguon nga gintugyanan it anang pagpakamaayo ngaron.

¹¹ Ro gintaw-an it abilidad sa paghambae hay dapat maghambae it seryoso, ay ro andang ginahambae hay parti't-a sa mensahi it Dyos. Ro gintaw-an it abilidad sa pagbulig sa mga tawo sa andang kinahangeanon hay dapat nga magbulig paagi sa ikasarang nga ginatao it Dyos para dikaron. Sa tanan ninyong ginahimo hay dapat nga dayawon ro Dyos dahil kay Jesu-Kristo. Daeayawon gid imaw ag makagagahom hasta sa owa it katapusan. Amen!

Ro Dapat Natong Himuon Kon Ginahingabot Kita Dahil sa Atong Pagtuo

¹² Mga hinigugma, ayaw kamo makibot sa mga grabi nga paghingabot nga inyong ginaagyan, ay pareho ron it kaeayo nga nagatesting ku inyong pagtuo kon minatuod ron o bukon. Ayaw man kamo mag-isip nga bukon 't-a it normal ro nagakaeanabo ngaron kinyo bilang tumueuo.

¹³ Imbis nga makibot kamo kon ginahingabot kamo hay magkalipay kamo, ay may inyo nga kahigayunan nga mag-antos para kay Kristo pareho ku anang pag-antos para kinyo. Ag kon makaruyon hay magakalipay man kamo it duro kon magbalik eon imaw ag ipahayag ro anang kadungganan.

¹⁴ Ngani kon ginatuya-tuya kamo dahil sa inyong pagtuo kay Kristo hay bulahan kamo, tungod ginabuligan kamo ku makagagahom nga Espirito it Dyos nga una kinyo.

¹⁵ Kon ginapaantos kamo hay bukon dapat it dahil nakahimo kamo it maeain pareho it pagpatay it tawo, pagpanakaw ukon dahil sa inyong pagpasilabot sa iba.

¹⁶ Pero kon ginapaantos kamo dahil mga Kristyano kamo hay ayaw kamo it kahuya kundi dayawa ninyo ro Dyos ay mga sumueunod kamo ni Kristo.

¹⁷ Maeapit lang ro tyempo nga umpisahan it Dyos ro anang paghusgar sa mga tawo iya sa kalibutan ag kita nga anang mga katawhan ro anang unahon. Kon ro mga kalisod nga atong ginaagyan makaron hay umpisa eon it anang paghusgar, ano eon lang baea ro matabo sa mga indi magpati sa Mayad nga Balita nga halin sa Dyos? Grabi gid ro andang hiagyan.

¹⁸ Pareho sa nasueat sa Sagrado nga Kasueatan, “Kon nagakalisod ngani ro mga matarong bago maeuwas, hay ano lang ro dangaton ku mga owa it kahadlok sa Dyos, ag ku mga makasasaea?”

¹⁹ Ngani kamo nga nagaantos it kalisod suno sa pagbuot it Dyos hay padayuna ninyo ro paghimo it mayad ag tugyanan ninyo ro inyong kaugalingon sa Dyos nga inyong Manunuga nga masaligan gid.