1 Pedro 2 - Inkeanon

¹ Ngani tungod may inyo eon nga bag-ong kabuhi, talikdi eon ninyo ro tanan nga kaeainan. Ayaw kamo it pangluko. Ayaw kamo it inipokrito, ayaw kamo it kahisa, ag ayaw man ninyo pagpakaeaina ro inyong isigkatawo.

² Ro mga bag-ong tawo nga eapsag hay permi eang nagutom it gatas ku andang ina. Makaruyon man dapat kamo. Kagutumi ninyo permi ro hambae it Dyos nga pareho it gatas para sa inyong pagtuo. Ro hambae it Dyos hay owa it halo nga pinuril, ag paagi sa hambae ngaron hay gatubo ro inyong pagtuo hasta ron mangin hamtong.

³ Dapat ninyo kagutuman ro hambae it Dyos ay hasamitan eon ninyo kon mauno kabuot ro Ginuo.

Ro Katawhan it Dyos Makaron hay ro Tanan nga Nagatuo kay Jesus

⁴ Buhi gid si Kristo ag ginahalimbawa imaw sa sinilsil nga bato nga ginagamit sa pundasyon it bilding. Ginbilang imaw nga owa it pueos it mga tawo, pero imaw ro pinili it Dyos ag mahaega sa anang panueok. Ag samtang nagapaeapit kamo kay Kristo,

⁵ kamo nga pareho it mga buhi nga bato hay ginagamit it Dyos sa pagpatindog it Templo nga anang ilistaran. Pareho man kamo it mga balaan nga *saserdote nga ro obra hay maghaead sa Dyos it mga haead nga espirituhanon. Ruyong klasi it mga haead hay ginabaton it Dyos dahil sa ginhimo ni Jesu-Kristo.

⁶ Matuod ra tanan dahil nasueat sa Sagradong Kasueatan nga, “Hayra, tan-awa ninyo. May ginpili ako nga pareho it mahaega ag pinakaimportanti nga bato nga akong ginabutang sa pundasyon it ginapatindog ko sa Zion. Ag ro tanan nga nagatuo kana hay indi gid mahuy-an.”

⁷ Ngani, kamo nga nagatuo hay padunggan, pero ro mga owa ma't-a nagatuo hay dapat nanda dumdumon ro nasueat sa Sagradong Kasueatan nga, “Ro bato nga ginbilang nga owa it pueos ku mga panday hay imaw pa gali ro pinakaimportanti nga bato sa pundasyon it bilding.”

⁸ Ag dapat man nanda dumdumon nga imaw hay pareho it “bato nga dahilan nga hinandad ro mga tawo ag hidusmo.” Pinahan sanda ay duyon ro plano it Dyos kanda dahil indi sanda magpati sa anang mensahi.

⁹ Pero kamo't-a hay natapoe sa katawhan it Dyos nga anang pinili ag ana nga ginabilang nga bag-o nga rasa. Mga harianon man kamo nga mga saserdote. Ginpaeain kamo nana agod mangin anang balaan nga rasa. Gintawag nana kamo nga talikdan ro kadueom it saea ag magpangabuhi sa anang makangawa-ngawa nga kahayag. Ag ro anang tuyo hay agod nga isugid ninyo permi sa iba ro anang grabi it nami nga mga ginhimo para kinyo.

¹⁰ Kato anay hay bukon kamo it mga katawhan it Dyos, pero makaron hay mga katawhan eon kamo nana. Kato hay owa pa ninyo hasayri kon mauno imaw ka maeueuy-on, pero makaron hay hasamitan eon ninyo ron.

Mauno Dapat Magpangabuhi ro mga Tumueuo

¹¹ Mga hinigugma, mga estranghero kamong nagapangabuhi bilang mga umaeagi iya sa ibabaw it kalibutan, ngani ginapangabay ko kamo nga indi eon magpadaog sa mga maeain nga handom it eawas nga perming nagaataki sa inyong pagtuo.

¹² Sa inyong pagpangabuhi kaibahan ro mga owa nagatuo sa Dyos hay bantayi gid ninyo nga perming mayad ro inyong hueag agod kon anda kamo nga pabangdan nga nagahimo it maeain hay makita nanda nga mayad 't-a gali ro inyong buhat. Padunggan dayon nanda ro Dyos sa adlaw nga pahayagon nana ro andang paino-ino.

Dapat Kita Magpasakop sa Tanan nga May Otoridad Katon

¹³ Por dahil sa Ginuo hay magpasakop kamo sa tanan nga iya sa kalibutan nga ginbutang it tawo agod magdumaea katon, pareho it Emperador nga may pinakamataas nga otoridad,

¹⁴ ukon mga gobernador nga anang ginabutang agod nga magpina sa mga nagahimo it saea, ag magpadungog sa mga nagahimo it mayad.

¹⁵ Tungod nga ro pagbuot it Dyos hay nga paagi sa inyong mayad nga buhat hay mapahipos ninyo ro mga nagapinaumang it hinambae nga mga owa man it habadwan nga nagapinabangod kinyo.

¹⁶ Ipakita sa inyong pagpangabuhi nga mga hinilway eon kamo. Pero ayaw paggamita nga bangdanan ro inyong kahilwayan agod mag-obra it maeain, kundi magpangabuhi kamo bilang mga ulipon it Dyos.

¹⁷ Trataha ninyo it mayad ro tanan nga mga tawo ag higugmaa ro inyong kaigmanghuran sa pagtuo. Magpangabuhi kamo nga may pagtaha sa Dyos ag tahura ninyo ro Emperador.

¹⁸ Kamo nga mga sueuguon sa sueod it baeay, magpasakop kamo permi nga may mabahoe nga pagtaha sa inyong mga amo, bukon eang kon mayad ag mabuot sanda, kundi bisan pa kon mapintas.

¹⁹ Mayad gid abi sa panan-aw it Dyos kon ginatiis it isaeang ka tawo ro kaeain it buot dahil sa pagpakalisod kana bisan owa imaw it saea, ay sayod nana nga makaruyon ro gusto it Dyos nga ana dapat nga obrahon.

²⁰ Pero indi kamo pagpadunggan kon ro rason nga nagatiis kamo it pagsakit kinyo hay dahil may inyo ma't-ang haobrang saea. Ugaling kon nagatiis kamo it pagsakit bisan mayad ro inyong ginhimo hay ruyon ro mayad sa panan-aw it Dyos.

²¹ Kaibahan ron sa pagtawag kinyo it Dyos dahil si Kristo man ngani hay nakaagi it pagsakit por dahil kinyo, ag ginpakita ron nana nga halimbawa nga inyong dapat nga tuearon.

²² Owa imaw magkasaea ag owa man imaw it ginhambae agod makapangluko.

²³ Bisan gin-insulto imaw hay owa imaw magbaeos it pang-insulto man. Ag bisan ginpasakitan imaw hay owa gid imaw magpamaeag nga mabaeos, kundi ana nga gintugyan ro tanan sa Dyos nga matarong maghukom.

²⁴ Imaw mismo ro nagpanabat sa atong mga kasae-anan tag namatay imaw sa krus. Ginhimo ron nana agod mamatay ro atong kaila sa pagpakasaea ag magakabuhi kita it matarong. Paagi sa anang haagyan nga grabing kasakitan, kamo hay ginmayad.

²⁵ Kato hay pareho abi kamo it mga karnero nga ginapinataeang pero makaron hay ginpabalik eon kamo sa Manogbantay ag Manogtatap ninyo.