1 Juan 4 - Inkeanon

Testingi ro mga Ginaturo Kinyo

¹ Mga pinalangga, ayaw kamo magpati sa tanan nga mga nagahambae nga ro andang ginaturo hay halin sa Espirito Santo, kundi testingi kon ro andang mga ginaturo hay halin matuod sa Dyos. Abo eo't-a abi nga mga nagapakuno-kuno nga mga propeta nga nagaeapnaag bisan siin nga parti it kalibutan.

² Makasiguro kamo nga ro ginaturo it tawo hay halin sa Espirito it Dyos kon nagapamatuod sanda nga ro Maneueuwas nga si Jesus hay nangin matuod nga tawo pag-adto iya sa kalibutan.

³ Pero ro tanan nga owa nagapati ku raya ngara parti kay Jesus hay gapakilaea nga ro andang ginaturo hay bukon it halin sa Espirito it Dyos, ag ro andang paino-ino hay pareho sa paino-ino it Manogkuntra kay Kristo. Ginsugid eon kinyo nga magaabot imaw iya, ag abo eon ngani iya sa kalibutan nga pareho kana it paino-ino.

⁴ Mga unga nakon sa pagtuo, kamo hay mga katawhan it Dyos ngani haperdi eon ninyo ro mga nagapakuno-kuno nga mga propeta, ay owa ninyo sanda pagpatihi. Owa ninyo sanda pagpatihi ay ro Espirito Santo nga una kinyo hay mas gamhanan kaysa kay Satanas nga nagagahom sa mga tawo iya sa kalibutan nga owa nagakilaea sa Dyos.

⁵ Ro mga nagapakuno-kuno ngaron nga mga propeta hay nagapaino-ino ag nagabinatasan pareho gid sa mga tawo nga owa nagakilaea sa Dyos. Ngani ro andang ginaturo hay suno sa kaisipan ku mga tawo nga owa nagakilaea sa Dyos, ag naila man magpamati kanda ro mga owa nagakilaea sa Dyos.

⁶ Kita ma't-a hay mga katawhan it Dyos, ag owa sanda naila magpamati katon dahil bukon sanda it mga unga it Dyos. Ro mga maeapit sa Dyos hay naila magpamati katon. Ruyon ro basehan agod masayran naton kon ro ginaturo it sangka tawo hay halin matuod sa Espirito Santo, ukon halin kay Satanas, nga nagapataeang sa mga tawo.

Ro Matuod nga Gugma Halin sa Dyos

⁷ Mga pinalangga, maghigugmaanan kita tungod ro Dyos ro ginahalinan it gugma. Ro nagahigugma sa anang isigkatawo hay unga it Dyos, ag maeapit sa Dyos.

⁸ Pero ro owa nagahigugma sa anang isigkatawo hay bukon it maeapit sa Dyos, dahil ro pagkamahigugmaon hay ana gid nga kinaiya it Dyos.

⁹ Makaraya ro pagpakita it Dyos ku anang gugma katon: ana nga ginpadaea riya sa kalibutan ro anang unga nga owa't kapareho, agod paagi kana hay magakabuhi kita hasta sa owa it katapusan.

¹⁰ Ro matuod nga kahueugan it gugma hay bukon it tag makita sa atong paghigugma sa Dyos kundi sa anang paghigugma katon, tag ginpaadto na riya ro anang unga agod paagi sa ana ngara nga unga hay mapatawad ro atong mga saea.

¹¹ Mga pinalangga, kon makara ro paghigugma it Dyos katon hay dapat man nga maghigugmaanan kita.

¹² Owa it nakakita sa Dyos pero kon nagahigugmaanan kita hay nagapadayon imaw nga maeueot katon, ag makita imaw katon dahil karon. Ag ro aton nga paghigugma sa iba hay ro pinakabunga ku paghigugma katon it Dyos.

¹³ May aton nga kasiguruhan nga nagapadayon kita nga may maeueot nga kaangtanan sa Dyos, ag imaw hay padayon nga maeueot katon tungod gintao nana katon ro ana mismo nga Espirito.

¹⁴ Hakita gid namon si Jesus. Ngani ginapamatud-an man namon nga ginpaadto iya it Dyos nga Ama ro anang Unga agod mangin Maneueuwas it kalibutan.

¹⁵ Ro nagapahayag nga si Jesus hay Unga it Dyos hay may padayon nga maeueot nga kaangtanan sa Dyos, ag ro Dyos man hay padayon nga maeueot kanda.

¹⁶ Hasayran naton ag ginapatihan nga ginahigugma gid kita it Dyos. Ro ana gid nga kinaiya it Dyos hay ro pagkamahigugmaon, ag ro tawo nga mahigugmaon sa Dyos ag sa anang isigkatawo hay may padayon nga maeueot nga kaangtanan sa Dyos, ag ro Dyos hay padayon man nga maeueot kana.

¹⁷ Paagi sa atong maeueot nga kaangtanan sa Dyos, ro atong paghigugma sa iba hay nangin himpit. Dahil karon, sigurado kita nga indi kita pagpinahan pag-abot it adlaw it paghukom, tungod samtang iya pa kita sa kalibutan hay nagakabuhi kita nga mahigugmaon pareho kay Kristo.

¹⁸ Ro nagahigugma hay owa nahadlok, dahil ro kahadlok hay ginaduea it matuod ag sinsiro nga paghigugma. Ro nagakahadlok hay nagapaabot nga pinahan, ag gapakilaea ron nga kueang pa ro anang pagsalig sa gugma it Dyos kana.

¹⁹ Nagahigugma kita ay ro Dyos ro unang naghigugma katon.

²⁰ Pero kon may maghambae nga ginahigugma nana ro Dyos, pero ginakaugtan nana ro anang igmanghod sa pagtuo hay nagapinuril. Kon indi nana mahigugma ro anang igmanghod nga anang makita, mas kapin pa gid nga indi nana mahigugma ro Dyos nga indi nana makita.

²¹ Raya ro sugo nga gintao ni Kristo katon nga ro nagahigugma sa Dyos hay dapat nga maghigugma man sa anang igmanghod sa pagtuo.