1 Pedro 3 - Inkeanon

Mga Bilin sa mga Mag-asawa

¹ Raya ro akong mga bilin sa mga bayi nga may asawa. Magpasakop kamo sa inyong asawa agod kon ro iba kanda hay owa nagapati sa mensahi it Dyos hay madaea sanda paagi sa inyong mayad nga buhat bisan indi kamo kanda maghambae.

² Madaea sanda dahil hikita nanda ro inyong pagkamatinahuron ag ro inyong buhat nga malimpyo.

³ Kon parti man sa inyong pagpagwapa, ro matuod nga kagwapa hay bukon it resulta it pagpinanami it inyong itsura, pareho it pag-inayos it inyong buhok o pagsinuksuk it alahas ag maeahaeon nga eambong. Ro mga ruyon ngaron hay sa guwa eang.

⁴ Ro matuod 't-a nga kagwapa hay ro inyong maeueo ag matawhay nga kabubut-on. Ruyon nga kagwapa hay owa it pagkupas ag mahaega gid sa mata it Dyos.

⁵ Makaruyon man abi ro kabubut-on ku mga balaan nga bayi kato nga nagatuo ag nagasalig sa Dyos. Ginpagwapa nanda ro andang kaugalingon sa andang pagpasakop sa andang asawa.

⁶ Makaruyon anay si Sara nga nagtinuman sa anang asawa nga si *Abraham ag ginbilang nana ra nga anang amo. Ngani kon nagahimo kamo permi it mayad, ag owa kamo it kahadlok nga basi maltratuhon ku mga asawa ninyo dahil karon hay mabilang kamo nga mga inapo ni Sara.

⁷ Sa mga eaki ma't-a hay raya ro akong bilin. Sa inyong pagpangabuhi bilang mag-asawa, tinguhaa ninyo nga maeubtan ro kinahangeanon ku inyong asawa, ag taw-i ninyo sanda it ligwa ay mas maeuya ron sanda kaysa kinyo nga mga eaki. Tahura sanda ay paeareho kamo nga gintaw-an ku regalo it Dyos nga owa't katapusan nga kabuhi. Sunda ninyo ro mga bilin ngara agod owa it gaabang sa inyong pangamuyo.

Mga Bilin Para sa Tanan nga Tumueuo

⁸ Hara ro akong mga bilin para kinyo tanan. Magkaeasugot kamo ag mag-ueunungan. Higugmaa ro inyong kaigmanghuran sa pagtuo ag mangin maeueuy-on ag mapainubuson sa kada isaea.

⁹ Ayaw ninyo pagbasli it maeain ro maeain nga ginahimo kinyo. Ayaw man pagbasli it pagpakaeain ro pagpakaeain kinyo. Imbis nga magbaeos kamo hay pangayua ninyo sa Dyos nga pakamaayuhon ro nagahimo karon kinyo. Himua ninyo ron ay duyon ro tuyo nga gintawag kamo it Dyos, ag kon tumanon ninyo ron hay ana man kamo nga pakamaayuhon.

¹⁰ Nasueat abi sa Sagradong Kasueatan, “Ro nagahandom it mayad ag malipayon nga pagpangabuhi hay dapat nga magtalikod sa paghambae it maeain ag pinuril agod eang makapangluko.

¹¹ Dapat man imaw nga magtalikod sa mga maeain nga buhat ag maghimo dapat imaw it mayad. Dapat man nga obrahon nana ro tanan nanang ikasarang, agod may anang paghidait sa anang isigkapareho.

¹² Ginabantayan it Dyos ro mga matarong, ag anang ginapamatian ro andang mga pangamuyo. Pero ginakuntra it Dyos ro mga nagahimo it maeain.”

Ro Pagturo Parti sa Pag-antos Dahil sa Paghimo it Mayad

¹³ Sin-o baea ro magahalit kinyo kon ginapahaegahan ninyo permi ro paghimo it mayad?

¹⁴ Pero bisan kon ginapaantos kamo dahil sa inyong pag-obra it matarong hay bulahan kamo. Ayaw it kahadlok sa mga nagahingabot kinyo ag ayaw it kahawag.

¹⁵ Imbis magminakaron kamo hay dapat nga tahuron ninyo si Kristo ag kilaeaha't-a ninyo it hantop sa inyong tagipusuon nga imaw eang ro inyong Ginuo. Dapat hay haom kamo permi sa pagsabat kon may magtaksar kinyo kon ham-a't sigurado kamo nga mabaton ninyo ro inyong ginapaabot sa ulihi bilang tumueuo.

¹⁶ Pero sabta ninyo sanda nga may kaeueo ag pagtahod. Magpangabuhi kamo nga perming may limpyo nga konsensya agod kon may mga nagapakaeain kinyo hay mahuy-an ro mga nagahimo karon dahil mayad ro inyong buhat bilang mga tumueuo ni Kristo.

¹⁷ Kon pagbuot gid man it Dyos nga mag-antos kamo hay mas mayad nga mag-antos kamo dahil sa paghimo it mayad kaysa sa mag-antos kamo dahil sa paghimo it maeain.

¹⁸ Ro halimbawa karon hay si Kristo nga nag-antos bisan owa gid imaw nagkasaea. Matarong gid imaw pero namatay imaw para sa mga bukon it matarong, agod ipaeapit kamo nana sa Dyos. Kaisaea eang imaw namatay pero tama eon rato para mapatawad ro mga kasae-anan it tawo. Ginpatay ro anang kalibutanon nga eawas pero ginbanhaw imaw nga may eawas nga espirituhanon.

^19-20 Tag espirito pa anay imaw kato hay imaw ro nagagiya kay Noe tag nagaobra imaw it arka ag nagawali sa mga tawo sa ratong tyempo. Bisan nagpinasensya ro Dyos ag naghinueat sa mga tawo ngato hay indi gid sanda magtuman sa ginwali ni Noe kanda, ngani napriso makaron ro andang espirito. Waeo gid lang nga ka tawo ro nagsueod sa arka ag naeuwas sa gunaw nga gin-obra it Dyos, ag ro tubi man ngato ro nagdaea kanda sa kaeuwasan.

²¹ Rato hay nagasimbolo ku pagbawtismo sa makaron nga tyempo tungod tag ginabawtismuhan kamo, ruyon ro kahalimbawa kon paalin kamo ginaeuwas it Dyos sa pina it saea dahil sa pagkabanhaw ni Kristo. Ro pagbawtismo hay owa kinyo gaeuwas paagi sa paglimpyo it higko sa inyong eawas kundi paagi sa inyong pagpangamuyo sa Dyos nga patawaron na ro inyong kasae-anan.

²² Idto eon si Kristo sa eangit sa pinakadungganon nga pwesto sa tuo it Dyos ag ginbutang eon sa anang paghari ro mga anghel ag ro iba pa nga mga espirito nga may otoridad ag gahom.