1 Pedro 1 - Inkeanon

Mga Pagpangamusta

¹ Raya nga sueat hay halin kakon nga si Pedro nga sangka *apostol ni Jesu-Kristo. Nagasueat ako kinyo nga mga katawhan nga pinili it Dyos nga nagapangabuhi bilang mga umaeagi iya sa ibabaw it kalibutan nga makaron hay nagaistar eon sa nagakaeain-eain nga lugar sa mga probinsya it Pontus, Galacia, Capadosia, Asya ag Bitinia.

² Sayod ro Dyos nga Ama ku tanan parti kinyo kato pa't-a ag gintao nana kinyo ro Espirito Santo agod buligan kamo nga magkabuhi it balaan. Ro anang tuyo hay agod nga magtinguha kamo nga magmatinumanon kay Jesu-Kristo ag agod limpyuhan kamo permi sa inyong kasae-anan paagi sa anang dugo nga nag-agay tag namatay imaw sa krus. Kabay pa nga masamitan pa gid ninyo ro mga pagpakamaayo ag katawhayan nga halin sa Dyos.

Sigurado ag Owa it Katupong ro Kaeuwasan nga Gintao Katon it Dyos

³ Dayawon ta ro Dyos ag Ama ku atong Ginuong Jesu-Kristo. Tungod sa anang mabahoe nga kaeuoy hay gintaw-an nana kita it bag-o nga kabuhi paagi sa pagkabanhaw ni Jesu-Kristo. Mawron nga sigurado gid kita nga mabaton naton sa ulihi ro ginpromisa it Dyos katon.

⁴ Rayang paeanublion nga mabaton naton sa ulihi hay owa gid it pagkasamad bisan hasta hin-uno, owa man it ikasaway, ag owa't pagkupas. Ginatigana gid ra it Dyos idto sa eangit para kinyo.

⁵ Ag paagi sa anang gahom ag sa inyong pagtuo hay ginabantayan nana kamo hasta mag-abot ro katapusan nga mga inadlaw kon siin ana eon nga ipahayag ro kabilugan ku kaeuwasan nga anang ginatigana para katon.

⁶ Ngani tungod sa tanan ngara nga mabaton naton sa ulihi hay nagakalipay kamo it duro bisan dapat ninyong agyan ro sari-sari nga testing sa inyong pagtuo nga nagpasubo kinyo. Ro mga ruyon ngaron hay agi man lang.

⁷ Ro mga kalisod nga inyong ginaagyan hay testing agod masayran kon ro inyong pagtuo hay matuod o bukon. Bisan ro bueawan ngani nga maduea sa ulihi hay kinahangean nga paagyon sa kaeayo agod hisayran kon puro gid. Mas grabi ro haega ku inyong pagtuo kaysa sa bueawan ngani mas kapin pa gid nga dapat testingan ron. Ag sa adlaw nga ipahayag ni Jesu-Kristo ro tanan sa kabuhi it mga tawo, kon hipamatud-an nga matuod ro inyong pagtuo hay pagadayawon ag pagapadunggan kamo.

⁸ Owa pa ninyo hakita si Jesu-Kristo pero inyo imaw nga ginahigugma, ag bisan indi pa ninyo imaw hikita makaron hay nagatuo gihapon kamo kana. Ag owa it bisaea nga makalarawan ku inyong kalipay nga owa it katupong.

⁹ Owa't katupong ro inyong kalipay tungod ginaeuwas kamo it Dyos sa pina ku inyong kasae-anan ag ruyon ro bunga ku inyong pagtuo kay Jesu-Kristo.

¹⁰ Rayang pagpakamaayo it Dyos, nga kaeuwasan ninyo hay ginhambae ku mga propeta nana kato anay nga matabo sa ulihi, pero sanda mismo hay owa kara kaeubot, ngani gin-inistudyuhan ag gin-inusisa nanda ra.

¹¹ Ginpahayag eagi kanda ku Espirito ni Kristo nga nagagiya kanda nga ro Maneueuwas nga paadtunon iya sa kalibutan hay magaagi it kasakit ag pagkatapos hay pagapadunggan. Anda nga gin-inistudyuhan ag gin-inusisa kon hin-uno ron matabo ag kon paalin.

¹² Ginpahayag dayon kanda it Dyos nga ro andang ginahambae hay bukon it para sa andang kamaeayran sa ratong tyempo kundi para't-a sa inyong kamaeayran sa makarong tyempo. Ro ginasugid kinyo makaron ku mga manogturo it Mayad nga Balita sa bulig kanda it Espirito Santo nga ginpaadto it Dyos halin sa eangit hay katumanan ku mga ginhambae ngato ku mga propeta. Bisan ngani ro mga anghel hay naila man nga maeubtan gid it mayad ro mga bagay ngaron.

Dapat Kita nga Magpangabuhi it Balaan

¹³ Ngani mangin haom kamo sa pag-atubang sa bisan ano nga maabot sa inyong kabuhi. Eawiga ro inyong paino-ino. Lig-una ro inyong pagsalig nga inyong mabaton ro mayad nga kahimtangan nga itao kinyo it Dyos sa adlaw it pagbalik ni Jesu-Kristo.

¹⁴ Tumana permi ninyo ro Dyos bilang anang matinumanon nga mga unga. Ayaw eon ninyo pagpasugti ro inyong mga maeain nga handom nga inyo anay kato nga ginasinunod, kat owa pa kamo nagakilaea sa Dyos.

¹⁵ Ro Dyos nga nagtawag kinyo hay balaan, ngani dapat man kamo nga magpakabalaan sa tanan ninyong ginaobra.

¹⁶ Nasueat abi sa Sagradong Kasueatan nga naghambae ro Dyos, “Magpakabalaan kamo ay balaan ako.”

¹⁷ Ginakilaea ninyo nga ro Dyos ro inyong Ama kon nagapangamuyo kamo kana. Pero imaw man ro gahukom sa mga tawo ag owa imaw it ginaapinan kundi ginahukman nana ro kada isaea suno sa andang binuhatan. Ngani dapat nga tahaon ninyo imaw nga may kahadlok sa anang disiplina myentras nagapangabuhi kamo bilang mga umaeagi iya sa ibabaw it kalibutan.

¹⁸ Ayaw kamo hilipat kon ano ro ginbayad agod nga hitubos kamo it Dyos sa inyo anay nga owa it pueos nga pagpangabuhi nga inyong pinanubli sa inyong mga kalolo-lolohan. Ro gintubos kinyo hay bukon it mga bagay nga nagakaduea ro haega pareho it pilak ag bueawan

¹⁹ kundi ro mahaega nga dugo ni Kristo. Pareho imaw it tiyo it karnero nga manami ro eawas, ag owa gid it diperensya nga haead sa Dyos.

²⁰ Bago pa't-a gintuga ro kalibutan hay ginbutang eon it Dyos si Kristo nga mangin maneueuwas it tawo suno sa anang plano. Pero ku raya eang nga ulihing mga inadlaw imaw ginpahayag ag nakapanimpueos eon kamo sa anang ginhimo.

²¹ Paagi sa anang ginhimo ngato hay nagatuo eon kamo sa Dyos nga nagbanhaw ag nagpadungog kana. Ngani sa Dyos gid ro inyong pagtuo ag sigurado kamo nga ana man kamo nga pagabanhawon ag pagapadunggan sa ulihi.

²² Paagi sa inyong pagtinuman sa kamatuuran hay inyong ginalimpyuhan ro inyong maeain nga batasan, ngani may sinsiro kamo nga paghigugma sa inyong kaigmanghuran sa pagtuo. Maghigugmaanan kamo it hantop sa tagipusuon

²³ tungod may inyo eon nga bag-ong kabuhi. Ag ro binhi nga ginhalinan ku inyong bag-o nga kabuhi hay bukon it pareho sa ibang binhi nga nagakamatay kundi raya hay ro buhi ag owa it katapusan nga hambae it Dyos.

²⁴ Nasueat ngani sa Sagrado nga Kasueatan nga, “Ro kabuhi it tanan nga tawo hay pareho it hilamunon nga may kutod ag ro andang pagkabantog hay pareho it bueak it hilamunon nga owa nagadurar. Ro hilamunon abi hay nagakaeaay ag ro andang bueak hay nagakaeadagas,

²⁵ pero ro hambae it Dyos hay magapadayon bisan hasta hin-uno.” Ag ro Mayad nga Balita nga ginsugid kinyo hay hambae man ron it Dyos.