1 Juan 5 - Inkeanon

Ro Nagaperdi sa Kaeainan sa Kalibutan

¹ Ro mga nagatuo nga si Jesus hay ro Maneueuwas nga ginpromisa it Dyos hay mga unga it Dyos. Ro mga nagahigugma sa Ama hay nagahigugma man sa rato nga anang ginakabig nga anang mga unga.

² Masayran naton nga ginahigugma naton ro mga unga it Dyos kon aton nga ginahigugma ro Dyos, ag kon ginatuman naton ro anang kasuguan.

³ Ro aton abi nga paghigugma sa Dyos hay makita paagi sa aton nga pagtuman sa anang kasuguan. Ro anang kasuguan hay bukon eon it pareho ku mabug-at nga daeaehon nga haeos indi naton madaea,

⁴ dahil ro tanan nga gintaw-an ku Dyos it bag-ong kabuhi hay makaperdi sa kaeainan iya sa kalibutan. Ag ro makatao katon it kadaeag-an hay ro atong pagtuo kay Jesu-Kristo.

⁵ Sin-o eang abi ro makaperdi sa kaeainan iya sa kalibutan? Owa it iba kundi ro nagatuo nga si Jesus hay Unga it Dyos.

Ro Pagpamatuod Parti kay Jesu-Kristo

⁶ Ro Unga ngara it Dyos hay si Jesu-Kristo, ro Maneueuwas nga ginpadaea iya it Dyos. Nag-adto imaw iya sa kalibutan, ginbawtismuhan sa tubi, ag nag-uea ku anang dugo tag gineansang imaw sa krus. Owa eang imaw ginbawtismuhi kundi nag-uea man imaw ku ana nga dugo. Ro Espirito Santo mismo ro nagapamatuod kara, ag ro Espirito hay nagasugid permi it matuod.

⁷ Ngani, may tatlo nga nagapamatuod parti kay Jesus,

⁸ ro Espirito, ro tubi, ag ro dugo, ag ro tatlo ngara hay nagakasinanto.

⁹ Hay kon aton ngani nga ginapatihan ro pamatuod it mga tawo, mas pa't-a nga dapat naton patihan ro pamatuod it Dyos parti sa anang Unga, tungod masaligan sa tanan ro ginahambae it Dyos.

¹⁰ Ro nagapati nga si Jesu-Kristo hay Unga it Dyos hay makasiguro sa ana mismong kaugalingon nga ro anang ginapatihan hay matuod. Pero ro owa nagapati sa pamatuod nga ginahambae it Dyos nga Ama parti sa anang Unga hay ginaobra nana nga purilon ro Dyos.

¹¹ Ro pamatuod it Dyos hay raya: gintaw-an nana kita it kabuhi nga owa it katapusan, ag mabaton ron naton paagi sa pagtuo sa anang unga.

¹² Ngani ro may maeueot nga kaangtanan sa Unga it Dyos hay may kabuhi nga owa it katapusan, pero ro owa it maeueot nga kaangtanan sa Unga it Dyos hay owa ku kabuhi ngara.

Ro Kabuhi nga Owa it Katapusan

¹³ Ginasueatan ko kamo kara nga nagatuo it hantop gid sa Unga it Dyos, ro dungganon nga Maneueuwas, agod makasiguro kamo nga may inyo nga kabuhi nga owa it katapusan,

¹⁴ ag maisog man ro atong buot nga magpangayo kana, ay sayod naton nga nagapamati imaw, ag ginatao nana ro atong ginapangayo kon ruyon hay suno sa anang pagbuot.

¹⁵ Ag tungod nga sayod kita nga ginapamatian nana ro tanan natong ginapangayo, ngani sigurado man kita nga mabaton gid naton ro atong ginapangayo kana.

¹⁶ Kon hikita mo ro imong igmanghod sa pagtuo nga nagahinimo it saea nga indi kana makapahamueag sa Dyos hasta sa owa it katapusan hay pangamuyui imaw. Ipapanumbalik dayon imaw it Dyos sa anang dating kabuhi nga may malig-on nga pagtuo. May una abi nga sangka saea nga makapahamueag katon sa Dyos hasta sa owa it katapusan, pero owa ako gahambae nga ipangamuyo ro nagakasaea karon.

¹⁷ Ro tanan nga maeain nga buhat hay saea, pero puydi pa nga patawaron, mageuwas ku saea ngato nga makapahamueag sa tawo sa Dyos hasta sa owa it katapusan.

¹⁸ Sayod naton nga ro tanan nga gintaw-an it Dyos it bag-o nga kabuhi hay owa eon nagapadayon sa pagpakasaea, tungod ginabantayan imaw ku Unga it Dyos nga si Jesus, ag indi imaw hihalitan ni Satanas, ro ginahalinan it kaeainan.

¹⁹ Sayod man naton nga kita hay mga unga it Dyos, pero ro tanan nga owa nagatuo kay Kristo hay una sa gahom it ginahalinan it kaeainan.

²⁰ Hasayran man naton nga nag-abot riya ro Unga it Dyos, ag ginbuligan kita mga makaeubot agod makilaea naton ro matuod nga Dyos. May aton nga maeueot nga kaangtanan sa matuod nga Dyos, tungod maeueot man kita sa anang Unga nga si Jesu-Kristo. Imaw ro matuod nga Dyos, ag imaw man ro nagatao it kabuhi nga owa it katapusan.

²¹ Akon nga mga unga sa pagtuo, ayaw ninyo pagpakadyosa ro anoman sa inyong kabuhi.